1 KORONIKA 27

₁Še palo ya Baisiraele ge go iwa ka bagolo ba meloko, le ka balaolasekete le balaolalekgolo, le balaki ba bona ba ba bego ba dirišana le kgoši ditabeng ka moka tša diphohla tša dira, tše di bego di šielana modiro ka dikgwedi tša ngwaga ka moka. Sephohla ka setee se be se na le banna ba dikete tše masome a mabedi a metšo e mene.

₂Molaki wa sephohla sa pele sa kgwedi ya pele e be e le Jesobeama morwa wa Sabadiele; sephohla sa gagwe se be se na le banna ba dikete tše masome a mabedi a metšo e mene. ₃Yena e be e le wa leloko la Pheretse, molaki wa balaodi ka moka ba dira tša kgwedi ya pele. ₄Molaki wa sephohla sa kgwedi ya bobedi e be e le Dodai wa Ahohi; moetapele wa sephohla sa gagwe e be e le Mikilothe; sephohla sa gagwe se be se na le banna ba dikete tše masome a mabedi a metšo e mene. ₅Molaodi wa boraro wa dira e be e le Banya morwa wa Joyada moperisita; e be e le mokgoma; gomme sephohla sa gagwe se be se na le banna ba dikete tše masome a mabedi a metšo e mene. ₆Ke yena Benaya yola e bego e le mogale wa ba masome a mararo, e le molaodi wa bona. Sephohla sa gagwe, se be se etwa pele ke Amisabadi morwa wa gagwe. ₇Wa bone wa kgwedi ya bone e be e le Asahele monnago Joaba; a hlatlangwa ke morwa wa gagwe; sephohla sa gagwe se be se na le banna ba dikete tše masome a mabedi a metšo e mene. ₈Wa bohlano wa kgwedi ya bohlano e be e le mokgoma Samahuti wa Jisira; sephohla sa gagwe se be se na le banna ba dikete tše masome a mabedi a metšo e mene. ₉Wa go selela wa kgwedi ya go selela e be e le Ira morwa wa Ikese wa Thekoa; sephohla sa gagwe se be se na lebanna ba dikete tše masome a mabedi a metšo e mene. ₁₀Wa go šupa wa kgwedi ya go šupa e be e le Heletse wa Peloni wa gaEfuraimi; sephohla sa gagwe se be se na le banna ba dikete tše masome a mabedi a metšo e mene. ₁₁Wa seswai wa kgwedi ya seswai e be e le Sibekai wa Husa wa ga Serehi; sephohla sa gagwe se be se na le banna ba dikete tše masome a mabedi a metšo e mene. ₁₂Wa senyane wa kgwedi ya senyane e be e le Abiesere wa Anathothe wa gaBenyamini; sephohla sa gagwe se be se na le banna ba dikete tše masome a mabedi a metšo e mene. ₁₃Wa lesome wa kgwedi ya lesome e be e le Mahari wa Netofa wa gaSarehi; sephohla sa gagwe se be se na le banna ba dikete tše masome a mabedi a metšo e mene. ₁₄Wa lesome le motšo o tee wa kgwedi ya lesome le motšo o tee e be e le Benaya wa Pirathoni wa ba gaEfuraimi; sephohla sa gagwe se be se na le banna ba dikete tše masome a mabedi a metšo e mene. ₁₅Wa lesome le metšo e mebedi wa kgwedi ya lesome le metšo e mebedi e be e le Heledai wa Netofa wa ba ga Othiniele; sephohla sa gagwe se be se na le banna ba dikete tše masome a mabedi a metšo e mene.

₁₆Ba ba bego ba beilwe go buša meloko ya Isiraele šeba: Mmuši wa Barubeni e be e le Eliesere morwa wa Sikiri. Mmuši wa Basimeone e be e le Sefatya morwa wa Maaka; ₁₇wa Balefi e be e le Hasabya morwa wa Kemuele; wa ba ga Arone e be e le Tsadoko. ₁₈Wa Bajuda e be e le Elihu e mongwe wa bana babo Dafida; wa Baisashara e be le Omiri morwa wa Mikaele. ₁₉Wa Basebulone e be e le Jisimaya morwa wa Obadya; wa Banafutali e be e le Jerimothe morwa wa Asiriele. ₂₀Wa Baefuraimi e be e le Hosea morwa wa Asasia; wa seripa sa leloko la Bamanase e be e le Joele morwa wa Pedaya. ₂₁Wa seripa se sengwe sa leloko la Bamanase sa kua Gileada e be e le Ido morwa wa Sekaria; wa Babenyamini e be e le Jaasiele morwa wa Abinere. ₂₂Badani e be e le Asariele morwa wa Jerohama. Ke bona bakgoma ba meloko ya Isiraele.

₂₃Ge e le palo ya ba nywaga e masome a mabedi fela, le ya bao ba ba hlatlamago, yona Dafida ga a ka a e nyaka, gobane Morena o boletše a re o tlo atiša Baisiraele bjalo ka dinaledi tša legodimo. ₂₄Joaba morwa wa Tseruya o kile a thoma go bala setšhaba, fela ga a ka a se fetša ka ge kotlo e wetše Isiraele. Ke ka baka leo palo e sa kago ya tsena pukung ya ditaba tša kgale tša kgoši Dafida.

₂₅Asimafethe morwa wa Adiele o be a beilwe a ba molaki wa mahumo a kgoši. Jonathane morwa wa Usia e be e le molaki wa mahumo a mašemong, le metseng, le mo dileteng, le mo dibong. ₂₆Esiri morwa wa Kelube e be e le molaki wa ba ba dirago mašemong le ba ba lemago. ₂₇Simei wa Rama e be e le molaki wa dirapa tša merara; Sabadi wa Sifima e be e le molaki wa ge merara o fotlwa le wa dinkgo tša wona. ₂₈Molaki wa mehlware le mego ya molaleng wa Jorodane e be e le Baali Hanani wa Gedere; wa dipolokelo tša makhura e be e le Joase. ₂₉Molaki wa dikgomo tša mafulong a kua Sarona e be e le Sitirai wa Sarona; Safate morwa wa Adilai e be e le molaki wa dikgomo tša mono meeding. ₃₀Molaki wa dikamela e be e le Obila Moisimaele; wa dipokolo e be e le Jehedia wa Merone. ₃₁Dihuswana di be di lakiwa ke Jasisi wa Hageri. Bao ka moka e be e le bagolo ba balaki ba maruo a kgoši Dafida.

₃₂Jonathane malome wa Dafida e be e le letona la mošate, monna wa tlhaologanyo le mongwadi; Jehiela morwa wa Hakimoni o be a dula le bana ba kgoši. ₃₃Ahitofele e be e le moeletši wa kgoši; Husai wa Araki e be e le mogwera wa kgoši. ₃₄Ahitofele o latetšwe ke Joyada morwa ba Benaya, le Abyathara, ya ba bona baeletši. Molaodi wa madira a kgoši e be e le Joaba.