Mehlolo ya Elisa
1Mosadi e mongwe wa basadi ba barwa ba baporofeta, o kile a goelela a botša Eliša a re: Mohlanka wa gago monna waka o hwile; gomme o a tseba, mohlanka wa gago o be a boifa Morena. Bjale mong wa molato o tilile go nkamoga bana baka ba bašemanyana gore e be bahlanka ba gagwe.
2Elisa a re: Nka go direlang? Mpotše se o nago naso ka ngwakong.
Mosadi a re: Nna molata wa gago ga ke na selo ka ngwakong, ge e se moeta wa makhura.
3Elisa a re: Yaa o adingwe meeta go ba o agišanego nabo; e se ke ya ba e sego nene. 4O tsebo tsena ngwakong o na le bana ba gago ba bašemane, wa tswalela mojako; mme o tšhele meeta ka moka, wo o tletšego o o beele thoko.
5Mosadi a tloga moo, a ya a itswalelela a na le bana ba gagwe; bona ba mo tlišetša meeta, mme yena a tšhela. 6Ya re ge meeta e tletše, a botša ngwana a re: Tliša o mongwe gape. Ngwana wa gagwe a ba a re: Ga go sa na le moeta. Ya ba gona makhura a kgaotšago. 7Bjale mosadi a tsebiša monna wa Modimo. Yena a re: Rekiša makhura ao, o lefe molato wa gago; makhura a a tlogo šala o phele ka ona le bana ba gago.
8Ka tšatši le lengwe Elisa a feta ka motseng wa Sunema. Ntshe go be go na le mosadi wa mohumagadi; yena eo a mmitša a re a tle a je bogobe. Gomme e be e fela a re ge a feta, a fapogele moo a ja. 9Mosadi eo a bolela le monna wa gagwe a re: Taba še. Nna ke lemogile gobane monna e wa Modimo e a felago a feta ka fa go rena, ke monna e mokgethwa. 10A nke re mo ageleng ngwakwana wa godimo, re meele malao ka ntshe, le sethalana, le sedulo, le lebone; e be gore ge a etla go rena, a tsene gona.
11Ka tšatši le lengwe Elisa a tla, a tsena ngwakwaneng woo wa godimo, a robala ntshe. 12A roma Gehasi mohlanka wa gagwe a re: Bitša mosadi eo wa Sunema. A mmitša, a tla a ema pele ga gagwe. 13Elisa a botša Gehasi a re: Bolela le mosadi e, o re: Sidi, o re babaletše ka paballo e kgolo; Bjale nna nka go direlang? A o na le taba kgošing, goba go mokgoma?
Mosadi a re: Aowaa, nna ke agišane le setšhaba sa gešo.
14Elisa a fela a re: Bjale nka mo direlang?
Gwa fetola Gehasi a re: Ga a na ngwana wa lesogana; gomme monna wa gagwe o tšofetše.
15Elisa a re: Mmitše! Ya re ge a mmiditše, a tla a ema mojako. 16Elisa a mmotša a re: Išago pakeno o tlo ba o swere ngwana wa lesogana.
Mosadi a re: Aowii, hle mong waka, Monna wa Modimo! O se ke wa aketša nna molata wa gago.
17Mosadi ka kgonthe a ima, a belega ngwana wa mošemanyana ka lebaka le Elisa a le boletšego.
18Ya re ge mošemanyana a gola, ka tšatši le lengwe a tšwela go tatagwe e a bego a na le babuni. 19A tla a botša tatagwe a re: Yoo, hlogo yaka! Hlogo yaka!
Tatagwe a roma lesogana a re: Mo iše go mmagwe. 20Lesogana la mo kuka la mo iša go mmagwe. Mmagwe a mo fara difarong go fihla mosegare; ya ba gona a hwago. 21Mmagwe a rotoga a mmea malaong a monna wa Modimo, a mo tswalelela a tloga. 22A bitša monna wa gagwe a mo rera a re: A k o nothomele e mongwe wa masogana a tle le pokolo, ke akgofe ke ye go monna wa Modimo; ke tlo ba ka boa.
23Monna wa gagwe a re: O reng o eya go yena lehono, etšwe e se kgwedi e mpsha lehono, e se Sabatha?
