1 TIMOTHEO 4

₁Moya o boletše gwa kwala, wa re mehleng e tlogo tla ba bangwe ba tlo hlanogela tumelo, ba ya le meoya ya go fora batho, ba ya le dithuto tša meoya e mebe. ₂E tlo ba baikaketši ba go bolela maaka, ba ba swailwego matswalo eke ba fišitšwe ka tshipi. ₃Ba iletša motho go tšea mosadi, ba ila dijo tše Modimo a di bopetšego go amogelwa ka go leboga ke badumedi ba ba lemogilego therešo. ₄Gobane dibopša tša Modimo ke tše botse tšohle, ga go se se kago ilwa ge se lewa ka go leboga; ₅Gobane di kgethega ka lentšu la Modimo le ka thapelo.

₆Ge o ruta bana ba borena taba tše, gona o tlo ba mohlanka o botse wa Jesu Kriste, yo dijo tša gagwe e lego mantšu a tumelo ye e swanetšwego ruri ke go amogelwa. ₇Ge e le dinonwane tšeo di gobogilego, tše nkego ke tša bakgekolo, tšeo o di gane. Wena o itlwaetše borapedi. ₈Gobane go tlwaetša mmele go hola ganyane fela. Se se holago gohle ke borapedi ka ge bo na le kholofedišo ya bophelo bjono le ya bjo bo tlogo tla. ₉Ke taba ye e tiilego, ye e swanetšwego ruri ke go amogelwa. ₁₀Ke sona se re itapišetšago sona re rogwa; ka gobane re holofetše Modimo e a phelago, Mophološi wa batho bohle, gagolo wa bao ba dumelago.

₁₁Ba laele tšona tše, o ba rute tšona. ₁₂Go se ke gwa ba le e a go nyatšago ka ge o sa le lesogana; baa moetapele wa badumedi go boleleng le mekgweng le leratong le Moyeng le tumelong, le ka mokgwamokgethwa. ₁₃O tiiše go balela batho Mangwalo le go ba eletša le go ba ruta, ke be ke tle go lena. ₁₄O se ke wa tšwafela neo ye o seditšwego ka yona, ye o e filwego wa porofeta mola bagolo ba go beile diatla. ₁₅Hlokomela tšona tšeo, o ineele tšona, gore dilong tšohle go bonale ge o tšwelela pele. ₁₆Itote o lote le thuto. Ge o dira bjalo o tlo iphološa, wa phološa le bao ba go kwago.