PSALM 32

₁ 'n PSALM van Dawid; 'n onderwysing.

Welgeluksalig is hy wie se oortreding vergewe, wie se sonde bedek is.

₂Welgeluksalig is die mens aan wie die Here die ongeregtigheid nie toereken nie en in wie se gees geen bedrog is nie.

₃Toe ek geswyg het, het my gebeente uitgeteer in my gebrul die hele dag;

₄want u hand was dag en nag swaar op my; my murg het verander soos deur somergloed. Sela.

₅My sonde het ek U bekend gemaak, en my ongeregtigheid het ek nie bedek nie. Ek het gesê: Ek wil aan die Here my oortredinge bely; en Ú het die ongeregtigheid van my sonde vergewe. Sela.

₆Daarom sal elke vrome U aanbid in 'n tyd as U te vinde is; ja, by 'n oorstroming van groot waters sal hulle nie aan hom raak nie.

₇U is 'n skuilplek vir my; U bewaar my vir benoudheid; U omring my met vrolike gesange van bevryding. Sela.

₈Ek wil jou onderrig en jou leer aangaande die weg wat jy moet gaan; Ek wil raad gee; my oog sal op jou wees.

₉Wees nie soos 'n perd, soos 'n muilesel wat geen verstand het nie, wat 'n mens moet tem met toom en teuel as sy tuig, anders kom hy nie naby jou nie.

₁₀Die goddelose het baie smarte, maar hy wat op die Here vertrou — met goedertierenheid sal Hy hom omring.

₁₁Wees bly in die Here en juig, o regverdiges! En jubel, alle opregtes van hart!