PSALM 140

₁VIR die musiekleier. 'n Psalm van Dawid.

₂Red my, Here, van die kwaaddoeners, bewaar my vir die manne van geweld;

₃wat slegte dinge in die hart bedink, wat elke dag stryd verwek.

₄Hulle maak hul tong skerp soos 'n slang; gif van 'n adder is onder hulle lippe. Sela.

₅Bewaar my, Here, vir die hande van die goddelose; behoed my vir die manne van geweld wat planne beraam om my voete weg te stoot.

₆Trotsaards het vir my 'n vangnet gespan en toue; hulle het 'n net uitgespan aan die kant van die pad; strikke het hulle vir my gestel. Sela.

₇Ek het tot die Here gesê: U is my God; luister tog, Here, na die stem van my smekinge!

₈Here Here, Sterkte van my heil, U beskut my hoof in die dag van stryd!

₉Here, gee tog nie die begeertes van die goddelose nie; laat sy listige plan nie geluk, sodat hulle hul verhef nie. Sela.

₁₀Wat betref die hoof van die wat my omring — laat die onheil van hulle lippe hulle oordek.

₁₁Laat vurige kole op hulle afgegooi word; mag Hy hulle laat val in die vuur, in kuile, sodat hulle nie weer opstaan nie!

₁₂Laat die kwaadspreker nie op aarde bevestig word nie; die man van geweld — laat die ongeluk hom jaag met slag op slag.

₁₃Ek weet dat die Here die regsaak van die ellendige, die reg van die behoeftiges sal behartig.

₁₄Sekerlik, die regverdiges sal u Naam loof, die opregtes sal voor u aangesig woon.