Baaroši. Leratano
1Barategi! Le se ke la fo dumela meoya ka moka; sa lena a e be go lekola meoya, gore le bone ge e tšwa go Modimo; gobane lefase le hlasetšwe ke baporofeta ba bantši ba maaka. 2Se le tlogo tseba Moya wa Modimo ka sona, sese: Moya o bolago Jesu Kriste wa re o tlile a ba motho, -- ke Moya wo o tšwago go Modimo. 3Fela, moya wo o sa bolelego Kriste wa re o tlile a ba motho, ga se moya wo o tšwago go Modimo; ke wona moya wa molwalekriste, yo le mo kwelego gore o etla, gomme le bjale o šetše a le gona lefaseng.
4Bana ba ka! Lena le bana ba ba tswetšwego ke Modimo, gomme batho bao le ba fentše; gobane Walena o feta eo wa lefase ka bogolo. 5Bona ke bana ba ba tswetšwego ke lefase; ke gona ba bolelago tše di tšwago lefaseng; mme lefase le a ba kwa. 6Rena re ba go tswalwa ke Modimo. E a tsebago Modimo o a re kwa. Gomme e a sa kago a tswalwa ke Modimo, ga a re kwe. Ke sona se re hlaologanyago meoya ka sona, ra tseba moya wa therešo, ra tseba moya wa go fora.
7Barategi! A re rataneng, gobane, lerato le tšwa go Modimo. Gomme e a nago le lerato o tšwa go Modimo, mme o tseba Modimo. 8E a se nago lerato ga a tsebe Modimo, gobane Modimo ke yena lerato. 9Lerato la Modimo le a re ratilego ka lona, le bonagetše ka ge a roma Morwa wa gagwe Motswalwaeši, a tla lefaseng gore re phele ka yena. 10Lerato ge le le gona, ga se ka gore ke rena re ratilego Modimo; ke ka ge yena a re ratile a roma Morwa wa gagwe, a ba seloba sa dibe tša rena.
11Barategi! Ge Modimo a re ratile ka mokgwa woo, gona go swanetše ge re ratana. 12Ga go motho e a kilego a bona Modimo le gatee. Ge re ratana ke gona ge Modimo a dula a le mo go rena, mme lerato la gagwe mo go rena ya ba le le tletšego.
13Se re tsebago ka sona ge re dula re le ba gagwe, mme yena e le wa rena, ke ge a re file Moya wa gagwe, 14ya ba rena re bonego ra tsebo ba dihlatse tša ge Tata wešo a romile Morwa wa gagwe, a tla a ba Mophološi wa lefase. 15Bjale e a emago ka la go re: Jesu ke Morwa wa Modimo, -- Modimo o tlo dula e le wa gagwe, mme yena a dula e le wa Modimo. 16Gomme rena, lerato leo Modimo a re ratago ka lona re le lemogile, re le dumetše.
Modimo ke yena lerato; gomme e a dulago e le wa lerato, o dula e le wa Modimo, mme Modimo o dula e le wa gagwe. 17Mo go rena lerato e bile la botlalo, gore mohla wa kahlolo re be le kholofelo ye e tiilego, ka gobane re ba ba swanago le yena mo lefaseng leno. 18Lerato ga le na poifo. Lerato ge e le la botlalo le raka poifo; gobane poifo e a hlokofatša; mme e a boifago o sa hlaelwa ke lerato.
19Rena a re mo rateng, gobane o re ratile pele. 20Ge motho a ka re: Ke rata Modimo, -- mme a hloile ngwanabo, ke wa maaka; gobane e a sa ratego ngwanabo yo a mmonago, a a ka kgona go rata Modimo yo a sa mmonego? 21Gomme molao wo re o filwego ke yena, o re: E a ratago Modimo a rate le ngwanabo.
