1 SAMUELE 8

₁Mehleng ya ge Samuele a tšofetše o beile barwa ba gagwe ba ahlolela Isiraele. ₂Leina la morwa wa gagwe wa pele e be e le Joele, la wa bobedi e be e le Abia; bona ba ahlola ba le Bereseba. ₃Fela, barwa ba gagwe ba lahlile tsela ya gagwe, ba tlwaela tša megabaru, le tša tsogolekobong, le tša go hlaola batho.

₄Bagolo ka moka ba Isiraele ba kgobokana, ba tla Rama go Samuele. ₅Ba bolela le yena ba re: Wena bjale o tšofetše; gomme barwa ba gago ba lahla tsela ya gago. Bjale ako re tsemele kgoši, e re ahlolele re etše ditšhaba tše dingwe. ₆Ge e le Samuele, taba ye ge ba re: Re tsemele kgoši ya go re ahlolela, -- ya na ya mo nyamiša pelo. Samuele a yo rapela Morena. ₇Morena a fetola a re: Theetša lentšu la setšhaba ditabeng ka moka tše ba go boditšego tšona. Ga ba lahla wena; ba lahlile nna gore ke se ke ka ba kgoši ya bona. ₈Ba go dira ka mokgwa wo ba dirilego ka wona go tloga mola ke ba ntšhitše Egipita go fihla lehona, ge ba fela ba ntahla ba hlankela medimo e šele. ₉Bjale dira se ba se bolelago. Fela, o ba tiišetše bohlatse, o ba laodišetše ditshwanelo tša kgoši ye e tlogo ba buša.

₁₀Gomme Samuele a bolela le setšhaba seo, se kgopetšego go fiwa kgoši; a se botša mantšu ka moka a Morena. ₁₁A re: Ditshwanelo tša kgoši e tlogo le buša šedi: E tlo tšea barwa ba lena, ya ba dira ba dikoloi tša yona le banamedi ba dipitsi tša yona; e tlo ba ba go eta koloi ya yona pele. ₁₂O tlo bea balaodi ba dikgao tša sekete, le tša lekgolo, le tša masome a mahlano; e tlo ba balemi ba mašemo a gagwe, le babuni ba mabele a gagwe, le barudi ba marumo a gagwe, le ba dilo tša dikoloi tša gagwe. ₁₃O tlo tšea barwedi ba lena, ya ba baapei ba ditlolo, le baapei ba dijo tša gagwe, le babeši ba dinkgwa. ₁₄O tlo tšea mašemo a lena, a hlaola dirapa tše botse tša morara le tša mehlware, a di nea bahlanka ba gagwe. ₁₅O tlo le ntšhiša karolo ya lesome ya mabele a lena le ya morara, a di nea dikala tša gagwe le bahlanka ba gagwe. ₁₆O tlo tšea balata ba lena ba banna le ba basadi, le masogana a lena a dinatla, a ba diriša mediro ya gagwe, le dipokolo tša lena. ₁₇O tlo le ntšhiša karolo ya lesome ya mehlape ya lena; gomme lena le tlo ba bahlanka ba gagwe. ₁₈Mohla woo, ge le tlo lla ka baka la kgoši ya lena ye le ikgethetšego yona, Morena a ka se hlwe a le kwa.

₁₉Fela, setšhaba se ganne go kwa se Samuele a se boletšego, ba re: Aowa; a re beelwe kgoši; ₂₀le rena re tle re etše ditšhaba tše dingwe; kgoši ya rena e re ahlolele, e re ete pele ge re ya direng. ₂₁Samuele ge a kwile tšohle tše di boletšwego ke setšhaba, a ya a di anegela Morena. ₂₂Morena a fetola a re: Kwaa se ba se bolelago, o ba beele kgoši. Ke moka Samuele a botša Baisiraele a re: Ikeleng, le boeleng magaeng a lena.