PSALM 89

₁'n ONDERWYSING van Etan, die Esrahiet.

₂Die goedertierenhede van die Here wil ek vir ewig besing; ek wil u trou bekend maak met my mond van geslag tot geslag.

₃Want ek het gesê: Goedertierenheid sal vir ewig gebou word; in die hemele — daar bevestig U u trou.

₄Ek het 'n verbond gesluit met my uitverkorene, met 'n eed aan Dawid, my kneg, belowe:

₅Tot in ewigheid sal Ek jou nageslag bevestig en jou troon opbou van geslag tot geslag. Sela.

₆En die hemele loof u wondermag, o Here, ook u trou in die vergadering van die heiliges.

₇Want wie kan in die hemel met die Here vergelyk word? Wie is soos die Here onder die hemelinge,

₈'n God grootliks gedug in die raad van die heiliges en vreeslik bo almal wat rondom Hom is?

₉o Here, God van die leërskare, wie is soos U? Grootmagtig is U, o Here, en u trou is rondom U!

₁₀Ú heers oor die trotsheid van die see; as sy golwe hulle verhef, bring Ú hulle tot bedaring.

₁₁Ú het Rahab verbrysel soos een wat verslaan is, met u sterke arm u vyande verstrooi.

₁₂Aan U behoort die hemel, aan U ook die aarde; die wêreld en sy volheid — Ú het dit gegrond.

₁₃Die noorde en die suide — Ú het dit geskape; Tabor en Hermon jubel in u Naam.

₁₄U het 'n arm met mag; u hand is sterk, u regterhand verhewe.

₁₅Geregtigheid en reg is die grondslag van u troon; goedertierenheid en trou gaan voor u aangesig uit.

₁₆Welgeluksalig is die volk wat die geklank ken; o Here, hulle wandel in die lig van u aangesig.

₁₇In u Naam juig hulle die hele dag, en deur u geregtigheid word hulle verhef.

₁₈Want U is hulle magtige sieraad, en deur u welbehae word ons horing verhef.

₁₉Want aan die Here behoort ons skild, en ons koning aan die Heilige van Israel.

₂₀Toe het U in 'n gesig gespreek met u gunsgenoot en gesê: Ek het hulp verleen aan 'n held, 'n uitverkorene uit die volk verhef.

₂₁Ek het Dawid, my kneg, gevind, met my heilige olie hom gesalf,

₂₂met wie my hand bestendig sal wees; ook sal my arm hom versterk.

₂₃Die vyand sal hom nie oorval en die kwaaddoener hom nie verdruk nie;

₂₄maar Ek sal sy teëstanders voor hom weg verpletter; en die wat hom haat, sal Ek verslaan.

₂₅En my trou en my goedertierenheid sal met hom wees, en deur my Naam sal sy horing verhef word.

₂₆En Ek sal sy hand lê op die see en sy regterhand op die riviere.

₂₇Hy is dit wat My sal noem: U is my Vader, my God en die rots van my heil!

₂₈Ja, Ék sal hom 'n eersgeborene maak, die hoogste onder die konings van die aarde.

₂₉Vir ewig sal Ek my goedertierenheid vir hom bewaar, en my verbond bly vir hom vas.

₃₀En Ek sal sy nageslag vir ewig laat duur en sy troon soos die dae van die hemel.

₃₁As sy kinders my wet verlaat en in my regte nie wandel nie;

₃₂as hulle my insettinge ontheilig en my gebooie nie hou nie,

₃₃dan sal Ek hulle oortreding met die roede besoek en met plae hulle ongeregtigheid.

₃₄Maar my goedertierenheid sal Ek van hom nie wegneem en my trou nie verbreek nie.

₃₅Ek sal my verbond nie ontheilig nie, en wat oor my lippe gegaan het, sal Ek nie verander nie.

₃₆Een maal het Ek gesweer by my heiligheid: Waarlik, Ek sal vir Dawid nie lieg nie!

₃₇Sy nageslag sal vir ewig wees en sy troon soos die son voor My.

₃₈Soos die maan sal hy vir ewig vasstaan, en die getuie in die hemel is getrou. Sela.

₃₉Maar U het self verstoot en verag, U het toornig geword teen u gesalfde.

₄₀U het die verbond van u kneg tot niet gemaak, U het sy kroon ontheilig teen die grond.

₄₁U het al sy mure stukkend gebreek, sy vestings 'n puinhoop gemaak.

₄₂Almal wat met die pad verbygaan, het hom beroof; vir sy bure het hy 'n smaad geword.

₄₃U het die regterhand van sy teëstanders verhef, al sy vyande bly gemaak.

₄₄Ook het U die skerpte van sy swaard laat omdraai en hom nie laat standhou in die geveg nie.

₄₅U het aan hom sy glans onttrek en sy troon teen die grond neergewerp.

₄₆U het die dae van sy jeug verkort, hom met skaamte oordek. Sela.

₄₇Hoe lank sal U, o Here, Uself vir altyd verberg, sal u grimmigheid brand soos 'n vuur?

₄₈Gedenk van watter lewensduur ek is, tot watter nietigheid U al die mensekinders geskape het!

₄₉Watter mens leef daar wat die dood nie sal sien nie, wat sy siel sal kan red uit die mag van die doderyk? Sela.

₅₀Here, waar is u vorige goedertierenhede wat U aan Dawid met 'n eed beloof het in u trou?

₅₁Gedenk, Here, die smaad van u knegte, hoe ek in my boesem dra die smaad van al die baie volke,

₅₂waarmee u vyande, o Here, smaad, waarmee hulle die voetstappe van u gesalfde smaad.

₅₃Geloofd sy die Here vir ewig! Amen, ja amen.