NÚMERI 3

₁EN dit is die nakomelinge van Aäron en Moses op die dag toe die Here met Moses op die berg Sinai gespreek het.

₂En dit is die name van die seuns van Aäron: die eersgeborene Nadab, daarna Abíhu, Eleásar en Ítamar.

₃Dit is die name van die seuns van Aäron, die gesalfde priesters, wat hy aangestel het om die priesteramp te bedien.

₄Maar Nadab en Abíhu het gesterwe voor die aangesig van die Here toe hulle vreemde vuur voor die aangesig van die Here in die woestyn Sinai gebring het, en hulle het geen kinders gehad nie; maar Eleásar en Ítamar het die priesteramp bedien voor die oë van hulle vader Aäron.

₅En die Here het met Moses gespreek en gesê:

₆Laat die stam van Levi nader kom, en stel hulle voor die priester Aäron, dat hulle hom kan dien.

₇En hulle moet sy diens waarneem en die diens van die hele vergadering voor die tent van samekoms, om die dienswerk van die tabernakel te verrig.

₈En hulle moet sorg vir al die gereedskap van die tent van samekoms en vir die diens van die kinders van Israel, om die dienswerk van die tabernakel te verrig.

₉En jy moet die Leviete aan Aäron en sy seuns gee; hulle is heeltemal aan hom gegee uit die kinders van Israel.

₁₀Maar Aäron en sy seuns moet jy aanstel, dat hulle hul priesteramp kan waarneem; en die onbevoegde wat nader kom, moet gedood word.

₁₁En die Here het met Moses gespreek en gesê:

₁₂Kyk, Ek self het die Leviete geneem onder die kinders van Israel uit in die plek van al die eersgeborenes wat die moederskoot open, uit die kinders van Israel, dat die Leviete myne kan wees.

₁₃Want al die eersgeborenes is myne: op die dag toe Ek al die eersgeborenes in Egipteland getref het, het Ek al die eersgeborenes in Israel vir My geheilig, mense sowel as diere; hulle moet myne wees. Ek is die Here.

₁₄En die Here het met Moses gespreek in die woestyn Sinai en gesê:

₁₅Tel die seuns van Levi volgens hulle families, volgens hulle geslagte; almal wat manlik is, van 'n maand oud en daarbo — dié moet jy tel.

₁₆En Moses het hulle volgens die bevel van die Here getel soos dit hom beveel is.

₁₇En dit was die seuns van Levi volgens hulle name: Gerson en Kehat en Merári.

₁₈En dit is die name van die seuns van Gerson volgens hulle geslagte: Libni en Símeï.

₁₉En die seuns van Kehat volgens hulle geslagte: Amram en Jishar, Hebron en Ússiël.

₂₀En die seuns van Merári volgens hulle geslagte: Magli en Musi. Dit is die geslagte van die Leviete volgens hulle families.

₂₁Aan Gerson behoort die geslag van die Libniete en die geslag van die Simeïete. Dit is die geslagte van die Gersoniete.

₂₂Hulle geteldes volgens die getal van almal wat manlik was, van 'n maand oud en daarbo — húlle geteldes was seweduisend-vyfhonderd.

₂₃Die geslagte van die Gersoniete moet laer opslaan agter die tabernakel aan die westekant.

₂₄En owerste oor die familie van die Gersoniete moet Éljasaf, die seun van Lael, wees.

₂₅En die seuns van Gerson moet by die tent van samekoms versorg: die tabernakel en die tent, sy dekkleed en die bedekking vir die ingang van die tent van samekoms;

₂₆en die behangsels van die voorhof en die bedekking vir die ingang van die voorhof wat rondom die tabernakel en die altaar is, en sy lyne — alles wat by sy bediening behoort.

₂₇En aan Kehat het behoort die geslag van die Amramiete en die geslag van die Jishariete en die geslag van die Hebroniete en die geslag van die Ussiëliete. Dit is die geslagte van die Kehatiete.

