1 SAMUELE 27

₁Dafida ka mo pelong ya gagwe a re: Seatla sa Saulo se tlo ba sa nkiša lehung. Go kaone ge ke široga ka tšhabela nageng ya Bafilisita, gore Saulo a holofologe, a se hlwe a ntsoma mo dinageng tša Isiraele; e be gona go mo phonyokga.

₂A tsoga a na le banna ba makgolo a selelago, a selela go Akise morwa wa Maoko kgoši ya Bathe. ₃Gona moo go Akise motseng wa Gathe Dafida a dula a na le banna ba gagwe ka moka ka malapa a bona. Dafida o be a na le basadi ba gagwe ba babedi, Ahinoama wa Jeseriele, le Abigaile mosadi yola wa Nabala wa Karamele. ₄Bjale Saulo ge a tsebišwa gore Dafida o tšhabetše Gathe, a se ke a hlwa a mo tsoma.

₅Dafida a tla a bolela le Akise a re: Ge mahlo a gago a ntebeletše ka botho, gona mphe bodulo motseng o mongwe nageng ya gago, ke dule ntshe; ka gobane nna molata wa gago ke reng ke dula nago motseng wa mošate? ₆Ke mo Akise a mo neilego motse wa Tsikilaga mohla woo. Ke ka baka leo motse woo wa Tsikilaga e lego wa magoši a Juda le nankhono. ₇Lebaka le Dafida a le feditšego a dutše moo nageng ya Bafilisita ke ngwaga o tee le dikgwedi tše nne.

₈Dafida le banna ba gagwe ba fela ba hlagela nageng ya Bagesuri, le ya Bagirisi, le ya Baamaleke; ka gobane e be e le bona beng ba naga yeo go tloga kgaleng, go fihla kua Suri le kua nageng ya Baegipita. ₉Dafida ge a hula metse ya naga yeo, ga a ka a lesa monna goba mosadi a phela; o thopile dinku, le dikgomo, le dipokolo, le dikamela, le diaparo; a fela a boela go Akise. ₁₀Gomme ge Akise a re: Le tšo hula kae lehono? Dafida a fetola a re: Re tšwa kua thoko ya borwa go la Juda, le thoko ya borwa go ba Jeramiele, le thoko ya borwa go Bakeni. ₁₁Ge Dafida a sa ka a lesa monna goba mosadi a phela a tla Gathe, o dirile gore ba se tšame ba mo kwatša ba re: Dafida o dirile sekete le sekete. O dirile ka mokgwa woo ka mehla ge a sa dutše nageng ya Bafilisita. ₁₂Akise a mo kgolwa a re o lwile le setšhaba sa gabo sa Isiraele, bjale o tlo dula e le mohlanka wa ka ka mehla.