Mosadi a re: Ga go taba. 24A tlema pokolo, a botša lesogana la gagwe a re: Kganyela o sepeleše; o se ke wa ntiegiša tseleng, ge e se ge nka go botša. 25A sepela, a fihla mo monna wa Modimo a bego a le gona thabeng ya Karamele.
Monna wa Modimo a mmona a sa le kgojana, a botša mohlanka wa gagwe a re: O ko bone, mosadi ela wa Sunema šoo! 26Kganyela e sa le bjale, o mo hlakanetše, o mmotšiše o re: A o sa thabile, le monna wa gago, le ngwana wa gago?
Mosadi a re: Go sa thabilwe, 27a re go fihla go monna wa Modimo, a mo gokara maoto; Gehasi a batamela, a re a mo gomiše. Monna wa Modimo a re: Mo lese, o nyamile; mme nna Morena o sa nkutetše taba ye; ga ešo a ntsebiša.
28Mosadi a re: Afa nkile ka kgopela ngwana go wena mongaka? A ga nka ka go botša ka re: O se ke wa nkaketša?
29Elisa a bolela le Gehasi a re: Itleme matheka, o sware lehlotlo laka o sepele. Ge o hlakana le motho, o se ke wa mo dumediša. Ge o dumedišwa o se ke wa fetola. O yo bea lehlotlo laka godimo ga sefahlogo sa moše manyana.
30Mmago ngwana a re: Ka bophelo bja Morena, le ka bophelo bja gago, nna nka se ke ka go tlogela. A napa a tsoga a mo latela. 31Gehasi yeno o be a ba šiile; a tla a bea lehlotlo godimo ga sefahlogo sa mošemanyana; mme gwa hlokwa lentšu le go kwa. A goma a hlakanetša Elisa, a mmotša a re: Mošemanyana ga a tsoga!
32Elisa a tla a tsena ngwakong, a hwetša ngwana a beilwe malaong a gagwe, a hwile. 33A tsena a tswalela mojako a na le mošemanyana eo; a kgopela Morena. 34A namela malao, a inamela ngwana eo, a lebanya molomo wa gagwe le wa ngwana, le mahlo a gagwe le a ngwana, le diatla tša gagwe le tša ngwana; a mo inamela ka mokgwa woo, mmele wa ngwana wa huthumela. 35A tsoga mme a itshepelela gona moo ngwakong; a boela malaong a inamela ngwana. Ya ba mo ngwana a ithimolago gašupa, a ba a ponyologa mahlo. 36Elisa a bitša Gehasi, a re: Bitša mosadi wa Sunema! A mmitša a tla, mme Elisa a re: Tšea ngwana wa gago, šo! 37Mosadi a tla a phuhlama a lotšha a inametše fase, a tšea ngwana wa gagwe a tšwa.
38Elisa a boela Giligala; ke mola go wele tlala nageng. Barwa ba baporofeta ge ba tla ba dula pele ga gagwe, a botša mohlanka wa gagwe a re: Hlatlega pitša e kgolo, o apeele barwa ba baporofeta dijo. 39Ke ge e mongwe wa bona a tšwetše nageng go kga morogo; a hwetša motantane wa marakabidi, a a nganga ka kobo, a tla a a kgabaganyetša ka pitšeng, gobane ba be ba sa a tsebe. 40Gomme ba solela banna bao gore ba je. Ya re ge ba leka morogo woo, ba hlaboša mantšu ba re Yoo monna wa Modimo, ka pitšeng go lehu! Mme ba šitwa go ja. 41Yena a re: Tlišang bupi! A bo tšhela ka pitšeng, a re: Solelang batho, ba je! Gomme mo pitšeng gwa se ke gwa hlwa go eba le se se babago.
42Gwa tla monna e mongwa a etšwa Baali-Salisa, a tlela monna wa Modimo le magobe a dithakangwaga, e le dinkgwa tše masome a mabedi tša leotša, le diako tše tala ka mokotleng wa gagwe. Elisa a re: Neela batho, ba je! 43Mohlanka wa gagwe a re: Nka di neela byang batho ba lekgolo?
Elisa a re: Neela batho, ba je; gobane Morena o re: Go tlo lewa go be go šadišwe. 44Mohlanka a ba neela, ba ja, ba ba ba šadiša; gwa direga se Morena a se boletšego.
