Saulo o rata go bolaya Dafida
1Bjale Saulo a bolela le Jonathane morwa wa gagwe, le bahlanka ba gagwe ka moka, a re ba bolaye Dafida. Fela, Jonathane o be a rata Dafida gagolo. 2A sebela Dafida a re: Saulo tate o rata go go bolaya. Bjale itote bosasa, o itulele kutamong o iphihlile. 3Nna ke tlo tšwa le tate ka ema le yena mo lešokeng gona moo o tlogo ba o le gona, ka bolela le yena ditaba tša gago, ka tlo bona ka mo di emego ka gona, ka tsebo go sebela.
4Gomme Jonathane, a na le Saulo tatagwe, a bolela Dafida ka tše botse a re: Kgoši, o se obe molato ka Dafida mohlanka wa gago, ka gobane ga a na se a go senyetšego ka sona; mediro ya gagwe e bile e go hola ka kudu. 5Mola a bolaya Mofilisita yola, e be e le go ikgafa; gomme Morena a direla Isiraele phenyo e kgolo. O di bone wa thaba. Bjale o reng o rata go oba sebe ka madi a se nago molato ka go bolaela Dafida lefela?
6Saulo a theetša se Jonathane a se boletšego, a fetola a re: Ka bophelo bja Morena, Dafida a ka se ke a bolawa. 7Ke mo Jonathane a biditšego Dafida, a mmotša mantšu ao ka moka; a mo iša go Saulo, gomme Dafida a mo hlankela ka mokgwa wa bomaloba le bomaabane.
8Gwa ba gwa tsoga ntwa enngwe gape. Dafida a tšwa dira a hlabana le Bafilisita, a ba bolaya o šoro, ba tšhaba a ba hlomere.
9Ke mo moya o mobe o tšwago go Morena o tletšego Saulo; a dula mo ngwakong a swere lerumo ka seatla; gomme Dafida a letša seletšo. 10Saulo a re ke bolaya Dafida, a re ke mo pataganya le leboto ka lerumo. Dafida a šašarapana pele ga Saulo, lerumo la hlaba leboto. Gomme Dafida a tšhaba bošego bjoo.
11Saulo a roma bahlanka ba ya ngwakong wa Dafida, ba no lalela gore ba mmolaye ka moswana. Mikala mosadi wa Dafida a sebela monna wa gagwe a re: Ge o sa phonyokge bošego bjo, bosasa o a bolawa. 12A mo ntšha ka lešoba, a fulara a tšhaba; ya ba gona go phonyokga. 13Gomme Mikala a tšea seswantšho sa modimo, a se latša mo malaong, a se tatetša hlogo ka letlalo la pudi, a se apeša ka kobo. 14Saulo ge a roma bahlanka ba go swara Dafida, Mikala a re o a babja. 15Saulo a roma bahlanka a re ba yo bona Dafida, a re: Le mo tliše ka malao, a tle a bolawe. 16Bahlanka ba tla ba hwetša ka mo malaong go na le seswantšho se se tatešwego letlalo la pudi hlogong. 17Bjale Saulo o bolela le Mikala a re: O mphorelang wa lesa lenaba la ka la tšhaba?
Mikala a fetola a re: Dafida o itše: Lesa ke tloge, gore ke se tlo go bolaya.
18Dafida o phonyokgile ka mokgwa woo a tšhaba, a tla go Samuele kua Rama, a mo anegela tšohle tše Saulo a mo dirilego tšona; a tloga le Samuele, ba yo dula Nayothe. 19Saulo a sebelwa gwa thwe: Dafida o kua Nayothe Rama. 20Ke mo Saulo a romilego bahlanka a re ba yo swara Dafida. Gomme ya re ge bona ba bona phuthego ya baporofeta, le Samuele a ba eme pele, moya wa Morena wa tlela bahlanka ba Saulo, mme le bona ba porofeta. 21Ge Saulo a tsebišwa taba, ye, a roma bahlanka ba bangwe; le bona ba tla ba porofeta. Saulo a buša a roma bahlanka la boraro; gomme le bona bao ba porofeta. Saulo a buša a roma bahlanka la boraro; gomme le bona bao ba porofeta. 22Saulo a ba a ya yena ka noši, a fihla sedibeng se segolo sa kua Seku, a botšiša a re: Samuele le Dafida ba kae? Ba re: Ba kua Nayothe Rama. 23Ge a sa ya gona moo Nayothe Rama a tlelwa ke moya wa Modimo, a tšama a porofeta, a ba a fihla Nayothe Rama. 24Le yena a apola kobo ya gagwe, le yena a porofeta a lebane le Samuele, a patlama fase, a hlwa tšatši leo a ba a lala a phafogile bošego bjoo ka moka. Ba ra tšona ge ba re: A Saulo le yena o mo gare ga baporofeta?
