PSALM 115

₁NIE aan ons, o Here, nie aan ons nie, maar aan u Naam gee eer, om u goedertierenheid, om u trou ontwil.

₂Waarom sou die heidene sê: Waar is dan hulle God?

₃terwyl onse God tog in die hemel is; Hy doen alles wat Hom behaag.

₄Hulle afgode is silwer en goud, 'n werk van mensehande.

₅Hulle het 'n mond, maar praat nie; hulle het oë, maar sien nie;

₆ore het hulle, maar hoor nie; hulle het 'n neus, maar ruik nie;

₇hande, maar hulle tas nie; voete, maar hulle loop nie; hulle gee geen geluid deur hul keel nie.

₈Die wat hulle maak, sal net soos hulle word — elkeen wat op hulle vertrou.

₉Israel, vertrou op die Here: Hy is hulle hulp en hulle skild!

₁₀Huis van Aäron, vertrou op die Here: Hy is hulle hulp en hulle skild!

₁₁Julle wat die Here vrees, vertrou op die Here: Hy is hulle hulp en hulle skild.

₁₂Die Here het aan ons gedink: Hy sal seën, Hy sal die huis van Israel seën, Hy sal die huis van Aäron seën.

₁₃Hy sal diegene seën wat die Here vrees, die kleintjies saam met die grotes.

₁₄Die Here sal julle vermenigvuldig, julle en jul kinders.

₁₅Julle is geseënd deur die Here wat hemel en aarde gemaak het.

₁₆Die hemele is hemele vir die Here, maar die aarde het Hy aan die mensekinders gegee.

₁₇Die dode en almal wat na die stilte neerdaal, sal die Here nie loof nie;

₁₈maar óns sal die Here prys, van nou af tot in ewigheid. Halleluja!