Mehlolo ya Elisa. Tlala ya Samaria
1Barwa ba baporofeta ba kile ba bolela le Elisa ba re: O ko bone felo fa re dulago re na le wena, ke mo go nyane. 2Re dumelele re ye nokeng ya Jorodane, re boe re rwele kwata e tee e tee, re ikagele felo mo re kago dula.
Elisa a re: Yang!
3E mongwe wa bona a re: A ko ye le rena bahlanka ba gago. Yena a re: ke tlo ya. 4A sepela nabo; ba tla nokeng ya Jorodane ba rema dihlare. 5Ya re ge e mongwe a rema sehlare, selepe sa kgolega sa wela meetseng. Monna eo a hlaboša lentšu a re: Yoo, mong aka! Gomme se adimilwe!
6Monna wa Modimo a re: Se wetše kae? A mmontšha felo fao. Monna wa Modimo a sega thupa a e beletša moo; mme selepe sa phaphamala.
7Elisa a re: Se inole! Monna eo a iša seatla a se tšea.
8Mola kgoši ya Siria e elwa le Isiraele, e be e lakana le bahlanka ba yona; ba re: Re tlo bokana bokete. 9Monna wa Modimo a iša lentšu go kgoši ya Isiraele, a re: O itote gore o se ke wa feta ka bokete, ka gobane Basiria ba rata go bokana gona. 10Ke mo kgoši ya Isiraele a romilego batho, ba ya mo monna wa Modimo a go boletšego, gwa hlapetšwa gona. Seo ga sa ka sa dirwa gatee le ge e le gabedi fela.
11Kgoši ya Siria ya ba ya huduega pelo ka baka la taba ye; ya bitša bahlanka ba yona, ya bolela le bona ya re: A le ka se mpotše e a re tšwilego a ema le kgoši ya Isiraele?
12E mongwe wa bahlanka ba gagwe a re: Aowa Kgoši mongaka! Ke Elisa moporofeta wa Isiraele e a sebelago kgoši ya Isiraele tše o kago di bolela phapošing ya marobalo a gago.
13Kgoši ya re: Yang le bone mo a lego gona, ke rome batho ba mo sware.
Ba tla ba mmotša ba re: Šolee, o kwa Dothane! 14Kgoši ya roma ba dipitsi le ba dikoloi, ba ya ntshe e le sera se segolo. 15Gomme mohlanka wa monna wa Modimo o be a tsogile e sa le bošego, a tšwetše ntle; a tšhoga dira di tietše motse gare, le dipitsi le dikoloi. Mohlanka a botša Elisa a re: Yoo, mongaka! Gomme re tlo dira bjang?
16Elisa a re: Se boife; ba ba nago le rena ba feta ba ba nago le bala. 17A realo mme a rapela a re: Morena, mo ponyolle mahlo a bone! Morena a ponyolla mahlo la lesogana, mme la re go iša mahlo la bona thaba e tletše dipitsi le dikoloi tša mollo, di dikaneditše Elisa thoko tšohle.
18Bjale Basiria ge ba theogela go yena, Elisa a kgopela Morena a re: A ko otle batho ba ka bofofu! Ke moka a ba otla ka bofofu, ka mo Elisa a kgopetšego. 19Elisa a ya a bolela le bona a re: Tsela ga se yona; motse wo ga se wona. Ntateleng, ke le iše go monna e le mo tsomago. Mme a ba iša Samaria.
20Ge ba fihlile Samaria, Elisa a re: Morena, ba ponyolle mahlo ba bone! Morena a ba ponyolla mahlo, ba bona, mme ba tšhoga ba le gare ga motse wa Samaria.
21Kgoši ya Isiraele ge e ba bona, ya botšiša Elisa ya re: Tata, a nka se ba bolaele sa ruri?
22Elisa a re: O se ba bolaye. A o ka bolaya ba o ba thopilego o swere lerumo le bora? Ba fe bogobe le meetse pele, ba je, ba nwe, ba tsebo boela go mong wa bona. 23Ke moka a ba tetelela ka dijo; ba ja, ba nwa; a tsebo ba lesa ba boela go mong wa bona. Go tloga moo gwa se hlwe go eba le sera sa Basiria se se hlagelago naga ya Isiraele.
24Ka lebaka le lengwe Benehadada kgoši ya Siria a rapa madira a gagwe ka moka a rotoga a rakella motse wa Samaria. 25Mo motseng wa Samaria gwa ba le tlala e kgolo, ka gobane Basiria ba be ba o rakeletše. Hlogo ya pokolo ya rekwa ka masheleng a masome a seswai; lefišwana le le tletšego morole wa maeba la rekwa ka masheleng a mahlano.
26Ya re ge kgoši ya Isiraele e itshepelela mo morakong, mosadi e mongwe a hlaboša lentšu a re: Ntlhatlole, Kgoši mongaka!
27Kgoši ya re: Ge Morena a sa go hlatlole, nna nka go hlatlola ka tše di tšwago kae, go se tše di tšwago seboeng le ge e le nkgong! 28Kgoši ya mmotšiša ya re: O na le taba mang?
Mosadi a re: Mosadi e o be a kwane le nna a re: Tliša ngwana wa gago wa mošemanyana re mo je lehono; ka moswana re tlo ja waka. 29Bjale re apeile ngwana waka; re mo lle. Ka la ka moswana ge ke re: Tliša ngwana wa gago re mo je, a napa a mo uta.
30Ge kgoši a ekwa se mosadi eo a se bolelago, a tšama a gagola diaparo tša gagwe a sepela godimo ga morako. Batho ka moka ba mmona a apešitše mmele ka mokotla, 31ba kwa ge a re: A Modimo a ntire sa gore le sa gore, ge la lehono le ka dikela, hlogo ya Elisa morwa wa Safate e sa le mo go yena.
32Yena Elisa ke ge a dutše ngwakong wa gagwe, bagolo ba na nae. Kgoši ya roma motseta a e eta pele. Motseta a sešo a fihla, Elisa a botša bagolo a re: Afa le a tseba ge Morwammolai a romile motseta gore a nkgaole hlogo? Le boneng gore ge motseta eo a fihla, le tswaleleng lemati le mo kgorometšeng ka lona. Naa ga ke re go kwala le mošito wa mong wa gagwe a mo latela. 33A re a sa realo, ke ge go fihla motseta, a re: Kotsi ye e tšwa go Morena; ke reng ke sa letše yena?
