PSALM 27

₁ 'n PSALM van Dawid.

Die Here is my lig en my heil: vir wie sou ek vrees? Die Here is die toevlug van my lewe: vir wie sou ek vervaard wees?

₂As kwaaddoeners teen my nader kom om my vlees te eet — my teëstanders en my vyande, ja, myne — struikel hulle self en val.

₃Al word 'n laer teen my opgeslaan, my hart sal nie vrees nie; al staan 'n oorlog teen my op, nogtans vertrou ek.

₄Een ding het ek van die Here begeer, dit sal ek soek: dat ek al die dae van my lewe mag woon in die huis van die Here, om die lieflikheid van die Here te aanskou en te ondersoek in sy tempel.

₅Want Hy steek my weg in sy hut in die dag van onheil; Hy verberg my in die skuilplek van sy tent; Hy verhef my op 'n rots.

₆En nou sal my hoof hoog wees bo my vyande rondom my, en ek wil in sy tent offerandes offer saam met trompetgeklank; ek wil sing, ja, psalmsing tot eer van die Here.

₇Hoor, o Here, ek roep luid; en wees my genadig en antwoord my.

₈Van U sê my hart: Soek my aangesig! Ek soek u aangesig, o Here!

₉Verberg u aangesig nie vir my nie, wys u kneg nie af in toorn nie: U was my hulp! Verstoot en verlaat my nie, o God van my heil!

₁₀Want my vader en my moeder het my verlaat, maar die Here sal my aanneem.

₁₁Here, leer my u weg en lei my op 'n gelyk pad, vanweë my vyande.

₁₂Gee my nie oor aan die begeerte van my teëstanders nie, want valse getuies het teen my opgestaan, en hy wat geweld uitblaas.

₁₃o, As ek nie geglo het dat ek die goedheid van die Here sal sien in die land van die lewendes nie ...

₁₄Wag op die Here! Wees sterk en laat jou hart sterk wees! Ja, wag op die Here!