GÉNESIS 9

₁EN God het Noag en sy seuns geseën en aan hulle gesê: Wees vrugbaar en vermeerder en vul die aarde.

₂Die vrees en die skrik vir julle sal wees oor al die diere van die aarde en al die voëls van die hemel: alles wat op die aarde beweeg, en al die visse van die see. Hulle is in julle hand oorgegee.

₃Alles wat beweeg en lewe, sal julle voedsel wees. Net soos die groen plante, gee Ek dit alles aan julle.

₄Net die vleis met sy siel, met sy bloed, mag julle nie eet nie.

₅Maar wat julle eie bloed betref, dit sal Ek eis: van al die diere sal Ek dit eis. Ook van die mens, van die een teenoor die ander, sal Ek die siel van die mens eis.

₆Hy wat die bloed van 'n mens vergiet, sy bloed sal deur die mens vergiet word; want God het die mens na sy beeld gemaak.

₇Maar julle, wees vrugbaar en vermeerder; wemel op die aarde en vermeerder daarop.

₈Verder het God met Noag en sy seuns by hom gespreek en gesê:

₉Maar Ek, kyk, Ek rig my verbond met julle op en met julle nageslag ná julle,

₁₀en met al die lewende wesens wat by julle is: die voëls, die vee en al die wilde diere van die aarde by julle — al wat uit die ark uitgegaan het, naamlik al die diere van die aarde.

₁₁En Ek rig my verbond met julle op, dat alle vlees nie meer deur die waters van die vloed uitgeroei sal word nie, en dat daar geen vloed meer sal wees om die aarde te verwoes nie.

₁₂En God het gesê: Dit is die teken van die verbond wat Ek sluit tussen My en julle en al die lewende wesens wat by julle is, vir ewige geslagte:

₁₃my boog gee Ek in die wolke; dit sal 'n teken wees van die verbond tussen My en die aarde.

₁₄As Ek dan wolke oor die aarde bring en hierdie boog verskyn in die wolke,

₁₅dan sal Ek dink aan my verbond wat daar bestaan tussen My en julle en al die lewende wesens, in alle vlees. En die waters sal nie meer 'n vloed word om alle vlees te verdelg nie.

₁₆As die boog dan in die wolke staan, sal Ek dit aansien om gedagtig te wees aan die ewige verbond tussen God en al die lewende wesens in alle vlees wat op die aarde is.

₁₇En God het vir Noag gesê: Dit is die teken van die verbond wat Ek opgerig het tussen My en alle vlees wat op die aarde is.

₁₈EN die seuns van Noag wat uit die ark uitgegaan het, was Sem en Gam en Jafet. En Gam was die vader van Kanaän.

₁₉Hierdie drie was die seuns van Noag; en met hulle begin die uitbreiding van al die aardbewoners.

₂₀En Noag het as landbouer 'n wingerd begin plant.

₂₁Maar toe hy van die wyn gedrink het, het hy dronk geword en naak in sy tent gelê.

₂₂En Gam, die vader van Kanaän, het sy vader se naaktheid gesien en dit aan sy twee broers daarbuite te kenne gegee.

₂₃Toe neem Sem en Jafet die bo-kleed en hou dit op hulle skouers terwyl hulle agteruitloop, en hulle het die naaktheid van hulle vader bedek: hulle gesig was agtertoe gedraai, sodat hulle die naaktheid van hulle vader nie gesien het nie.

₂₄Toe Noag van sy wyn wakker word en merk wat sy jonger seun hom aangedoen het,

₂₅sê hy: Vervloek is Kanaän! 'n Kneg van die knegte moet hy wees vir sy broers.

₂₆Verder het hy gesê: Geseënd is die Here, die God van Sem. Maar Kanaän moet sy dienskneg wees.

₂₇Mag God aan Jafet ruimte verskaf, en mag hy woon in die tente van Sem! Maar Kanaän moet sy dienskneg wees.

₂₈En Noag het ná die vloed driehonderd-en-vyftig jaar gelewe.

₂₉So was dan al die dae van Noag negehonderd-en-vyftig jaar, en hy het gesterwe.