Sagaria 5

₁Ek het weer opgekyk en gesien: Daar was 'n vlieënde •boekrol! ₂Die engel sê toe vir my: “Wat sien jy?” Ek het geantwoord: “Ek sien 'n vlieënde boekrol, sy lengte is twintig el en sy breedte tien el.”

₃Daarop sê hy vir my: “Dit is die vloek wat oor die hele land uitgestuur word: Volgens die een kant van die boekrol sal elkeen wat steel, uitgewis word en volgens die ander kant van die boekrol sal elkeen wat vals sweer, uitgewis word. ₄Ek het die vloek uitgestuur,” is die uitspraak van die Here, Heerser oor alle magte. “Dit sal die huis van 'n dief binnedring en ook die huis van elkeen wat by my Naam vals sweer. Die vloek sal in sy huis bly en dit verwoes, die hout en ook die klippe.”

₅Daarop tree die engel wat met my praat na vore en sê vir my: “Kyk tog mooi en let op wat hier aankom.”

₆Toe sê ek: “Wat is dit?” En hy antwoord: “Dit is 'n graanmandjie wat hier aankom.” En hy sê verder: “Dit is die sondeskuld van die hele land.”

₇Meteens word die looddeksel opgelig, en daar sit 'n vrou binne-in die mandjie.

₈En die engel sê: “Dit is die goddeloosheid.” Hy het haar in die mandjie teruggedruk en die looddeksel oor die opening geplaas. ₉Toe ek opkyk, sien ek: Daar kom twee vroue aan met wind in hulle vlerke! Hulle het vlerke soos 'n ooievaar gehad. Hulle het die mandjie opgelig en tussen hemel en aarde laat hang.

₁₀Ek vra toe die engel wat met my praat: “Waarheen neem hulle die mandjie?”

₁₁En hy antwoord my: “Na die land Sinar om vir die mandjie 'n huis te bou; en wanneer die huis gereed is, sal die mandjie op sy voetstuk geplaas word.”