₂₈Volgens die getal van almal wat manlik is, van 'n maand oud en daarbo, was daar agtduisend-seshonderd wat die diens van die heiligdom waargeneem het.

₂₉Die geslagte van die seuns van Kehat moet laer opslaan aan die kant van die tabernakel, aan die suidekant.

₃₀En owerste oor die familie vir die geslagte van die Kehatiete moet wees Elísafan, die seun van Ússiël.

₃₁En hulle moet versorg: die ark en die tafel en die kandelaar en die altare en die gereedskap van die heiligdom waarmee hulle diens doen, en die voorhangsel en alles wat by die bediening daarvan behoort.

₃₂En die hoof van die owerstes van Levi moet wees Eleásar, die seun van Aäron, die priester, die opsigter oor die wat die diens van die heiligdom waarneem.

₃₃Aan Merári het behoort die geslag van die Magliete en die geslag van die Musiete. Dit is die geslagte van Merári.

₃₄En hulle geteldes volgens die getal van almal wat manlik is, van 'n maand oud en daarbo, was sesduisend-tweehonderd.

₃₅En die owerste van die familie vir die geslagte van Merári moet wees Súriël, die seun van Abihail; hulle moet laer opslaan aan die kant van die tabernakel, aan die noordekant.

₃₆En die toesig van die seuns van Merári — wat hulle te besorg het — moet wees oor die style van die tabernakel en sy dwarshoute en sy pilare en sy voetstukke en al die gereedskap sowel as die hele diens wat daarby behoort;

₃₇en die pilare van die voorhof rondom en hulle voetstukke en hulle penne en hulle lyne.

₃₈En die wat voor die tabernakel laer opslaan, aan die oostekant, voor die tent van samekoms, teen sonop, moet wees Moses en Aäron met sy seuns wat die diens van die heiligdom waarneem, naamlik die diens vir die kinders van Israel; en die onbevoegde wat nader kom, moet gedood word.

₃₉Al die geteldes van die Leviete wat Moses en Aäron volgens die bevel van die Here, volgens hulle geslagte getel het, almal wat manlik was, van 'n maand oud en daarbo, was twee-en-twintigduisend.

₄₀En die Here het aan Moses gesê: Tel al die manlike eersgeborenes van die kinders van Israel, van 'n maand oud en daarbo, en neem die getal van hulle name op.

₄₁En jy moet vir My — Ek is die Here — die Leviete neem in die plek van al die eersgeborenes onder die kinders van Israel, en die vee van die Leviete in die plek van al die eersgeborenes onder die vee van die kinders van Israel.

₄₂En Moses het, soos die Here hom beveel het, al die eersgeborenes onder die kinders van Israel getel.

₄₃En al die manlike eersgeborenes volgens die getal name, van 'n maand oud en daarbo, volgens hulle geteldes, was twee-en-twintigduisend-tweehonderd-drie-en-sewentig.

₄₄En die Here het met Moses gespreek en gesê:

₄₅Neem die Leviete in die plek van al die eersgeborenes onder die kinders van Israel, en die vee van die Leviete in die plek van hulle vee, sodat die Leviete myne kan wees. Ek is die Here.

₄₆Wat aangaan die loskoping van die tweehonderd-drie-en-sewentig wat oor is bo die Leviete, uit die eersgeborenes van die kinders van Israel,

₄₇moet jy per hoof vyf sikkels neem; volgens die sikkel van die heiligdom moet jy dit neem; die sikkel is twintig gera.

₄₈En jy moet die geld as losprys van die wat onder hulle oor is, aan Aäron en sy seuns gee.

₄₉Daarop het Moses die loskoopgeld geneem van die wat oor was bo die wat deur die Leviete losgekoop was;

₅₀van die eersgeborenes van die kinders van Israel het hy die geld geneem, duisend-driehonderd-vyf-en-sestig sikkels volgens die sikkel van die heiligdom.

₅₁En Moses het die loskoopgeld aan Aäron en sy seuns gegee volgens die bevel van die Here, soos die Here Moses beveel het.