2 KORONIKA 6

₁Mohla woo Salomo a re: Morena o boletše a re: o rata go dula mo swiswing! ₂Bjale ke go agetše ngwako gore e be bodulo bjo o tlogo dula go bjona ka mehla le mehla.

₃Kgoši ya retologa ya lebana le setšhaba, ya šegofatša phuthego ya Isiraele ka moka; gomme phuthego ka moka ya Isiraele e be e eme. ₄Kgoši ya re: A go retwe Morena Modimo wa Isiraele, ka gobane o phethile ka seatla sa gagwe tše a di boditšego Dafida tate a re: ₅E sa le mola ke ntšha setšhaba sa ka Egipita, ga ke ešo ka kgetha motse o mongwe mo dileteng tša Isiraele ka moka gore go agelwe leina la ka Ngwako; le gona ga ke ešo ka hlaola monna a ba kgoši ya setšhaba sa ka sa Isiraele. ₆Wo ke o kgethilego ke motse wa Jerusalema, gore e be mo leina la ka le tlogo dula gona; ke hlaotše Dafida a ba kgoši ya setšhaba sa ka sa Isiraele.

₇Gomme Dafida tate mo pelong ya gagwe o be a rata go aga Ngwako wa leina la Morena Modimo wa Isiraele. ₈Morena a bolela le yena Dafida tate a re: Ge mo pelong ya gago o rera go agela leina la ka Ngwako, o dirile gabotse. ₉Fela, Ngwako woo o ka se ke wa agiwa ke wena. E a tlogo o aga ke morwa wa gago yo o tlogo mo tswala. Ke yena a tlogo agela leina la ka Ngwako.

₁₀Gomme lentšu leo Morena a le boletšego, o bile o le phethile; gobane nna ke eme legatong la Dafida tate, ke dutše sedulong sa Isiraele ka mo Morena a boletšego; gomme ke agetše leina la Morena Modimo wa Isiraele Ngwako, ₁₁mme polokelo e nago le kgwerano ya Morena ye a e dirilego le Baisiraele, ke e beile ntshe.

₁₂Bjale Salomo a ema pele ga aletare ya Morena phuthego ka moka ya Isiraele e mo lebeletše, a emiša matsogo a gagwe. ₁₃Gobane Salomo o be a dirile serokamelo ka mphiri, a se beile gare ga lapa; bophara bja sona e be e le meelo e mehlano thoko tšohle; leemo e be e le meelo e meraro; a ema godimo ga sona, a khunama ka matolo a lebane le phuthego ya Isiraele ka moka, a emišetša matsogo legodimong, ₁₄gomme a re: Morena Modimo wa Isiraele! Kua magodimong le mono faseng ga go Modimo mokawena, e o botegelago bahlanka ba gago mme wa ba dira ka botho, ge ba phela ba lebane nago ka pelo ka moka. ₁₅Dafida tate mohlanka wa gago o mo diretše tšohle tše o mmoditšego tšona. O be o di boletše ka molomo; mme lehono šedi, o di phethile ka seatla sa gago. ₁₆Gomme bjale, Morena Modimo wa Isiraele! Nama o dire tše o di boditšego mohlanka wa gago Dafida tate, wa re: Mo sedulong sa bogoši bja Isiraele o ka se ke wa hlokišwa monna yo ke tlogo mmona a dutše go sona, ge bana ba gago ba ka swara tsela ya bona ka melao ya ka, ba lebane le nna bjalo ka wene. ₁₇Morena Modimo wa Isiraele, bjale lentšu leo, o le boletšego le Dafida mohlanka wa gago, a e be la therešo.

₁₈Afa ruri Modimo a ka dula le batho mono lefaseng? Hleng magodimo, le magodimo a godimodimo a sa kgone go go lekana! Bjale Ngwako wo ke o agilego o ka go lekana bjang? ₁₉Morena Modimo wa ka! Thapelo ya mohlanka wa gago e sekegele tsebe, o kwe kgoeletšo ya mohlanka wa gago le topo ya gagwe a e beago pele ga gago. ₂₀A mahlo a gago a lebelele Ngwako wo mosegare le bošego, felo mo o go boletšego wa re: Leina la ka le tlo dula fa! Gore o kwe thapelo ya mohlanka wa gago a e beago monomo. ₂₁O kwe ge nna mohlanka wa gago le setšhaba se sa gago re go llela re le felo fa. O kwe o le bodulong bja gago godimong; o kwe o ba lebalele.

₂₂E re ge motho a senyetše wa gabo, gomme ba mo eniša keno a itlema, keno ya tla pele ga aletare ya gago fa Ngwakong wo, ₂₃o kwe o le godimong, o dire, o ahlolele bahlanka ba gago; yo kgopo a tšwewe, o lefetše mokgwa o mobe wa gagwe; e a lokilego a tšwe molatong, o mo nee tše di mo swanetšego ka ge a lokile.

