PSALM 29

₁'n PSALM van Dawid.

Gee aan die Here, o hemelinge, gee aan die Here eer en sterkte!

₂Gee aan die Here die eer van sy Naam; aanbid die Here in heilige sieraad!

₃Die stem van die Here is op die waters, die God van eer donder; die Here is op die groot waters.

₄Die stem van die Here is met krag; die stem van die Here is met heerlikheid.

₅Die stem van die Here breek seders; ja, die Here verbreek die seders van die Líbanon;

₆en Hy laat hulle opspring soos 'n kalf, die Líbanon en Sirjon soos 'n jong buffel.

₇Die stem van die Here slaan daar vuurvlamme uit.

₈Die stem van die Here laat die woestyn bewe; die Here laat die woestyn van Kades bewe.

₉Die stem van die Here laat die takbokke lam en maak die bosse kaal; maar in sy paleis sê elkeen: Heerlikheid!

₁₀Die Here het gesit oor die Watervloed; ja, die Here sit as Koning tot in ewigheid.

₁₁Die Here sal sy volk sterkte gee, die Here sal sy volk seën met vrede.