PSALM 61

₁VIR die musiekleier; met snaarinstrumente. 'n Psalm van Dawid.

₂o God, hoor my smeking, luister na my gebed!

₃Van die einde van die aarde af roep ek U aan as my hart beswyk; lei my op 'n rots wat vir my te hoog is.

₄Want U het 'n toevlug vir my geword, 'n sterk toring teen die vyand.

₅Ek wil in u tent vertoef vir ewig, in die skuilplek van u vleuels my verberg. Sela.

₆Want U, o God, het my geloftes gehoor; U het die besitting gegee van die wat u Naam vrees.

₇Mag U dae by die koning se dae byvoeg; mag sy jare wees soos van geslag tot geslag.

₈Mag hy vir ewig voor die aangesig van God op die troon sit; beskik goedertierenheid en trou, dat dié hom bewaar.

₉Só wil ek psalmsing tot eer van u Naam tot in ewigheid, om my geloftes te betaal, dag ná dag.