₂₄Mohla setšhaba sa gago sa Isiraele se fenywa ke manaba ka ge se go senyetše, e re ge ba boela go wene ba itshola leineng la gago, ba go llela ba rapela ba le fa Ngwakong wo, ₂₅o kwe o le godimong; setšhaba sa gago sa Isiraele o se lebalele dibe tša sona, o se bušetše mo nageng yeno ye o e neilego bona le botatabo.

₂₆Mohla wo legodimo le tswaletšwe, go se pula, ka ge ba go senyetše, e re ge ba etla ba rapela felo fa, ba itshola leineng la gago, ba lahla sebe sa bona ka gobane o ba otla, ₂₇o kwe o le godimong; bahlanka ba gago, le ba setšhaba se sa gago, o ba lebalele sebe se ba se dirilego; gobane o tlo ba ruta tsela e botse, ye ba tlogo sepela ka yona, mme o nešetše naga ye ya gago pula, naga yeno o e neetšego tšhaba se sa gago ya ba legae la bona.

₂₈Mohla go wile tlala nageng, goba ya welwa ke dinkhu, goba phori, goba megwelema, le ge e ka ba tšie, goba mogokong, le ge manaba a ba hlohla mo nageng le mo kgorong, le ge e ka ba kotlo mang le bolwetši mang, ₂₉dithapelo tšohle le ditopo tšohle, ge di ka direlwa motho mang le mang, le ge e le setšhaba ka moka sa gago sa Isiraele, bohle ba lemoga kotlo ya dipelo tša bona, mme ba emišitše atla tša bona ba le Ngwakong wo, ₃₀o kwe o le godimong, o le bodulong bja gago bjo bo tiilego, o ba lebalele; bohle o ba nee tše di lebanego tsela ye ba bego ba e swere; gobane o tseba dipelo tša bona, motsebadipelo tša bana ba batho ka moka ke wena o nnoši, ₃₁gore ba go boife, ba sware ka tsela tša gago ka mehla yohle ba sa phela mo nageng ye o e neetšego borrawešo.

₃₂Le moeng e sego wa setšhaba se sa gago sa Isiraele, motšwakgole a tlago ka baka la ina la gago le atla sa gago se maatla, le tsogo la gago le o le emišago, ge a ka tla a rapela a le Ngwakong wo, ₃₃o kwe o le godimong, o le bodulong bja gago bjo bo tiilego, o dire se se kgopelwago ke moeng, gore tšhaba tšohle tša lefase di tsebe leina la gago, di go boife bjalo ka setšhaba se sa gago sa Isiraele, ba tsebe gore mo Ngwakong wo ke o agilego, go bolwa leina la gago.

₃₄Le mohla setšhaba sa gago se tšwetše go hlabana le manaba, o ba romile mme ba wela tsela, ge ba ka go bitša ba lebile mo motseng wo o o kgethilego, ba iša difahlogo mo Ngwakong wo ke o agetšego ina la gago, ₃₅o kwe o le godimong, o kwe thapelo ya bona le topo ya bona, o dire mme o eme nabo!

₃₆Mohla ba tlogo ba ba go senyetše -- ka ge go se motho e a sa kego a senya -- mme wa ba befelelwa, wa ba lahletša tlhabanong, manaba a ba thopa, ba išwa nageng ya manaba, e ka ba kgole le ge e le kgauswi, ₃₇ge ba ka itshola dipelong, ba le nageng ya bao ba ba thopilego, mme ba sokologa ba go rapela ba le gona kua bothopša, ba re: Re dirile sebe! Re molato! Re disenyi! ₃₈ge ba ka boela go wena ka pelo ka moka le moya ka moka ba le gona kua nageng ya manaba a bona, ya bao ba ba thopilego, ge ba go kgopela tsela ya go ka boela mo nageng ya gabo ye o e neetšego botatabo, mo motseng wono o o kgethilego, le mo Ngwakong wo ke o agetšego ina lago, ₃₉o kwe o le godimong, o le bodulong bja gago bjo bo tiilego; o kwe thapelo ya bona le topo ya bona, o ba namolele, o lebalele tšhaba se sa gago tše ba go senyetšego ka tšona.

₄₀Bjale Modimo wa ka! A mahlo a gago a dule a lebeletše, mme tsebe tša gago di phafogele dithapelo felo fa. ₄₁Bjale, Morena Modimo! Tsoga gee o tsene felo fa ga gago ga makhutšo, o tle fa go lego polokelo ya maatla a gago. Morena Modimo! A baperisita ba gago ba apešwe bonamodi, barapedi ba gago ba thabele tše botse. ₄₂Morena Modimo! Motlotšwa wa gago o se mo gerule; borapedi bja Dafida mohlanka wa gago o se bo lebale.