PSALM 118

₁LOOF die Here, want Hy is goed, want sy goedertierenheid is tot in ewigheid!

₂Laat Israel dan sê dat sy goedertierenheid tot in ewigheid is!

₃Laat die huis van Aäron dan sê dat sy goedertierenheid tot in ewigheid is!

₄Laat die wat die Here vrees, dan sê dat sy goedertierenheid tot in ewigheid is!

₅Uit die benoudheid het ek die Here aangeroep; die Here het my verhoor in die ruimte.

₆Die Here is vír my; ek sal nie vrees nie: wat kan 'n mens my doen?

₇Die Here is vír my as my helper; so sal ék dan neersien op die wat my haat.

₈Dit is beter om by die Here te skuil as om op mense te vertrou.

₉Dit is beter om by die Here te skuil as om op edeles te vertrou.

₁₀Al die heidene het my omsingel; dit is in die Naam van die Here dat ek hulle stukkend gekap het.

₁₁Hulle het my omsingel, ja, hulle het my omsingel; dit is in die Naam van die Here dat ek hulle stukkend gekap het.

₁₂Hulle het my omsingel soos bye — hulle is uitgeblus soos 'n doringtakvuur; dit is in die Naam van die Here dat ek hulle stukkend gekap het.

₁₃Jy het my hard gestamp om my te laat val, maar die Here het my gehelp.

₁₄Die Here is my sterkte en psalm, en Hy het my tot heil geword.

₁₅'n Stem van gejubel en van heil is in die tente van die regverdiges: die regterhand van die Here doen kragtige dade.

₁₆Die regterhand van die Here verhef; die regterhand van die Here doen kragtige dade.

₁₇Ek sal nie sterwe nie, maar lewe en die werke van die Here vertel.

₁₈Die Here het my hard gekasty, maar my aan die dood nie oorgegee nie.

₁₉Maak oop vir my die poorte van die geregtigheid; ek wil daardeur ingaan, ek wil die Here loof.

₂₀Dit is die poort van die Here; regverdiges mag daardeur ingaan.

₂₁Ek wil U loof, omdat U my verhoor het en my tot heil geword het.

₂₂Die steen wat die bouers verwerp het, het 'n hoeksteen geword.

₂₃Dit het van die Here gekom; dit is wonderbaar in ons oë.

₂₄Dit is die dag wat die Here gemaak het; laat ons daaroor juig en bly wees.

₂₅Ag, Here, gee tog heil; ag, Here, gee tog voorspoed!

₂₆Geseënd is hy wat kom in die Naam van die Here! Ons seën julle uit die huis van die Here.

₂₇Die Here is God, en Hy het vir ons lig gegee. Bind die feesoffer met toue, tot by die horings van die altaar.

₂₈U is my God, en ek wil U loof; o my God, ek wil U verhoog.

₂₉Loof die Here, want Hy is goed, want sy goedertierenheid is tot in ewigheid!