JOHANNES 15

₁EK is die ware wynstok, en my Vader is die landbouer.

₂Elke loot wat in My nie vrug dra nie, neem Hy weg; en elke loot wat vrug dra, dié maak Hy skoon, sodat dit meer vrug kan dra.

₃Julle is alreeds rein deur die woord wat Ek tot julle gespreek het.

₄Bly in My, soos Ek in julle. Net soos die loot geen vrug kan dra van homself as dit nie in die wynstok bly nie, so julle ook nie as julle in My nie bly nie.

₅Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.

₆As iemand in My nie bly nie, word hy uitgewerp soos die loot en verdroog, en hulle maak dit bymekaar en gooi dit in die vuur, en dit verbrand.

₇As julle in My bly en my woorde in julle, sal julle vra net wat julle wil hê, en julle sal dit verkry.

₈Hierin is my Vader verheerlik, dat julle veel vrug dra; en julle sal my dissipels wees.

₉Soos die Vader My liefgehad het, het Ek julle ook liefgehad. Bly in hierdie liefde van My.

₁₀As julle my gebooie bewaar, sal julle in my liefde bly, net soos Ek die gebooie van my Vader bewaar en in sy liefde bly.

₁₁Dit het Ek vir julle gesê, dat my blydskap in julle kan bly en julle blydskap volkome kan word.

₁₂Dít is my gebod, dat julle mekaar moet liefhê net soos Ek julle liefgehad het.

₁₃Groter liefde het niemand as dit nie, dat iemand sy lewe vir sy vriende gee.

₁₄Julle is my vriende as julle alles doen wat Ek julle beveel.

₁₅Ek noem julle nie meer diensknegte nie, omdat die dienskneg nie weet wat sy heer doen nie. Maar Ek het julle vriende genoem, omdat Ek alles wat Ek van my Vader gehoor het, aan julle bekend gemaak het.

₁₆Julle het My nie uitverkies nie, maar Ek het julle uitverkies en julle aangestel om vrug te gaan dra en dat julle vrug kan bly, sodat wat julle die Vader ook al in my Naam vra, Hy julle dit kan gee.

₁₇Dit gebied Ek julle, dat julle mekaar moet liefhê.

₁₈As die wêreld julle haat, moet julle weet dat hy My voor julle gehaat het.

₁₉As julle van die wêreld was, sou die wêreld sy eiendom liefhê. Maar omdat julle nie van die wêreld is nie, maar Ek julle uit die wêreld uitverkies het, daarom haat die wêreld julle.

₂₀Onthou die woord wat Ek vir julle gesê het: 'n Dienskneg is nie groter as sy heer nie. As hulle My vervolg het, sal hulle jul ook vervolg. As hulle my woord bewaar het, sal hulle jul woord ook bewaar.

₂₁Maar al hierdie dinge sal hulle aan julle doen ter wille van my Naam, omdat hulle Hom nie ken wat My gestuur het nie.

₂₂As Ek nie gekom en met hulle gespreek het nie, sou hulle geen sonde hê nie; maar nou het hulle geen verskoning vir hul sonde nie.

₂₃Wie my haat, haat ook my Vader.

₂₄As Ek nie die werke onder hulle gedoen het wat niemand anders gedoen het nie, sou hulle geen sonde hê nie. Maar nou het hulle dit gesien, en tog het hulle My sowel as my Vader gehaat.

₂₅Maar die woord wat in hulle wet geskrywe is, moet vervul word: Hulle het My sonder oorsaak gehaat.

₂₆Maar as die Trooster gekom het wat Ek vir julle van die Vader sal stuur, die Gees van die waarheid wat van die Vader uitgaan, sal Hy van My getuig.

₂₇En julle getuig ook, omdat julle van die begin af met My is.