PSALM 111

₁HALLELUJA!

Alef. Ek wil die Here loof van ganser harte; Bet. in die kring van die opregtes en in die vergadering.

₂Gimel. Die werke van die Here is groot; Dalet. nagespeur word hulle deur almal wat daar 'n welbehae in het.

₃He. Sy dade is majesteit en heerlikheid; Wau. en sy geregtigheid bestaan tot in ewigheid.

₄Sajin. Hy het vir sy wonders 'n gedagtenis gestig; Get. die Here is genadig en barmhartig.

₅Tet. Aan die wat Hom vrees, het Hy spys gegee; Jod. Hy dink vir ewig aan sy verbond.

₆Kaf. Hy het die krag van sy werke aan sy volk bekend gemaak, Lamed. deur hulle die erfdeel van die heidene te gee.

₇Mem. Die werke van sy hande is trou en reg; Noen. al sy bevele is betroubaar.

₈Samek. Vasgestel is hulle vir altyd, vir ewig; Ajin. uitgevoer in trou en opregtheid.

₉Pe. Hy het aan sy volk verlossing gestuur; Sade. Hy het sy verbond vir ewig ingestel; Kof. sy Naam is heilig en vreeslik.

₁₀Resj. Die vrees van die Here is die beginsel van die wysheid; Sin. almal wat dit beoefen, het 'n goeie verstand. Tau. Sy lof bestaan tot in ewigheid.