PSALM 145

₁'n LOFLIED van Dawid.

Alef. o My God, o Koning, ek wil U verhoog en u Naam loof vir ewig en altyd.

₂Bet. Elke dag wil ek U loof en u Naam prys vir ewig en altyd.

₃Gimel. Die Here is groot en baie lofwaardig, en sy grootheid is ondeurgrondelik.

₄Dalet. Die een geslag prys u werke by die ander, en hulle verkondig u magtige dade.

₅He. Ek wil spreek van die glans van u heerlike majesteit en van u wonderbare dade.

₆Wau. En hulle sal spreek van die krag van u vreeslike dade, en u grootheid wil ek vertel.

₇Sajin. Hulle sal die gedagtenis van u grote goedheid laat uitstroom en jubel oor u geregtigheid.

₈Get. Genadig en barmhartig is die Here, lankmoedig en groot van goedertierenheid.

₉Tet. Die Here is vir almal goed, en sy barmhartighede is oor al sy werke.

₁₀Jod. Al u werke loof U, o Here, en u gunsgenote prys U.

₁₁Kaf. Hulle maak melding van die heerlikheid van u koninkryk en spreek van u mag,

₁₂Lamed. om aan die mensekinders sy magtige dade bekend te maak en die glansryke heerlikheid van sy koninkryk.

₁₃Mem. U koninkryk is 'n koninkryk van alle eeue, en u heerskappy duur deur al die geslagte.

₁₄Samek. Die Here ondersteun almal wat val, en Hy rig almal op wat neergeboë is.

₁₅Ajin. Die oë van almal wag op U, en U gee hulle hul spys op die regte tyd.

₁₆Pe. U maak u hand oop en versadig alles wat lewe met welbehae.

₁₇Sade. Die Here is regverdig in al sy weë en goedgunstig in al sy werke.

₁₈Kof. Die Here is naby almal wat Hom aanroep, almal wat Hom aanroep in waarheid.

₁₉Resj. Hy vervul die wens van die wat Hom vrees, en Hy hoor hul hulpgeroep en verlos hulle.

₂₀Sjin. Die Here bewaar almal wat Hom liefhet, maar Hy verdelg al die goddelose.

₂₁Tau. My mond sal die lof van die Here uitspreek, en laat alle vlees sy heilige Naam loof vir ewig en altyd.