PSALM 141

₁'n PSALM van Dawid.

Here, ek roep U aan; kom tog gou na my toe; luister na my stem as ek U aanroep.

₂Laat my gebed soos reukwerk voor u aangesig staan, die opheffing van my hande soos die aandoffer.

₃Here, stel 'n wag voor my mond, bewaar die deur van my lippe.

₄Neig my hart nie tot iets wat sleg is, om in goddeloosheid dinge te doen saam met manne wat ongeregtigheid werk nie; en laat my van hulle lekkernye nie eet nie.

₅Laat die regverdige my met liefde slaan en my tugtig — hoofsalf sal my hoof nie weier nie; want nog is my gebed teen hulle booshede.

₆As hulle regters aan die kant van die rots afgegooi word, dan sal hulle hoor dat my woorde lieflik is.

₇Soos 'n mens in die aarde vore en skeure trek, is ons beendere gestrooi by die mond van die doderyk.

₈Want op U is my oë, Here Here; by U skuil ek: giet my siel nie uit nie!

₉Bewaar my vir die mag van die vangnet van die wat vir my strikke stel, en vir die strikke van die werkers van ongeregtigheid.

₁₀Laat die goddelose in hulle vangkuile val, almal saam, terwyl ék verbygaan!