GÉNESIS 10

₁EN dit is die stamboom van die seuns van Noag: Sem, Gam en Jafet — vir hulle is daar seuns gebore ná die vloed.

₂Die seuns van Jafet was: Gomer en Magog en Madai en Jawan en Tubal en Meseg en Tiras.

₃En die seuns van Gomer was: Áskenas en Rifat en Togárma.

₄En die seuns van Jawan was: Elísa en Tarsis, die Kittiërs en Dodaniete —

₅uit hulle het verdeeld geraak die kuslande van die nasies, in hulle lande, elkeen na sy taal, volgens hulle geslagte, in hulle nasies.

₆En die seuns van Gam was: Kus en Misráim en Put en Kanaän.

₇En die seuns van Kus was: Seba en Háwila en Sabta en Raéma en Sábtega. En die seuns van Raéma: Skeba en Dedan.

₈Kus was ook die vader van Nimrod. Hý het begin om 'n geweldenaar op aarde te wees.

₉Hy was 'n geweldige jagter voor die aangesig van die Here. Daarom sê hulle: Soos Nimrod, 'n geweldige jagter voor die aangesig van die Here.

₁₀En die begin van sy ryk was Babel en Ereg en Akkad en Kalne in die land Sínear.

₁₁Uit hierdie land het hy getrek na Assur en gebou: Ninevé en Réhobot-Ir en Kalag

₁₂en Resen, tussen Ninevé en Kalag — dit is die groot stad.

₁₃En Misráim was die vader van die Ludiete en Anamiete en Lehabiete en Naftuhiete

₁₄en die Patrusiete en Kasluhiete — waaruit die Filistyne voortgekom het — en Kaftoriete.

₁₅En Kanaän was die vader van Sidon, sy eersgeborene, en Het

₁₆en die Jebusiete en Amoriete en Girgasiete

₁₇en die Hewiete en Arkiete en Siniete

₁₈en die Arwadiete en Semariete en Hamatiete. En daarna het die geslagte van die Kanaäniete hulle versprei.

₁₉En die gebied van die Kanaäniete was van Sidon af in die rigting van Gerar tot by Gasa, in die rigting van Sodom en Gomorra en Adma en Sebóim tot by Lesa.

₂₀Dit was die seuns van Gam volgens hulle geslagte, na hulle tale, in hulle lande, in hulle nasies.

₂₁En ook vir Sem, die stamvader van al die seuns van Heber, die ouer broer van Jafet, is seuns gebore.

₂₂Die seuns van Sem was: Elam en Assur en Arpágsad en Lud en Aram.

₂₃En die seuns van Aram was: Us en Hul en Geter en Mas.

₂₄En Arpágsad was die vader van Selag, en Selag van Heber.

₂₅En vir Heber is twee seuns gebore; die naam van die een was Peleg, want in sy dae het die aardbewoners verdeeld geraak; en die naam van sy broer was Joktan.

₂₆En Joktan was die vader van Almódad en Selef en Hasarmáwet en Jerag

₂₇en Hadóram en Usal en Dikla

₂₈en Obal en Abímael en Skeba

₂₉en Ofir en Háwila en Jobab. Hulle almal was seuns van Joktan.

₃₀En hulle woonplek was van Mesa af in die rigting van Sefar, die berg van die Ooste.

₃₁Dit is die seuns van Sem volgens hulle geslagte, na hulle tale, in hulle lande, volgens hulle nasies.

₃₂Dit is die geslagte van die seuns van Noag volgens hulle afstamming, in hulle nasies; en uit hulle het die nasies op die aarde hulle verdeel ná die vloed.