SPREUKE 3

₁MY seun, vergeet my onderwysing nie, en laat jou hart my gebooie bewaar;

₂want dit sal lengte van dae en jare van lewe en vrede vir jou vermeerder.

₃Laat liefde en trou jou nie verlaat nie; bind dit om jou hals, skryf dit op die tafel van jou hart,

₄dan sal jy genade vind en 'n goeie insig in die oë van God en die mense.

₅Vertrou op die Here met jou hele hart en steun nie op jou eie insig nie.

₆Ken Hom in al jou weë, dan sal Hý jou paaie gelykmaak.

₇Wees nie wys in jou eie oë nie; vrees die Here, en wyk af van die kwaad;

₈dit sal genesing wees vir jou liggaam en verkwikking vir jou gebeente.

₉Vereer die Here uit jou goed en uit die eerstelinge van al jou inkomste;

₁₀dan sal jou skure vol word van oorvloed en jou parskuipe oorloop van mos.

₁₁My seun, verag die tug van die Here nie, en laat sy kastyding nie jou weersin wek nie,

₁₂want die Here tugtig hom wat Hy liefhet, ja, soos 'n vader die seun in wie hy behae het.

₁₃Gelukkig die mens wat wysheid gevind het, en die mens wat verstand verkry;

₁₄want die verkryging daarvan is beter as dié van silwer, en die verwerwing daarvan beter as van goud;

₁₅dit is kosteliker as korale, en al jou kleinode kan daar nie mee vergelyk word nie.

₁₆In sy regterhand is lengte van dae, in sy linkerhand rykdom en eer;

₁₇sy weë is lieflike weë, en al sy paaie is vrede.

₁₈Dit is 'n lewensboom vir die wat dit aangryp, en elkeen wat dit vashou, is gelukkig.

₁₉Die Here het deur wysheid die aarde gegrond, deur verstand die hemele vasgestel;

₂₀deur sy kennis het die watervloede oopgebreek en het die wolke dou gedrup.

₂₁My seun, laat dit nie uit jou oë wyk nie, bewaar beleid en oorleg,

₂₂dan sal dit die lewe wees vir jou siel en 'n versiersel vir jou hals;

₂₃dan sal jy veilig jou weg bewandel en jou voet nie stamp nie;

₂₄as jy gaan lê, sal jy nie skrik nie, en lê jy, dan sal jou slaap soet wees.

₂₅Jy hoef nie bang te wees vir 'n skielike skrik of vir die ondergang van die goddelose as dit kom nie;

₂₆want die Here sal jou vertroue wees, en Hy sal jou voet bewaar vir die strik.

₂₇Hou 'n weldaad nie terug van hom aan wie dit toekom as dit in jou mag is om dit te doen nie.

₂₈Sê nie vir jou naaste nie: Gaan en kom terug, dan sal ek môre gee — terwyl jy dit het.

₂₉Bewerk geen onheil teen jou naaste terwyl hy vol vertroue by jou woon nie.

₃₀Twis nie sonder oorsaak met 'n mens as hy jou geen kwaad gedoen het nie.

₃₁Wees nie afgunstig op 'n man van geweld en verkies geeneen van sy weë nie.

₃₂Want die verkeerde is vir die Here 'n gruwel, maar sy verborgenheid is met die opregtes.

₃₃Die vloek van die Here is in die huis van die goddelose, maar Hy seën die woning van die regverdiges.

₃₄As dit spotters betref, spot Hy, maar aan die ootmoediges gee Hy genade.

₃₅Die wyse sal eer beërwe, maar die dwase behaal skande.