Dafida o thopolla ba ba thopilwego ke Baamaleke
1Ya re ge Dafida le banna ba gagwe ba fihla Tsikilaga ka tšatši la boraro, ba hwetša naga yeo ya thoko ya borwa e hlagetšwe ke Bamaleke, ba hutše motse wa Tsikilaga, ba o fišitse, 2ba thopile basadi ba gona; fela ba se ke ba bolaya motho, le ge e le e monyenyane le ge e le e mogolo, ba fo ba thopa ba ba iša ka tsela. 3Dafida ge a fihla motseng a na le banna ba gagwe, ba bona motse o swile, le gobane basadi ba bona, le barwa ba bona, le barwedi ba bona ba thopilwe, 4ba hlaboša mantšu a bona ba lla, ba ba ba felelwa ke maatla a go lla, yena Dafida le banna ba a bego a na nabo. 5Le basadi ba babedi ba Dafida, Ahinoama wa Jeseriele, le Abigaile mosadi wa Nabala wa Karamele, ba be ba thopilwe.
6Dafida yena o be a tlaletšwe gagolo, ka gobane batho ba be ba re ba tlo mo thuma ka maswika, ka gobane dipelo tša bona di be di senyegile ka baka la barwa ba bona le barwedi ba bona. Dafida yena a itiiša maatla ka Morena Modimo wa gagwe. 7A bolela le Abyathara moperisita morwa wa Ahimeleke, a re: A ko tle le kobo ya moperisita. Abyathara a tla go Dafida a na nayo. 8Dafida a botšiša Morena a re: A ke hlomarele bahlakodi bao? A ke tlo ba swara?
Morena a re: Ba hlomarele; o tlo ba swara wa namolela ruri.
9Ke moka Dafida a wela tsela a na le banna ba makgolo a selelago. Ya re ge a fihla nokeng ya Besora, ba bangwe ba šala moo. 10Dafida a feta a na le banna ba makgolo a mane; ba makgolo a mabedi ba be ba šetše ba lapile, ba šitwa go sela noka ya Besora. 11Kua šokeng ba hwetša monna wa Moegipita, ba mo iša go Dafida; ba mo nea bogobe a ja; ba mo fa meetse a nwa. 12Ba mo ngwathela senkgwana sa mago, ba mo fa le makwape a mabedi a morara, a ja a boelwa ke maatla; ka gobane o be a feditše matšatši a mararo le mašego a ona a sa je a sa nwe. 13Dafida a bolela le yena a re: O wa mang? O tšwa kae?
Yena a re: Ke lesogana la Moegipita; ke mohlanka wa monna wa Moamaleke. Mong wa ka o mphetile ke feditše matšatši a mararo ke babja. 14Re be re hlagetše la Bakereti ka thoko ya borwa, le la Juda le la Kalebe ka thoko ya borwa, ra fiša motse wa Tsikilaga.
15Dafida a re: A o ka se nkiše go bahlakodi bao?
Monna eo a re: Nkenele ka Modimo gore o ka se mpolaye, le gore o ka se nkgafele seatleng sa mong wa ka; gona ke tlo go iša go bahlakodi bao.
16A ba iša; ba ba hwetša ba phatlaletše mo go fela, ba eja, ba enwa, ba dirile monyanya ka dithebola tše kgolo tše ba bego ba di thopile mo nageng ya Bafilisita le mo nageng ya Juda. 17Gomme Dafida a ba bolaya, a thoma ka matlagosa, gwa ba gwa tla mantšiboa a la ka moswana. Gwa se ke gwa phonyokga motho, ge e se banna ba masogana ba makgolo a mane ba ba bego ba nametše dikamela; bona bao ba tšhabile. 18Dafida a thopolola tšohle tše Baamaleke ba di thopilego, a thopolola le basadi ba babedi ba gagwe. 19Gwa se ke gwa hlokwa selo se senyenyane le se segolo, goba morwa, goba morwedi; ka moka tše di bego di thopilwe, Dafida o boile natšo. 20Dafida a tšea dinku le dikgomo, ba di etiša mehlape pele, ba re: Ke dithebola tša Dafida!
21Ya re ge Dafida a etla go banna bala ba makgolo a mabedi, ba ba bego ba paletšwe go sepela le Dafida mme ba šala nokeng ya Besora, bona bao ba tla ba gahlanetša Dafida le setšhaba se se bego se na nae. Dafida a tla go bona a ba dumediša. 22Gwa bolela banna ba ba bego ba befetšwe, e le ba bašoro, ba ba bego ba ile le Dafida, ba re: Ba ba sa kago ba ya le rena ga ba abelwe dithebola tše re di thopolotšego; a ba tšee basadi ba bona le bana ba bona, mme ba sepele. 23Dafida a re: Bana bešo! Dilo tše Morena a re neetšego tšona, lesang go di dira ka mokgwa woo. Morena o re phemetše; gomme bahlakodi bala, ba ba bego ba re šwahletše, o ba gafetše diatleng tša rena. 24Bjale mantšu ao a lena a ka dumelelwa ke mang? Kabelo ya motšwelantweng le ya moletaphahlo a di lekane; a ba arolelwe ka mokgwa o tee. 25Go tloga moo gwa dirwa bjalo ka mehla, ya ba molao le mokgwa wa Isiraele le nankhono.
26Dafida ge a tla Tsikilaga a romela dithebola go bagolo ba Juda, go bagwera ba gagwe, a re: Sedio dibego tša dithebola di tšwago manabeng a Morena. 27A romela ba kua Bethele, le ba Ramothe ba ka thoko ya borwa, le ba Jathiri, 28le ba Aroere, le ba Sipemothe, le ba Esithemoa, 29le ba Rakale, le ba metseng ya Jeramiele, le ba metseng ya Bakeni, 30le ba Horoma, le ba kua Korašane, le ba Athaka, 31le ba Heburone, le ba metseng yohle ye Dafida a bego a etla go yona le banna ba gagwe.
