PSALM 83

₁'n LIED. 'n Psalm van Asaf.

₂o God, hou U nie stil nie, swyg nie en rus nie, o God!

₃Want kyk, u vyande maak rumoer, en u haters steek die hoof op.

₄Teen u volk smee hulle listig 'n plan en hou onder mekaar raad teen u verborgenes.

₅Hulle sê: Kom, laat ons hulle vernietig, dat hulle geen volk meer is nie, sodat aan die naam van Israel nie meer gedink word nie.

₆Want hulle het van harte saam raad gehou; teen U sluit hulle 'n verbond:

₇die tente van Edom en die Ismaeliete, Moab en die Hagareners,

₈Gebal en Ammon, en Ámalek, Filistéa saam met die inwoners van Tirus.

₉Ook het Assur by hulle aangesluit; hulle is 'n arm vir die kinders van Lot. Sela.

₁₀Maak met hulle soos met Mídian, soos met Sísera, soos met Jabin by die spruit Kison:

₁₁hulle is verdelg by En-Dor, hulle het mis geword vir die grond.

₁₂Maak hulle, hul edeles, soos Oreb en Seëb, en al hulle vorste soos Seba en Sálmuna,

₁₃wat sê: Laat ons die woninge van God vir ons in besit neem!

₁₄My God, maak hulle soos strooi, soos stoppels voor die wind.

₁₅Soos vuur wat 'n bos verbrand, en soos die vlam wat berge aan die brand steek —

₁₆vervolg hulle só met u storm en verskrik hulle met u stormwind.

₁₇Oordek hulle aangesig met skande, dat hulle u Naam kan soek, o Here!

₁₈Laat hulle beskaamd staan en verskrik wees vir ewig, en laat hulle rooi van skaamte word en omkom;

₁₉sodat hulle kan weet dat U, wie se Naam Here is, alleen die Allerhoogste is oor die hele aarde.