Monyanya wa Paseka. Lehu la Josia
1Gomme Josia a direla Morena Paseka motseng wa Jerusalema. Ba hlaba Paseka ka la lesome la metšo e mene la kgwedi ya pele. 2Baperisita a ba bea medirong ya bona, a ba tiiša gore ba hlankele Ngwako wa Morena. 3Balefi ba go ruta Baisiraele ka moka, ba ba bego ba kgethetšwe Morena, a bolela le bona a re: Polokelo ya Morena e beilwe Ngwakong wo Salomo morwa wa Dafida kgoši ya Isiraele a o agilego. Ga le sa e rwala ka magetla. Bjalo direlang Morena Modimo wa lena le setšhaba sa gagwe sa Isiraele. 4Le šielane sebaka ka go ya ka meloko le ka diphohla tša lena, ka mo Dafida kgoši ya Isiraele a di ngwadilego le ka lengwalo la Salomo morwa wa gagwe. 5Le tle le eme sekgethweng ka diphohla tša meloko ya bana ba bolena ba setšhaba se; sephohla e be sa batho ba moloko o tee wa Balefi. 6Le tle le hlabe Paseka le iketlile, mme le e lokišetše bana ba bolena, gore le dire ka Lentšu la Morena le a le boletšego ka Moshe.
7Gomme Josia a ntšhetša batho dihuswana, dikwana le diputšana, gore e be dihlabelo tša Paseka tša bohle ba ba bego ba tlile; ya ba tše dikete tše masome a mararo, le dikgomo tše dikete tše tharo. Tšona tše tša ntšhiwa maruong a kgoši. 8Bakgoma ba gagwe ba ntšhetša setšhaba le baperisita le Balefi dineo ka go ithapa. Balaki ba Ngwako wa Modimo, boHilikia le Sekaria le Jehiele, ba ntšhetša baperisita dihuswana tše dikete tše pedi le makgolo a selelago, le dikgomo tše makgolo a mararo. 9Bagolo ba Balefi, Bokonanya, le Semaya le Nethaniele bana babo, le Hasabja, le Jehiele, le Josabadi, ba ntšhetša, Balefi dihuswana tše dikete tše tlhano, le dikgomo tše makgolo a mahlano; ya ba dihlabelo tša Paseka.
10Ya re ge ba itokišeditše modiro ka mokgwa wo, baperisita ba ema felo ga bona, le Balefi ba ema ka diphohla tša bona ka taelo ya kgoši. 11Ba na ba hlaba Paseka, baperisita ba fokela madi ka diatla tša bona, Balefi ba tswia dihlabelo. 12Ba hlaola dihlabelo, ba di abela setšhaba ka go ya ka magoro a bona, gore ba di tlišetše Morena ka mo go ngwadilwego pukung ya Moshe; le dikgomo ba di dira ka mokgwa woo. 13Paseka ba e beša ka mollo ka mokgwa wa yona; ge e le tše dingwe tše ba di kgethilego, ba di apea ka dipitša, le ka dipitšana, le ka mabeana, ba tsebo di abela setšhaba ka moka. 14Ya ba gona ba lokišago tša bona le tša baperisita, gobane baperisita barwa ba Arone, ba be ba sa dira dihlabelo le tša makhura e šetše e le bošego. Ke ka baka leo Balefi ba lokišitšego tša bona le tša baperisita barwa ba Arone. 15Baopedi barwa ba Asafa bona ba be ba eme felo ga bona, ka mo ba laetšwego ke Dafida le Asafa le Hemane le Jeduthune mmoni wa kgoši. Baleti ba dikgoro ba be ba eme dikgorong ka moka ba sa tloge medirong ya bona, ka gobane ba be ba lokišetšwa ke bana babo ba Balefi. 16Mediro ka moka ya go direla Morena mohla woo e be e beakantšwe ka taelo ya kgoši Josia, gore go kgone go dirwa Paseka, go kgone go išwa dihlabelo aletareng ya Morena. 17Baisiraele ba ba bego ba tlile ba dira Paseka mohla woo le monyanya wa dinkgwa tše di sa omelwago wa matšatši a šupago. 18Paseka e bjalo e be e sešo ya dirwa mo go Isiraele go tloga mehleng ya Samuele moporofeta; gobane dikgoši tša Isiraele ga tša ka tša dira Paseka e etšago ye ya Josia a na le baperisita le Balefi, le Bajuda ka moka, le Baisiraele ba ba bego ba tlile, le ba Jerusalema. 19Paseka ye e dirilwe ka ngwaga wa lesome la metšo e seswai wa pušo ya Josia.
20Ka morago, ge Josia a feditše go lokiša Ngwako wa Morena, gwa tšwelela Neko kgoši ya Egipita, a eya go lwa le motse wa Karakemisi nokeng ya Forate. Josia a mo tšwela dira. 21Neko a roma batseta a re: Ke na le taba mang nago, wena Kgoši ya Juda? Lehono ga ka tšwela wena; ke tšwela ba mohuta woo o felago o elwa le nna; gomme Modimo o re ke akgofe. Lesa go lwa le Modimo e a emago le nna, gore o sa tlo senyega. 22Josia a gana go mo gomela, gobane o be a tlemile pelo a re ke hlabana nae; a gana go kwa mantšu a Neko a a bego a etšwa molomong wa Modimo, a tla mme ya gahlana molaleng wa Megido.
23Babetši ba hlaba kgoši Josia; yena a botša bahlanka ba gagwe a re: Ntlošeng, ke kutlegile gagolo! 24Bahlanka ba gagwe ba mo ntšha koloing ya gagwe ya ntwa, ba mo nametša koloi ya gagwe ya bobedi, ba mo iša Jerusalema. Mme a hwa, a bolokwa mabitleng a botatagwe. Bajuda ka moka le ba Jerusalema ba llela Josia.
25Jeremia a hlaba sefela sa go llela Josia. Baopedi bohle ba banna le ba basadi ba bolela tša Josia ge ba hlabelela tša dillo le nankhono; e bile ke temalo go Baisiraele. Sedile di ngwadilwe pukung ya dillo.
26Ge e le ditaba tše dingwe tša Josia, le tša borapedi bja gagwe tše a di dirilego a swere ka tsela ya melao ya Morena, 27le ditaba tša mola a sa thoma a ba a goma, šedile di ngwadilwe pukung ya dikgoši tša Isiraele le tša Juda.
