2 BAKORINTHE 10

₁Bjalo nna Paulo yo, ke le rapela ka bonolo le ka botho bja Kriste, nna yo ba rego: Ke moikokobetši re lebane ka difahlogo, ge ke fulere ya ba gona ke galefago. ₂Ke kgopela gore ge ke tlo lebana le lena, e se ke ya ba ka kgalefo le ka šiši, ye ke bego ke re ke tla bata yona ke lwa le bao ba go re phara ba re re ya ka tsela ya nama. ₃Gobane le ge re sepela re la nameng, ga re hlabane senama. ₄Marumo a tlhabano ya rena ga se a nama, ke a maatla ka Modimo, a šwalalanya dibo. ₅Re šwalalanya maano le go iphagamiša gohle go šiteletšago tsebo ya Modimo; re itshwara ra tlema menagano gore e kwe Kriste. ₆Gomme re itokišitše go sola go se kwe ka moka, ge mo go lena go kwa e le go kwa moka.

₇A nke le boneng se se lego pepeneneng. Ge motho a ipotile a re wa Kriste ke yena, a a buše a eleletše a tsebe gore le rena re ba Kriste, bjalo ka ge le yena e le wa Kriste. ₈Gobane ge nna nka tiiša go kgantšha maatla a re a filwego ke Morena a gore re le agiše, a gore re se šwalalanye, nka se nyatšege. ₉Fela, ga ke rate go thwe, ka rata go le tšhošetša ka mangwalo a ka. ₁₀Gobane mangwalo a ka, ba re ke a boima, ke a maatla. Ba re: Ge ke le gona ka sebele, ke a fokola, mme polelo ya ka, ba re, e a nyatšega. ₁₁Wa go realo a a tsebe, gore sona seo re se bolelago ka mangwalo re se gona, re tlo se dira ge re le gona.

₁₂Gobane rena re ka se ke ra leka go etša bao ba go itheta, le ge e le go ipapetša le bona. Bona ga ba na temogo, ka ge ba sa tsebe ba bangwe, e le ba go itseba fela. ₁₃Gomme rena re ka se ke ra itheta ra iša kgole; re tlo tseba sebaka se Modimo a re beetšego sona, yena Moelelabathosebaka, ge re bile re fihlile go lena. ₁₄Le bjale ga se gore re obelela gore re fihlele; gobane ke rena ba re thomilego go tla go lena ka Ebangedi. ₁₅Ga re itumiše re iša kgole re sa tsebe modiro wa ba bangwe. Se rena re se holofetšego ke gore ge tumelo ya lena e gola, e tlo ba go katologa ga sebaka sa rena sa go tšwelela pele, ₁₆Ra tlo fetela pele ra iša Ebangedi le kua dileteng tše dingwe re se tlo nyaka go retwa ka tša sebakeng se se beetšwego ba bangwe, le ka tše di dirilwego ke bona.

₁₇E a ithetago a a ithete ka Morena. ₁₈Gobane mmotegi ga se moikemedi; ke yo Morena a mo emelago.