1 BAKORINTHE 2

₁Le nna, bana bešo, mola ke etla go lena ga nka ka tla ka bonatla bja polelo le bohlale ge ke le tsebiša bohlatse bja Modimo. ₂Gobane ga nka ka itshema matsebe wa selo, ge e se Kriste, ke bolela yena Mmapolwa. ₃Ke be ke na le lena ke fokola, ke boifa, ke tšhogile gagolo. ₄Gomme thuto ya ka le polelo ya ka e be e se tša go fenya ka mantšu a bohlale bja batho, e be e le go hlatselwa ke Moya le tiro tše maatla; ₅gore tumelo ya lena e se ke ya ema ka bohlale bja batho, e eme ka maatla a Modimo.

₆Bjona bohlale re bo bolela mo go baphethegi. Ga se bohlale bja ba mehla yeno le bja bagolo ba mehla yeno ba ba hwago. ₇Bohlale bjo re bo bolelago ke bja Modimo, ke bjo bo bego bo utilwe, bjo Modimo a bego a bo tseba mola mabaka a bogologolo a sešo a ba gona, ge a re o tlo re iša letagong. ₈Ke bohlale, bjo go sego mogolo wa mabaka ano a bo tsebilego; gobane ge ba ka be ba bo tsebile, ba ka be ba sa ka ba bapola Morena wa letago. ₉Ke bjo bo ngwadilwego bja thwe: Tše Modimo a di lokišeditšego ba ba mo ratago, ke tše di sešogo tša bonwa ke leihlo, ke tše go sego tsebe ye e di kwilego ke tše pelong ya motho di sešogo tša tsena. ₁₀Mme rena, Modimo o re utolletše tšona ka Moya wa gagwe; gobane Moya o fenyeka tšohle, le ona madiba a diphiri tša Modimo. ₁₁Gobane tša mothong, mo go batho ke mang a kago di hlatha, ge e se moya wa motho? Le tša Modimo, ga go motho e a di hlathago, ge e se Moya wa Modimo. ₁₂Gomme rena ga ra fiwa moya wa lefase; re filwe Moya o tšwago go Modimo, gore re tle re tsebe tše Modimo a re seditšego ka tšona.

₁₃Ke tšona tše re di bolelago, e sego ka dipolelo tša thuto ya mahlale a batho; rena re bolela tše Moya o di rutago, re latišiša tša Moya ka Moya. ₁₄Ge e le motho ka setho sa gagwe, tša Moya wa Modimo ga a di fihlele; o hwetša e le bošilo; ga a kgone go di lemoga, gobane di hlathwa ka mokgwa wa Moya. ₁₅Motho wa Moya o tla di hlatha tšohle, yena mong a sa hlathwe ke motho. ₁₆Gobane kelelo ya Morena e tsebilwe ke mang? Moeletši wa gagwe ke mang? Gomme rena re na le kelelo ya Kriste.