2 KORONIKA 14

₁Abia o ithobaletše le botatagwe, ba mmoloka motseng wa Dafida; legatong la gagwe gwa buša Asa morwa wa gagwe. Mehleng ya gagwe naga ya lala, gwa ba gwa feta nywaga e lesome. ₂Asa o dirile tše botse, a kgahla Morena Modimo wa gagwe. ₃O tlošitše dialetare tše šele, o fedišitše meboto, a pšhatla diswantšho tša medimo, a rema dikokwane tša Ashera. ₄A botša Bajuda a re ba nyake Morena Modimo wa botatabo, ba dire se se boletšwego ke molao wa Morena le ditaelo tša gagwe. ₅Mo metseng ya Juda ka moka a fediša meboto, le dikokwane tša letšatši; a bona mmušong wa gagwe go iketlilwe. ₆A aga metse ya dibo nageng ya Juda, ka gobane naga e be e iketlile, go se e a lwago le yena ka nywaga yeo, ka gobane a khutšišitšwe ke Morena. ₇Ge a bolela le Bajuda o be a re: A re ageng metse ye, re e agelele ka merako le ka dibo, le ka dikgoro tša maswika; re dire bjale naga e sa re laletše; gobane re kgopetše Morena Modimo wa rena, re kgopetše mme a re fa khutšo thoko tše go fela. Ka kgonthe ba aga, ba kgona. ₈Gomme Asa o be a na le bahlabani ba ba bego ba swere dikotse le marumo; e be e le banna ba dikete tše makgolo a mararo ba Juda; ba Benyamini e be e le ba dikete tše makgolo a mabedi a masome a seswai ba ba swerego dikotse le bora; ka moka e be e le banna ba bagale.

₉Ba kile ba tšwelwa dira ke Sera Mokushe; a tla a na le banna ba dikete tše sekete, le dikoloi tše makgolo a mararo; a fihla Maresa. ₁₀Asa a tšwa a beakanya dira tša gagwe; ya gahlana moeding wa Tsefata kgauswi le Maresa. ₁₁Asa a hlaboša lentšu a kgopela Modimo a re: Morena, ga go e a kago namolela mmotlana diatleng tša yo maatla, ge e se wena. Re tlile ka leina la gago gore re lwe le bontši bjo. Morena, Modimo wa rena ke wena. A go se ke gwa ba le motho e a kago ema a lwa le wena. ₁₂Gomme Morena a otla Bakushe ge go fihla Asa le Bajuda; mme Bakushe ba tšhaba. ₁₃Asa le setšhaba sa gagwe ba ba hlomarela ba goma Gerara; Bakushe ba bolawa, gwa hlokwa e a phelago, gobane ba be ba nolegile moko, ge go tla Morena le dira tša Asa. Bajuda ba thopa dithebola tše ntši. ₁₄Ba hula metse ka moka ya thoko yeo ya Gerara, ka gobane ba gona ba be ba wetšwe ke go tšhoga Morena. Ba rebola tša metseng yeo, gobane mo go yona go be go na la dithebola tše ntši. ₁₅Ba hula le meraka ya dikgomo, ba thopa dinku tše ntši le dikamela; ba tsebo boela Jerusalema.