JOHANNES 2

₁EN op die derde dag was daar 'n bruilof te Kana in Galiléa, en die moeder van Jesus was daar.

₂En Jesus en sy dissipels was ook na die bruilof genooi.

₃En toe daar wyn kortkom, sê die moeder van Jesus vir Hom: Hulle het geen wyn nie.

₄Jesus sê vir haar: Vrou, wat het Ek met u te doen? My uur het nog nie gekom nie.

₅Sy moeder sê vir die dienaars: Net wat Hy vir julle sê, moet julle doen.

₆En daar het volgens die reinigingsgebruike van die Jode ses klipkanne gestaan, wat elkeen twee of drie ankers hou.

₇Jesus sê vir hulle: Maak die kanne vol water En hulle het hul tot bo toe volgemaak.

₈En Hy sê aan hulle: Skep nou uit en bring dit vir die hoofdienaar. En hulle het dit gebring.

₉En toe die hoofdienaar die water proe wat wyn geword het — en hy het nie geweet waarvandaan dit was nie, maar die dienaars wat die water geskep het, het geweet — roep die hoofdienaar die bruidegom

₁₀en sê vir hom: Elke mens sit eers die goeie wyn op en, wanneer hulle goed gedrink het, dan die slegste; maar u het die goeie wyn tot nou toe bewaar.

₁₁Hierdie eerste een van sy tekens het Jesus te Kana in Galiléa gedoen; en Hy het sy heerlikheid geopenbaar, en sy dissipels het in Hom geglo.

₁₂Daarna het Hy na Kapérnaüm afgegaan, Hy en sy moeder en sy broers en sy dissipels, en hulle het daar nie baie dae gebly nie.

₁₃EN die pasga van die Jode was naby, en Jesus het opgegaan na Jerusalem.

₁₄En Hy het in die tempel gevind die wat beeste en skape en duiwe verkoop, en die geldwisselaars wat daar sit.

₁₅En Hy het 'n sweep van toutjies gemaak en almal uit die tempel uitgedrywe, ook die skape en die beeste, en die kleingeld van die wisselaars het Hy uitgegooi en hulle tafels omgekeer.

₁₆En vir die duiweverkopers het Hy gesê: Neem daardie dinge hier weg; moenie die huis van my Vader 'n handelshuis maak nie.

₁₇En sy dissipels het onthou dat daar geskrywe is: Die ywer vir u huis het my verteer.

₁₈Toe antwoord die Jode en sê vir Hom: Watter teken toon U aan ons, dat U hierdie dinge doen?

₁₉Jesus antwoord en sê vir hulle: Breek hierdie tempel af, en in drie dae sal Ek dit oprig.

₂₀En die Jode sê: Ses-en-veertig jaar lank is aan hierdie tempel gebou, en U, sal U dit in drie dae oprig?

₂₁Maar Hy het oor die tempel van sy liggaam gespreek.

₂₂En toe Hy opgestaan het uit die dode, het sy dissipels onthou dat Hy dit vir hulle gesê het; en hulle het die Skrif geglo en die woord wat Jesus gespreek het.

₂₃En toe Hy in Jerusalem was op die pasga gedurende die fees, het baie in sy Naam geglo, omdat hulle die tekens gesien het wat Hy doen.

₂₄Maar Jesus self het Hom aan hulle nie toevertrou nie, omdat Hy almal geken het

₂₅en omdat Hy nie nodig gehad het dat iemand van die mens sou getuig nie; want Hy self het geweet wat in die mens is.