PSALM 108

₁'n LIED. 'n Psalm van Dawid.

₂My hart is gerus, o God! Ek wil sing en psalmsing, ja, ook my eer.

₃Waak op, harp en siter! Ek wil die dageraad wakker maak.

₄Ek wil U loof onder die volke, o Here, en psalmsing tot u eer, onder die nasies;

₅want u goedertierenheid is groot bo die hemel uit en u trou tot by die wolke.

₆Verhef U bo die hemele, o God, en u heerlikheid bo die hele aarde!

₇Dat u bemindes gered kan word — verlos deur u regterhand en verhoor ons!

₈God het gespreek in sy heiligdom: Ek wil jubel, Ek wil Sigem verdeel en die dal van Sukkot afmeet.

₉Gílead is myne, Manasse is myne, en Efraim is die beskutting van my hoof; Juda is my veldheerstaf.

₁₀Moab is my waskom; op Edom werp Ek my skoen; oor Filistéa jubel Ek.

₁₁Wie sal my bring in die versterkte stad? Wie lei my tot in Edom?

₁₂Het U, o God, ons nie verwerp nie? En U trek nie uit, o God, saam met ons leërs nie.

₁₃Gee ons hulp teen die vyand, want die mens se hulp is vergeefse moeite.

₁₄In God sal ons kragtige dade doen, en Hy self sal ons vyande vertrap.