I KORINTHIËRS 3

₁EN ek, broeders, kon met julle nie spreek soos met geestelike mense nie, maar soos met vleeslike, soos met klein kinders in Christus.

₂Ek het julle met melk gevoed, nie met vaste spys nie, want julle was nog nie daartoe in staat nie, en julle is nou nog nie daartoe in staat nie,

₃omdat julle nog vleeslik is; want aangesien daar onder julle jaloersheid en twis en tweedrag is, is julle nie vleeslik nie en wandel julle nie na die mens nie?

₄Want as die een sê: Ek is van Paulus; en die ander: Ek van Apollos — is julle nie vleeslik nie?

₅Wie is Paulus dan, en wie Apollos anders as dienaars deur wie julle gelowig geword het? En dit soos die Here aan elkeen gegee het.

₆Ek het geplant, Apollos het natgemaak, maar God het laat groei.

₇So is dan hy wat plant of hy wat natmaak, niks nie, maar God wat laat groei.

₈Maar hy wat plant en hy wat natmaak, is een, maar elkeen sal sy eie loon volgens sy eie arbeid ontvang.

₉WANT ons is medewerkers van God; die akker van God, die gebou van God is julle.

₁₀Volgens die genade van God wat aan my gegee is, het ek soos 'n bekwame boumeester die fondament gelê, en 'n ander bou daarop; maar elkeen moet oppas hoe hy daarop bou.

₁₁Want niemand kan 'n ander fondament lê as wat daar gelê is nie, dit is Jesus Christus.

₁₂En as iemand op dié fondament bou goud, silwer, kosbare stene, hout, hooi, stoppels —

₁₃elkeen se werk sal aan die lig kom, want die dag sal dit aanwys, omdat dit deur vuur openbaar gemaak word; en die vuur sal elkeen se werk op die proef stel, hoedanig dit is.

₁₄As iemand se werk bly staan wat hy daarop gebou het, sal hy loon ontvang;

₁₅as iemand se werk verbrand word, sal hy skade ly; alhoewel hy self gered sal word, maar soos deur vuur heen.

₁₆Weet julle nie dat julle 'n tempel van God is en die Gees van God in julle woon nie?

₁₇As iemand die tempel van God skend, sal God hom skend; want die tempel van God is heilig, en dit is julle.

₁₈Laat niemand homself mislei nie: as iemand meen dat hy wys is onder julle in hierdie wêreld, laat hom dwaas word, sodat hy wys kan word;

₁₉want die wysheid van hierdie wêreld is dwaasheid by God; want daar is geskrywe: Hy wat die wyse mense in hulle listigheid vang;

₂₀en verder: Die Here ken die gedagtes van die wyse mense, dat dit nietig is.

₂₁Laat niemand dan op mense roem nie, want alles behoort aan julle;

₂₂of dit Paulus is of Apollos of Céfas of die wêreld of lewe of dood of teenswoordige of toekomstige dinge — alles behoort aan julle;

₂₃maar julle behoort aan Christus, en Christus aan God.