Pušo e botse ya Josia; lehu la gagwe. Pušo ya Joahase le Joyakima
1Bjale kgoši ya roma bahlanka ba botha bagolo bohle ba Juda le ba Jerusalema, ba tla go kgoši. 2Gomme kgoši ya rotogela Ngwakong wa Morena, e na le banna ka moka ba Juda, le bohle ba ba agilego Jerusalema, le baperisita, le baporofeta, le setšhaba ka moka, ba bagolo le ba banyane; a ba balela tšohle tše di ngwadilwego mo pukung ya kgwerano ye e hweditšwego mo Ngwakong wa Morena. 3Kgoši e be e eme kokwaneng, e le pele ga Morena, ya dira kgwerano ya re: Ba tlo latela Morena, ba hlokomela ditaelo tša gagwe ka pelo ka moka le ka moya ka moka, gore go tie mantšu ao ka moka a ngwadilwego pukung ye. Gomme setšhaba ka moka sa emela kgwerano yeo.
4Kgoši ya napa ya laela Hilikia moperisita e mogolo, le baperisita ba bangwe, ya re: Dilo ka moka tše di diretšwego Baali le Ašera, le makoko ka moka a legodimo, ba di ntšhe mo Ngwakong wa Morena; ba di fiše kwa ntle ga motse wa Jerusalema molapong wa Kidirone; melora ya tšona ya išwa Bethele. 5A raka le baperisita ba meboto, ba ba bego ba beilwe ke dikgoši tša Juda gore ba thuntšhe diorelo mo mebotong mo metseng ya Juda, le tikologong ya motse wa Jerusalema; a raka le ba ba bego ba thuntšhetša Baali diorelo le letšatši le kgwedi le dinaledi, le makoko ka moka a legodimo. 6Seswantšho sa Ašera se se bego se beilwe Ngwakong wa Morena o se ntšhitše motseng wa Jerusalema, a se iša molapong wa Kidirone, a se šilakanya sa ba lerole; lerole leo a le tšhela mabitleng a setšhaba. 7A phušola nywako ya ditšhila tša bootswa ye e bego e batagane le Ngwako wa Morena, mo basadi ba bego ba loga mašela a Ašera. 8A bitša baperisita ka moka mo metseng ya Juda, a goboša meboto ka moka mo baperisita bao ba thuntšhetša diorelo go tloga Geba go iša Bereseba, a phušola meboto ya mo dikgorong, le ya mo kgorong ya Jošua mokgoma wa motse, le e bego e le ka thoko ya la ntsogoso la ge motho a tsena ka kgorong ya motse. 9Baperisita bao ba meboto ga ba ka ba rotogela aletareng ya Morena ya Jerusalema; fela, magobe a sa omelwago ba be ba a ja le bana ba bobona.
10Le felo fala ga ditšhila moeding wa Bene-Hinomo o go gobošitše, gore go se ke gwa ba le motho e a kago išetša Moloko morwa wa gagwe le ge e le morwedi wa gagwe mollong. 11O tlošitše le dipitsi tšela tše di bego di kgethetšwe modimo wa letšatši ke magoši a Juda, di le mojako wa Ngwako wa Morena ngwakwaneng wa Nethane Meleke molaki e a bego a dutše mathuding; le dikoloi tše di bego di kgethetšwe modimo wa letšatši, kamoka o di fišitše ka mollo. 12Le dialetare tše di bego di le ka ngwakong wa Ahasi wa ka godimo, tše di bego di dirilwe ke magoši a Juda, le dialetare tše di bego di dirilwe ke Manase malapeng a mabedi a Ngwako wa Morena, kgoši e di phušotše, ya di tloša, lerole la tšona ya le tšhololela nokeng ya Kidirone. 13O phušotše le meboto e bego e beilwe Jerusalema ka thoko ya bohlabela, le ka thoko ya tlase ya Thaba ya Tshenyego, ye Salomo kgoši ya Isiraele a bego a e agetše Asitherothe makgapha a Basidone, le Kamosi makgapha a Bamoaba, le Milikomo makgapha a Baamoni. 14A pšhatalaganya diswantšho, a rema dikokwane tša Ašera, a tlatša felo fao ka mašapo a batho.
15Aletare ya Bethele le yona, le mmoto wa gona wo o dirilwego ke Jerobeama morwa wa Nebata e a rutilego Isiraele go senya, aletare yeo le mmoto woo, kgoši e di phušotše, a senya mmoto woo ka mollo, a o phušoganya ya ba lerole; kokwane ya Ašera a e fiša ka mollo. 16Ya re ge Josia a rotoga, a bona mabitla a lego thabeng, a roma batho a re ba ntšhe mašapo mabitleng, ba a fiše aletareng, a e goboša; gwa phethega lentšu lela le monna wa Modimo a le boletšego a goeletša, a bolela taba ye (1 Dikg. 13:2). 17Gomme kgoši ya botšiša ya re: Lefisika leo le ke le bonago le emišitšwe lebitleng ke lang?
