PSALM 30

₁'n PSALM, 'n lied by die inwyding van die Huis. Van Dawid.

₂Ek sal U verhoog, Here, want U het my opgetrek en my vyande oor my nie laat bly wees nie.

₃Here, my God, ek het U aangeroep om hulp, en U het my gesond gemaak.

₄Here, U het my siel uit die doderyk laat opkom; U het my lewend gemaak uit die wat in die kuil neerdaal.

₅Psalmsing tot eer van die Here, o sy gunsgenote, en loof sy heilige gedenknaam;

₆want 'n oomblik is daar in sy toorn, 'n lewe in sy goedgunstigheid; saans vernag die geween, maar smôrens is daar gejuig.

₇Ek het wel in my sorgeloosheid gesê: Ek sal vir ewig nie wankel nie.

₈Here, U het my berg deur u welbehae sterk laat staan. U het u aangesig verberg — ek het verskrik geword!

₉Ek het U aangeroep, Here, en ek het die Here gesmeek:

₁₀Watter voordeel is daar in my bloed as ek neerdaal in die kuil? Sal die stof U loof? Sal dit u trou verkondig?

₁₁Hoor, Here, en wees my genadig! Here, wees my 'n helper!

₁₂U het my weeklag vir my verander in 'n koordans, U het my roukleed losgemaak en my met vreugde omgord;

₁₃sodat my eer U kan besing en nie swyg nie. Here, my God, vir ewig sal ek U loof.