PSALM 6

₁VIR die musiekleier; met snaarinstrumente; met basstem. 'n Psalm van Dawid.

₂o Here, straf my nie in u toorn nie, en kasty my nie in u grimmigheid nie.

₃Wees my genadig, Here, want ek is verswak; maak my gesond, Here, want my gebeente is verskrik.

₄Ja, my siel is baie verskrik; en U, Here, tot hoe lank?

₅Keer terug, Here, red my siel; verlos my om u goedertierenheid ontwil.

₆Want in die dood word aan U nie gedink nie; wie sal U loof in die doderyk?

₇Ek is moeg van my gesug; elke nag laat ek my bed swem; ek deurweek my bed met my trane.

₈My oog het dof geword van verdriet; dit het swak geword vanweë al my teëstanders.

₉Gaan weg van my, al julle werkers van ongeregtigheid, want die Here het die stem van my geween gehoor.

₁₀Die Here het my smeking gehoor; die Here neem my gebed aan.

₁₁Al my vyande sal beskaamd staan en baie verskrik word; hulle sal in 'n oomblik beskaamd omdraai.