Batho ba motse ba re: Ke lebitla la monna ela wa Modimo, e a kilego a tla a etšwa Juda, a goeletša a bolela ditaba tšona tše o di dirago aletare ya Bethele.
18Josia a re: Mo leseng; go se ke gwa ba e a swarago mašapo a gagwe.
Mašapo a gagwe le a moporofeta yola e a bego a tšwile Samaria, ba se ke ba a dira selo.
19Josia o tlošitše le nywako ka moka ya meboto e bego e le Samaria, e bego e agilwe ke dikgoši tša Isiraele ba rumola Morena ka yona; yona a e dira tše a di dirilego Bethele. 20Baperisita ka moka ba meboto ya gona a ba hlabela godimo ga dialetare tšeo, a fišeletša mašapo a bona go tšona; ya ba gona a boelago Jerusalema.
21Kgoši ya bea molao wa setšhaba ka moka ya re: Direlang Morena Modimo wa lena Paseka ka mo go ngwadilwego pukung ya kgwerano! 22Gomme Paseka e bjalo e be e sešo ya dirwa go tloga mehleng ya Baahlodi ba go ahlolela Isiraele, le mehleng yohle ya dikgoši tša Juda, 23gwa ba gwa tla ngwaga woo wa lesome le metšo e seswai wa kgoši Josia; ya ba gona ba o dirilego motseng wa Jerusalema.
24Le gona Josia a fediša ba malopo, le dinoge, le medimo ya malapeng, le medimo ya diswantšho, le makgapha ka moka a a hweditšwego mo nageng ya Juda le motseng wa Jerusalema, gore go tle mantšu a molao a a ngwadilwego pukung ye Hilikia a e hweditšego Ngwakong wa Morena. 25Go be go sešo gwa ka go e-ba le kgoši e swanago le yena a boetšego go Morena ka pelo ya gagwe ka moka, le ka moya wa gagwe ka moka, le ka matla a gagwe ka moka, a dira ka molao wa Moše ka moka; le gona ga gwa ka gwa tla gwa tsoga e nngwe kgoši e swanago le yena.
26Le ge go le bjalo Modimo ga a ka a goma bogaleng bja gagwe bjo bogolo, bjo bo bego bo tukela Juda ka baka la maborumolang ao Manase a mo rumotšego ka ona. 27Morena a re: Juda le yena ke tlo mo široša pele gaka bjalo ka ge ke širošitše Isiraele; motse wa Jerusalema wo ke o kgethilego ke tlo o lahla gotee le Ngwako wo ke o boletšego ka re: Ke mo leina laka le tlo go ba gona!
28Ge e le ditaba tše dingwe tša Josia, le tšohle tše a di dirilego, nna ga di a ngwalwa mo pukung ya ditaba tša kgale tša dikgoši tša Juda? 29Mehleng ya gagwe gwa rotoga Farao Neko kgoši ya Egipita a yo lwa le kgoši ya Asiria nokeng ya Forate. Kgoši Josia a tšwa a re ke gahlana nae; ya re ge Farao Neko a mmona, a mmolaya motseng wa Megido. 30Bahlanka ba gagwe ba mo rwala gona moo Megido a hwile, ba mo rwala ka koloi, ba mo iša Jerusalema, ba mmoloka lebitleng la gagwe.
Batho ba naga yeo ba napa ba tšea Joahase morwa wa gagwe ba mmea kgoši legatong la gagwe.
31Joahase o be a na le nywaga e masome a mabedi a metšo e meraro ge a eba kgoši, a buša kgwedi tše tharo motseng wa Jerusalema. Leina la mmagwe e be e le Hamutala morwedi wa Jeremia wa Libina. 32Yena o dirile se se befelago Morena ka go dira tšohle tše botatagwe ba bego ba di dira. 33Farao Neko o mo swere a mo tlema kwa Ribila nageng ya Hamathi, a mo amoga bogoši bja Jerusalema, a ntšhiša setšhaba seloba sa Talente tše lekgolo tša silifera, le Talente e tee ya gauta. 34Farao Neko a bea Eliakima morwa wa Josia a ba kgoši legatong la Josia tatagwe, a mo reela la Jojakima. Ge e le Joahse o tlogile nae a mo iša Egipita a hwela ntshe.
35Joyakima o neile Farao silifera yela le gauta yela, a ntšhiša naga ka mo go e lekanego, gore a ntšhe seloba se se bego se nyakiwa ke Farao; a ntšhiša motho e mongwe le e mongwe ka mo go mo lekanego; a tšea disilifera le digauta a di nea Farao Neko.
36Joyakima o be a na le nywaga e masome a mabedi le metšo e e mehlano ge a eba kgoši, a fetša nywaga e lesome le motšo o tee a le kgoši motseng wa Jerusalema. Leina la mmagwe e be e le Sebuda morwedi wa Pedaya wa Ruma. 37O dirile tšee di befelago Morena ka go dira tšohle tše botatagwe ba bego ba di dira.
