2 KORONIKA 9

₁Mohumagadi wa Seba o be a kwele tumo ya Salomo, a tla Jerusalema gore a leke Salomo ka diema, a tla a na le leswethe le legolo ka kudu, le dikamela tše di bego di rwele dinoko le digauta tše ntši, le magakabje a bohlokwa. A tla go Salomo a bolela nae taba tšohle tše di bego di le pelong ya gagwe. ₂Salomo a mo hlathollela ditaba tša gagwe ka moka, gwa se ke gwa ba le taba e utagetšego Salomo, ye a sa kago a mo hlathollela yona. ₃Ya re ge mohumagadi wa Seba a bona bohlale bja Salomo, le ngwako wo a o agilego, ₄le dijo tša meruswing ya gagwe, le madulo a matona a gagwe, le mekgwa ya bahlanka ba gagwe le diaparo tša bona, le batšheledi ba gagwe le diaparo tša bona, le manamelo a gagwe a go rotogela Ngwakong wa Morena, a felelwa ke mogopolo, ₅a bolela le kgoši a re: Ditaba tša gago, le tša bohlale bja gago, tše ke di kwelego ke le kua gagešo, ke therešo. ₆Ke be ke sa kgolwe tše ba mpoditšego tšona, ka ba ka tla ka di bona ka mahlo a ka. Bjale šedi, tše ba mpoditšego tšona e fo ba seripa fela sa bohlale bja gago bjo bokaakaa. Tša gago di fetiša tumo ye ke e kwelego. ₇Batho ba gago ke ba lehlogonolo; ba lehlogonolo ke bahlanka ba gago ba ba go hlankelago ka mehla mme ba kwa bohlale bja gago. ₈A go retwe Morena Modimo wa gago yo o mo kgahlilego a go dudiša sedulong sa gagwe, wa ba kgoši ya Morena Modimo wa gago; gobane Morena Modimo wa gago o ratile Isiraele, o thekgile Isiraele ka go sa felego. Ke ka baka leo a go beilego wa ba kgoši ya bona gore o buše o dire ka toko.

₉Mohumagadi a nea kgoši talente tše lekgolo le masome a mabedi tša gauta, le dinoko tše ntšintši, le magakabje a bohlokwa. Ga gwa ka gwa buša gwa ba le dinoko tše kaakaa, tše di kago lekana le tšeo mohumagadi wa Seba a di neilego kgoši Salomo.

₁₀Le bahlanka ba Hirama, le bahlanka ba Salomo, ba tlišitše digauta di etšwa Ofira, ba tliša le dihlare tša morekure, le magakabje a bohlokwa. ₁₁Kgoši Salomo o dirile manamelo a go ya Ngwakong wa Morena ka wona morekure, le manamelo a go ya ngwakong wa kgoši, le diletšo le makope a baopedi. Mo nageng ya Juda go be go sešo gwa bonwa tše di etšago tšeo.

₁₂Kgoši Salomo a nea mohumagadi wa Seba tšohle tše a di kganyogago le tše a di kgopelago, ya ba go oketša neo ye a lebogilego dibego tšela tša mohumagadi ka yona. Gomme mohumagadi a boela ga gabo le bahlanka ba gagwe.

₁₃Boima bja digauta tše di bego di tlišwa go Salomo ka ngwaga o tee, e be e le talente tše makgolo a selelago le masome a selelago a metšo e selelago, ₁₄go sa balwe tše di bego di etšwa go bašabi le go babapatši, le go dikgoši ka moka tša Arabia, le go bakgoma ba ba bego ba tlišetša Salomo digauta le disilifera. ₁₅Kgoši Salomo o dirile dikotse tše makgolo a mabedi ka gauta e batotšwego; e tee a e ntšhetša gauta ya Sekele tše makgolo a selelago. ₁₆A dira le dikotsana tše makgolo a mararo ka gauta e batotšwego; e tee a e ntšhetša Sekele tše makgolo a mararo tša gauta. Tšona tše a di bea ngwakong wa Sekgwa sa Libanoni.

₁₇Kgoši a dira sedulo sa bogoši se segolo ka naka tša tlou, a se manega ka gautatshekegi. ₁₈Sedulong se go be go iwa ka manamelo a direpodi tše di selelago; le bogato bja maoto bja gauta bjo bo bego bo swaragane le sedulo. Se be se na le mesamelo e mebedi ya mabogo ka dithokong tša madulo, gona moo go be go eme ditau tše pedi di batagane le mesamelo ya mabogo. ₁₉Mo direpoding tše di selelago tša manamelo, ka thoko ye le ye, go be go eme ditau tše lesome la metšo e mebedi. Ga go na mmušo o mongwe o kilego wa direlwa tše bjalo.

₂₀Dinwelo ka moka tša kgoši Salomo e be e le tša gauta; le dibjana ka moka tša ngwako wa Sekgwa sa Libanoni e be e le tša gauta e botse; go tšona go be go se silifera, gobane mehleng ya Salomo silifera e be e sa šetšwe selo. ₂₁Gobane dikepe tša kgoši Salomo di be di ya Tarasisi le bahlanka ba Hirama, gomme maselawatle ao a Tarasisi a be a boa gatee ka nywaga e meraro, a tliša digauta, le disilifera, le naka tša tlou, le ditšhweni, le dikgabo.

₂₂Ka mokgwa wo kgoši Salomo a ba e mogolo a fetiša dikgoši tša lefase ka moka ka mahumo le ka bohlale. ₂₃Dikgoši ka moka tša lefase di be di kganyoga go bona Salomo, le go kwa bohlale bja gagwe bjo Modimo a bego a bo beile pelong ya gagwe. ₂₄Bohle ba tla le dibego tša dilwana tša silifera le tša gauta, le diaparo, le marumo, le dinoko, le dipitsi, le dimeila; ba di tliša ka ngwaga o mongwe le o mongwe.

₂₅Salomo o be a na le dipitsi tše ntši tša dikoloi, tše e bego e re ge di balwa ka dipedi ya ba dikete tše nne, le makoloi, le dipitsi tša go namelwa tše dikete tše lesome la metšo e mebedi; a di bea metseng ya dikoloi, le motseng wa Jerusalema. ₂₆Dikgoši ka moka go tloga nokeng ya Forate go goma ka mellwane ya Egipita, di be di loba yena. ₂₇Kgoši ya atiša silifera motseng wa Jerusalema ya ba ye kaka maswika, dikota tša morokwana tše kaka tša mego e lego magoleng ka bontši. ₂₈Ba be ba tlišetša Salomo dipitsi di etšwa Egipita le dinageng ka moka.

₂₉Ge e le ditaba tše dingwe tša Salomo, tša ge a thoma a ba a goma, naa ga di a ngwalwa ditabeng tša Nathane moporofeta, le mo dikgwelelong tša Ahia wa Silo, le mo diponong tša Ido mmoni wa tša Jerobeama morwa wa Nebata? ₃₀Salomo o feditše nywaga e masome a mane a buša Isiraele ka moka a le motseng wa Jerusalema. ₃₁O ithobaletše le botatagwe, ba mmoloka motseng wa Dafida tatagwe; legatong la gagwe gwa buša Rehabeama morwa wa gagwe.