NÚMERI 1

₁VERDER het die Here met Moses gespreek in die woestyn Sinai, in die tent van samekoms, op die eerste van die tweede maand, in die tweede jaar nadat hulle uit Egipteland uitgetrek het, en gesê:

₂Neem julle die volle getal van die hele vergadering van die kinders van Israel op volgens hulle geslagte, volgens hulle families, na die getal name, almal wat manlik is, hoof vir hoof;

₃van twintig jaar oud en daarbo, almal wat op kommando moet uittrek in Israel, dié moet julle tel volgens hulle leërafdelings, jy en Aäron.

₄En met julle saam moet daar van elke stam 'n man wees, 'n man wat hoof is van sy families.

₅En dit is die name van die manne wat julle moet bystaan: Vir Ruben: Elísur, die seun van Sedéür;

₆vir Símeon: Selúmiël, die seun van Surísaddai;

₇vir Juda: Nagson, die seun van Ammínadab;

₈vir Íssaskar: Netáneël, die seun van Suar;

₉vir Sébulon: Elíab, die seun van Helon;

₁₀vir die kinders van Josef: vir Efraim: Elisáma, die seun van Ammíhud; vir Manasse: Gámliël, die seun van Pedásur;

₁₁vir Benjamin: Abídan, die seun van Gideóni;

₁₂vir Dan, Ahiëser, die seun van Ammísaddai;

₁₃vir Aser: Págiël, die seun van Ogran;

₁₄vir Gad: Éljasaf, die seun van Réhuel;

₁₅vir Náftali: Ahíra, die seun van Enan.

₁₆Dit was hulle wat uit die vergadering opgeroep was, die owerstes van hulle voorvaderlike stamme, die stamhoofde van Israel.

₁₇Toe het Moses en Aäron dié manne geneem wat met hulle name aangewys was,

₁₈en hulle het die hele vergadering op die eerste dag van die tweede maand bymekaar laat kom; en dié het hulle afkoms opgegee volgens hulle geslagte, volgens hulle families, na die getal name, van twintig jaar oud en daarbo, hoof vir hoof,

₁₉soos die Here Moses beveel het. En hy het hulle getel in die woestyn Sinai.

₂₀En die seuns van Ruben, die eersgeborene van Israel — hulle nakomelinge volgens hulle geslagte, volgens hulle families, na die getal name, hoof vir hoof, almal wat manlik was, van twintig jaar oud en daarbo, almal wat op kommando moet uittrek —

₂₁hulle geteldes van die stam van Ruben was ses-en-veertigduisend-vyfhonderd.

₂₂Van die seuns van Símeon, hulle nakomelinge volgens hulle geslagte, volgens hulle families, na die getal name, hoof vir hoof, almal wat manlik was, van twintig jaar oud en daarbo, almal wat op kommando moet uittrek —

₂₃hulle geteldes van die stam van Símeon was negen-en-vyftigduisend-driehonderd.

₂₄Van die seuns van Gad, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₂₅hulle geteldes van die stam van Gad was vyf-en-veertigduisend-seshonderd-en-vyftig.

₂₆Van die seuns van Juda, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₂₇hulle geteldes van die stam van Juda was vier-en-sewentigduisend-seshonderd.

₂₈Van die seuns van Íssaskar, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₂₉hulle geteldes van die stam van Íssaskar was vier-en-vyftigduisend-vierhonderd.

₃₀Van die seuns van Sébulon, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₃₁hulle geteldes van die stam van Sébulon was sewen-en-vyftigduisend-vierhonderd.

₃₂Van die seuns van Josef, van die seuns van Efraim, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₃₃hulle geteldes van die stam van Efraim was veertigduisend-vyfhonderd;

₃₄van die seuns van Manasse, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₃₅hulle geteldes van die stam van Manasse was twee-en-dertigduisend-tweehonderd.

₃₆Van die seuns van Benjamin, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₃₇hulle geteldes van die stam van Benjamin was vyf-en-dertigduisend-vierhonderd.

₃₈Van die seuns van Dan, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₃₉hulle geteldes van die stam van Dan was twee-en-sestigduisend-sewehonderd.

₄₀Van die seuns van Aser, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₄₁hulle geteldes van die stam van Aser was een-en-veertigduisend-vyfhonderd.

₄₂Van die seuns van Náftali, hulle nakomelinge volgens hulle geslagte, volgens hulle families, na die getal name, van twintig jaar oud en daarbo, almal wat op kommando moet uittrek —

₄₃hulle geteldes van die stam van Náftali was drie-en-vyftigduisend-vierhonderd.

₄₄Dit is die geteldes wat Moses en Aäron en die owerstes van Israel getel het; twaalf man was dit, elkeen vir sy families.

₄₅So was dan al die geteldes van die kinders van Israel volgens hulle families, van twintig jaar oud en daarbo, almal wat in Israel op kommando moet uittrek —

₄₆al die geteldes dan was seshonderd-en-drieduisend-vyfhonderd-en-vyftig.

₄₇Maar die Leviete, volgens hulle voorvaderlike stam, is onder hulle nie getel nie.

₄₈Die Here het naamlik met Moses gespreek en gesê:

₄₉Net die stam van Levi moet jy nie tel nie en hulle volle getal onder die kinders van Israel nie opneem nie;

₅₀maar stel jy die Leviete aan oor die tabernakel van die Getuienis en oor al sy gereedskap en oor alles wat daarby behoort. Húlle moet die tabernakel dra en alles wat daarby behoort, en húlle moet dit bedien en rondom die tabernakel laer opslaan.

₅₁En as die tabernakel wegtrek, moet die Leviete dit afbreek; en as die tabernakel rus, moet die Leviete dit oprig; en die onbevoegde wat nader kom, moet gedood word.

₅₂En die kinders van Israel moet laer opslaan elkeen op sy laerplek en elkeen by sy vaandel, volgens hulle leërafdelings.

₅₃Maar die Leviete moet laer opslaan rondom die tabernakel van die Getuienis, dat daar geen toorn oor die vergadering van die kinders van Israel kom nie. So moet dan die Leviete die diens van die tabernakel van die Getuienis waarneem.

₅₄En die kinders van Israel het dit gedoen; net soos die Here Moses beveel het, so het hulle gedoen.