Dafida o gwerana le Jonathane; o hloiwa ke Saulo
1Ya re ge Dafida a feditše go bolela le Saulo, pelo ya Jonathane ya gomarelana le ya Dafida; Jonathane a mo rata bjalo ka ge a rata pelo ya gagwe. 2Mohla woo Saulo a mo tšea, a se hlwe a mo lesa a boela ga gabo, 3Jonathane a dira kgwerano le Dafida, ka gobane a mo rata bjalo ka ge a rata pelo ya gagwe. 4Jonathane a apola kobo ya gagwe ye a bego a apere yona, a e nea Dafida, a mo nea le diaparo tša gagwe, le tšhoša ya gagwe, le bora bja gagwe, le moketwana wa gagwe. 5Dafida a tšwela mo gohle mo Saulo a bego a mo roma, a dira ka bohlale. Saulo a mmea ya ba molaodi wa bahlabani, a ratega mo bathong ka moka le go bahlanka ba Saulo.
6Bjale gwa re ge ba goroga, mola Dafida a sa tšo bolaya Mofilisita yola, basadi ba tšwa mo metseng ya Isiraele ka moka, ba hlakanetša kgoši Saulo ka dikoša le ka dipina, ka meropa le ka mekgolokwane le ka diletšo. 7Basadi ba tšama ba opa ba hlatlolana, ba re: Saulo o hlaba ba gagwe ba sekete. Dafida ba gagwe ke kete tše lesome. 8Ya ba mo Saulo a befetšwego gagolo, mme taba ye ya mo senya pelo, a re: Dafida ba mo nea ba dikete tše lesome; nna ba nnea sekete setee fela; ba tlo tloga ba re: le bogoši ke bja gagwe. 9Mohla woo ke mo Saulo a thomilego go gerula Dafida.
10Ka la ka moswana Saulo a tlelwa ke moya o mobe o tšwago go Modimo a gafa a le ka ngwakong. Dafida a letša seletšo ka mokgwa wa ka mehla; gomme Saulo o be a swere lerumo ka seatla. 11A le betša a re ke pataganya Dafida le leboto; Dafida a efa, a dira gabedi.
12Gomme Saulo o be a boifa Dafida, ka gobane Morena o be a ema le Dafida; gomme Saulo o be a lahlilwe ke Morena. 13Bjale Saulo a re Dafida a široge; gomme a mo dira molaodi wa ba sekete. Dafida a ba wa go tšwa dira a di etile pele. 14Gomme Dafida mo ditseleng tša gagwe a ba le mahlatse ka ge Morena a ema le yena. 15Bjale Saulo ge a bona a na le mahlatse a magolo, a dula a mo tšhogile. 16Ge e le Baisiraele le Bajuda ka moka ba be ba rata Dafida, ka gobane e be e le yena a tšwago nabo, mme a ba goroše a ba etile pele.
17Gomme Saulo a bolela le Dafida a re: Tseba gore ke tlo go nea Meraba, morwedi wa ka e mogolo, e be mosadi wa gago. O fele o dira senna; o hlabane ditlhabano tša Morena. Ge e le mo pelong gona o be a re: Dafida a se bolawe ke seatla sa ka, e be diatla tša Bafilisita.
18Dafida a fetola a re: Ke nna mang? Bophelo bja ka ke eng? Le moloko wa tate mo go Isiraele ke selo mang ge nka ba mokgonyane wa kgoši? 19Ya re ge go tlile lebaka la gore Merabe morwedi wa Saulo a tšewe ke Dafida, Meraba a newa Adiriele wa Mehola ya ba mosadi wa gagwe.
20Mikala morwedi wa Saulo, yena o be a rata Dafida. Ge ba botša Saulo taba ye, a e thabela. 21A re: Ke tlo mo nea yena yoo, gore e be moreo wa go tlo mo tanya, a be a fenywe ke Bafilisita. A bolela le Dafida a re: Bjale o tlo ba mokgonyane wa ka ka morwedi wa ka wa bobedi. 22Bahlanka ba gagwe a ba laela a re: Bolelang le Dafida ka thopeng le re: Tseba gore kgoši e a go rata; le bahlanka ba yona ba a go rata; go rata gore o be mokgonyane wa kgoši.
23Bahlanka ba Saulo ba boledišana le Dafida ka mokgwa woo. Dafida a re: A le re ke selo se senyenyane go ba mokgonyane wa kgoši, etšwe ke le motho wa modiitšana le mmotlana?
24Bahlanka ba sebela Saulo ba re: Dafida o boletše ka gore le ka gore. 25Saulo a re: Botšang Dafida le re: Kgoši ga a rate go nyalelwa ka se sengwe, ge e se ditsiba tše lekgolo tša bošoboro tša Bafilisita, gore e be go otla manaba a gagwe. -- A realo ka gobane a rata go bolaiša Dafida ka diatla tša Bafilisita. 26Bahlanka ba botša Dafida se Saulo a se boletšego. Dafida a dumela taba yeo ya go tlo ba mokgonyane wa kgoši ka mokgwa woo, go sešo gwa fela matšatši a mantši. 27A tsoga a tšwa dira a na le banna ba gagwe, a bolaya banna ba makgolo a mabedi ba Bafilisita; a boa le ditsiba tše makgolo a mabedi, a di tliša go kgoši, a ba mokgonyane wa kgoši. Saulo a mo nea Mikala a ba mosadi wa gagwe.
28Ke mo Saulo a bonego a lemoga gobane Morena o ema le Dafida, le gobane Mikala morwedi wa gagwe o rata Dafida. 29Poifo ya go boifa Dafida ya gola e eya, a ba lenaba la Dafida ka mehla le mehla.
30Gomme ge dikgošana tša Bafilisita di etšwa dira, Dafida a fela a dira ka bohlale, a phadiša bahlanka ba Saulo ka moka, mme leina la gagwe la retwa gagolo.
