2 BAKORINTHE 2

₁Se ke se tiišitšego pelong ya ka ke go re nka se ke ka tla wa go le nyamiša. ₂Gobane ge nka le nyamiša, e a tlogo thabiša nna e tlo ba mang ge e se lena ba ke tlogo ba ke ba nyamišitše? ₃Ge ke le ngwaletše ditaba tše, e be e le gore ge ke etla, ke se ke ka nyamišwa ke bao go swanetšego ge ke ba thabela; gomme ke holofetše gore lethabo la ka e tlo ba le tee le la lena ka moka. ₄Gobane ke le ngwaletše ke hlokofetše ruri, ke boifa, megokgo e le e mentši, ke sa re ke le hlokofatše, e le gore le tsebe lerato le legolo le ke le ratago ka lona.

₅Ge motho a dirile se se nyamišago, ga a nyamiša nna fela; o nyamišitše bolena. Nke ke re: E nyakile go ba ka moka ga lena, gore ke se iše kgole. ₆Go lekane ge motho eo a sotšwe ke ba bantši ka mokgwa woo. ₇Ke gona le ka upša la mo lebalela, la mo homotša, gore motho eo a se tlo metšwa ke nyamo ge e mo golela. ₈Ke ka baka leo ke le kgopelago, gore le mo dire ka lerato. ₉Ge ke le ngwaletše ka taba ye, ke be ke re ke bona ge le le babotegi, ge le le ba ba kwago ditabeng tšohle. ₁₀Yo lena le mo lebalelago se a se dirilego, le nna ke mo lebaletše. Gobane ge nna ke mo lebaletše, ke mo lebaletše ka lena re le pele ga sefahlogo sa Kriste, ₁₁gore re se ke ra foraforetšwa ke Sathane, gobane maano a yena eo ga se go re ga re a tsebe.

₁₂Mola ke fihla Teroa ka Ebangedi ya Kriste, ka bulegelwa ke mejako Moreneng. ₁₃Ka hlokišwa khutšo pelong ka go se hwetše Tito ngwanešo; ka laela ka fetela Matsedonia.

₁₄Gomme Modimo a a lebogwe, yena wa go re fa phenyo ka mehla ka Kriste, a tšweletša monko o bose wa go tseba yena mo go fela ka rena. ₁₅Gobane pele ga Modimo re seorelo sa Kriste mo go ba ba phološwago le go ba ba lahlegago. ₁₆Go ba bangwe re monko wa lehu wa go iša lehung; go ba bangwe re monko wa bophelo wa go iša bophelong. Gomme ke mang e a kgonago go tše pedi tšeo? ₁₇Rena ga re etše bao ba ba retollago Lentšu la Modimo; rena re le bolela re rereša; re bolediswa ke Modimo re le ba Kriste.