1 DIKGOŠI 6

₁Salomo o thomile go aga Ngwako wa Morena ka ngwaga wa makgolo a mane le masome a seswai wa ge go balwa nywaga go tloga mola Baisiraele ba tšwele Egipita, ka ngwaga wa bone wa ge Salomo a buša Isiraele ka kgwedi ya Sifi, e lego ya bobedi. ₂Ngwako wo kgoši Salomo a o agetšego Morena, botelele bja wona e be e le meelo e masome a selelago; bophara e be e le meelo e masome a mabedi; leemo e be e le meelo e masome a mararo. ₃Mathudi a mojako wa Ntlokgethwa a be a lekana le bophara bja ngwako; sebeka sa ona go tloga mojakong e be e le meelo e lesome. ₄Leboto la Ngwako a le direla maroba a dijakwane le diferwana. ₅Leboto ka ntle a le dikološa ka nywakwana ya mathudi e kgotlanego le leboto thoko tšohle tša Ntlokgethwa le tša Ngwako wa ka gare. ₆Nywakwana ya ka tlase e be e na le bophara bja meelo e mehlano; ya godimo ga yona bophara e be e le meelo e selelago; ya godimodimo bophara e be e le meelo e šupago; ya thekgwa ka mebotwane ya mo lebotong, gwa se be le patlha e tsenego lebotong.

₇Ge go agiwa ngwako wo, maswika a tlišitšwe a betlilwe kua a epilwego gona, gwa se ke gwa kwala noto le selepe le ge e le tshipi mo moagong.

₈Mojako wa nywakwana ya mathudi o be o le ka thoko ya borwa ya Ntlo. Kua nywakwaneng ya godimo le ya godimodimo go be iwa ka manamelo. ₉Ya re ge ntlo e fedile go agwa ka mokgwa wo, ya bewa hlaka ka dikota le ka mamati a morokwana. ₁₀Nywakwana ya mathudi e bego e dikologa le Ntlo, leemo e be e le meelo e mehlano. E be e swaragane le leboto ka dikota tša morokwana.

₁₁Gomme Lentšu la Modimo la tlela Salomo la re: ₁₂Ge e le Ntlo ye o e agago, -- e tlo re ge o swara ka tsela ya melao ya ka, wa hlokomela tšohle tše ke laetšego gore di latelwe, gona ke tlo phetha se ke se boditšego Dafida tatago. ₁₃Ke tlo dula ke le gara Baisiraele, ka se ke ka tlogela setšhaba sa ka sa Isiraele.

₁₄Gomme Salomo a aga Ngwako woo a ba a o phetha.

₁₅A aga maboto a Ngwako, ka mo gare a a manega ka dimati tša morokwana go tloga lebatong go fihla dikwateng tša hlaka. Lebato la ka Ngwakong a le dira ka dimati tša mogobogobo. ₁₆Le leboto la ka nthago a le manega ka dimati tša morokwana sebaka sa meelo e masome a mabedi go tloga lebatong go fihla dikwateng tša hlaka; ya ba Ngwako wa ka gare wa sekgethwakgethwa. ₁₇Ge e le Ngwako wa ka mono wa meelo e masome a mane e be e le wona o mogolo wa sekgethwa. ₁₈Mamati a morokwana a lebotong a be a setilwe diswantšho tša dienywa le matšoba; leboto ka moka e be e le la dimati tša morokwana, maswika a sa bonale.

₁₉Phapoši ya sekgethwakgethwa ya ka gare o e diretše go bea polokelo ya kgwerano ya Morena ntshe. ₂₀Sekgethwakgethwa se, bophara le botelele leemo e be e le meelo e masome a mabedi. Maboto ka moka a gona a a manega ka gautatshekegi; le aletare ya dimati tša morokwana a e manega ka yona. ₂₁Le ngwako ka moka ka gare a o manega ka gautatshekegi; sekgethwakgethwa a se šira ka lešira le le fegilwego ka mekgoko ya gauta. ₂₂Gomme Ngwako ka moka a o manega ka gauta mo go fela; le aletare ka moka ya sekgethwa a e manega ka gauta.

₂₃Mo sekgethwakgethweng a dira Bakerubi ba babedi ka mohlware ba leemo la meelo e lesome. ₂₄Lefego letee la Mokerube e be e le meelo e mehlano; go tloga ntlheng ya lefego leno go fihla ntlheng ya lela ya ba meelo e lesome. ₂₅Le Mokerube wa bobedi a elwa ka meelo yeo, ba babedi ya ba tekanyo e tee le lebopo letee. ₂₆Le leemo la yono le la yola e be e le meelo e lesome. ₂₇Bakerubi bao a ba bea mo Ngwakong wa gare. Ba be ba phurolotše diphego tša bona; ntlha ya lefego la yono la kgotla leboto, le ntlha ya lefego la yola la kgotla leboto; ka gare gwa kgotlana dintlha tša diphego tša ka gare. ₂₈Bakerubi bao ba be ba manegilwe ka gauta.

₂₉Mabotong ka moka thoko tšohle go be go setilwe diswantšho tša Bakerubi, le tša dihlare tša melala, le tša matšoba. ₃₀Le lebato la Ngwako wa ka gare le ka mono mojako, a le manega ka gauta.

₃₁Mojako wa sekgethwakgethwa a o direla mamati a mohlware; dijakwane tša mojako tša betlwa tša ba le mekokotlo e mehlano. ₃₂Mamati a mabedi e be e le mohlware, a setwa diswantšho tša Bakerubi, le tša dihlare tša melala, le tša matšoba, a a manega ka gauta, le diswantšho tša Bakerubi le tša dihlare a di manega ka gauta. ₃₃Le mo mojakong wa ngwako o mogolo a dira ka mokgwa woo; dijakwane ya ba tša mohlware, tša betlwa tša ba le mekokotlo e mene. ₃₄Mamati ona e be e le a mogobogobo, a mabedi, ao leno le bego le bulegela thoko ya lona, le lela la bulegela thoko ya lona. ₃₅Mo go ona gwa setwa diswantšho tša Bakerubi, le tša dihlare tša melala, le tša matšoba, tša manegwa ka gauta ka go ya ka meseto ya tšona.

₃₆A aga lapa la gare ka maswika a betlilwego, a a hlatlaganya ka metato e meraro le ka motato o tee wa dikota tša morokwana.

₃₇Motheo wa Ngwako wa Morena o beilwe ka ngwaga wa bone ka kgwedi ya Sifi. ₃₈Ka ngwaga wa lesome le motšo o tee ka kgwedi ya Bulu, e lego ya seswai, Ngwako wa phethwa ka gohle le ka mo go swanetšego. O o agile ka nywaga e šupago.