Tša Jehu; o bolaya Jorama le Ahasia le Isebele
1Elisa moporofeta a roma e mongwe wa barwa ba baporofeta a mo laela a re: Itleme matheka, o sware sedibelwana se sa makhura, o ye kwa Ramothe wa Gileada. 2Ge o fihla o nyake Jehu morwa wa Josafate morwa wa Nimisi. O tsene o mo tsoše mo gare ga ba gabo, o mo iše phapošing. 3O sware sedibelwana se sa makhur a, o a tšhollele hlogong ya gagwe, o mo rere o re: Ke go beile kgoši ya Isiraele! E be gona o bulago lemati wa tšhaba. O se ke wa diega.
4Gomme lesogana leo e lego mohlanka wa moporofeta, a ya Ramothe wa Gileada. 5A re ge a tsena a hwetša balaodi ba madira ba dutše; a bolela a re: Ke na le taba nago, Kgoši!
Jehu a re: O ra mang go rena ka moka?
Yena a re: Ke ra wena, kgoši! 6Jehu a tsoga a tsena ka ngwakong. Monna yola a mo tšhela makhura hlogong, a mo rera a re: Morena Modimo wa Isiraele o re: Ke go beile kgoši ya setšhaba sa Morena sa Isiraele. 7O tlo fediša leloko la Ahaba mong wa gago, gore o lefetše Isebele madi a bahlanka baka, a baporofeta, le madi a bahlanka ka moka ba Morena, 8gore go lobe leloko ka moka la Ahaba, mo go ba gaAhaba go fedišwe ka moka ba e lego banna, magokgolwana le ba ba fahlogilego ba ba lego mo go Isiraele. 9Leloko la Ahaba ke tlo le dira se ke se dirilego leloko la Jerobeama morwa wa Nebata, le leloko la Baesa morwa wa Ahia. 10Isebele o tlo lewa ke dimpša tšhemong ya Jeseriele, gwa se ka gwa tlo ba le e a mo epelago. A ryalo a napa a bula lemati a tšhaba.
11Bjale ge Jehu a tšwela go bahlanka ba mong wa gagwe, ba mmotšiša ba re: A ke šebešebe! Legafa leo le be le tlilo go botšang?
Jehu a re: Monna eo le a mo tseba, le dipolelo tša gagwe.
12Bona ba re: Oa aketša! Napa o re botše!
Yena a re: O boletše le nna ka gore le ka gore, a ba a re: Morena o re: Ke go beile kgoši ya Isiraele.
13Bjale ka moka ba tšea dikobo tša bona, ba di ala fase pele ga gagwe lebatong, ba letša phalafala, ba re: Kgoši ke Jehu!
14Gomme Jehu morwa wa Josafate morwa wa Nimisi a rera Jorama ka bohwirihwiri. Jorama yena ke a bego a lwela motse wa Ramothe wa Gileada a na le Baisiraele ka moka ba hlabana le Hasaele kgoši ya Siria. 15Gomme Jorama o be a boetše Jeseriele go alafša dintho tše Basiria ba bego ba mo ntšhitše tsona mola a hlabana le Hasaele kgoši ya Siria. Bjale Jehu a re: Ge le lena le ka realo, gona go se ke gwa ngwega motho fa motseng, a yo di bolela kwa Jeseriele. 16Gomme Jehu a namela koloi a leba Jeseriele mo Jorama a bego a le ntshe, mo go bego go tlile Ahasia kgoši ya Juda go hlola Jorama.
17Mohlapetsi e a bego a eme mmotong wa Jeseriele, a bona go etla sera sa Jehu, a re: Ke bona sera!
Jorama a re: Bitša monamedi wa pitsi, o mo rome a yo hlakanetša, a botšiše ge e le šebešebe.
18Monamedi wa pitsi a yo hlakanetša, a re: Kgoši a re: A ke šebešebe?
Jehu a re: O na le taba mang le šebešebe? Tlaa o latele nna!
Mohlapetši a bego a re: Motseta o fihlile go bona; fela, ga a boe. 19Jorama a roma monamedi e mongwe; le yena a fihla go bona a re: Kgoši e re: A ke šebešebe? Jehu a re: O na le taba mang le šebešebe? Tlaa o latele nna!
20Mohlapetši a bego a re: O fihlile go bona; fela, ga a boe! Ge e le mokgwa, wona e ke ke wa Jehu morwa wa Nimisi; ke mokgwa wa legafa.
21Jorama a re: Bofang! Ba bofa dikoloi; Jorama kgoši ya Isiraele, le Ahasia kgoši ya Juda, ba tšwa ba nametše dikoloi tša bona, ba yo hlakanetša Jehu; ba mo hwetša a le tšhemong yela ya Nabothe wa Jesuriele. 22Jorama ge a lebana le Jehu, a re: Jehu, a ke šebešebe?
Jehu a re: šebešebe yang, ge mabootswa a Isebele mmago le mabonoge a gagwe a sa fela a ata?
23Ke ge Jorama a retolla koloi a tšhaba, a goelela Ahasia a re: Ahasia, re ekilwe! 24Jehu a swara bora bja gagwe a mo hlaba gare ga magetla, mosebe wa thula pelo; Jorama a kudupana koloing ya gagwe. 25Jehu a laela Bidikara kala ya gagwe a re: Mo kuke, o mo lahlele tšhemong ya Nabothe, gobane ke sa gopola tša mola nna le wena re nametše dipitsi re latela Ahaba tatagwe, Morena a mmolela ka tšona tše tša lehono, 26a re: Ruri, ke bone madi a Nabothe le madi a bana ba gagwe maabane. Morena o re: Ke tlo a lefeletša tšhemong ye. Morena a ryalo. Bjale mo kuke, o mo lahlele tšhemong ye, go phethege se Morena a se boletšego.
27Ahasia kgoši ya Juda ge a bona dilo tše, tšhaba a leba Bethe-Hagani. Jehu a mo hlomarela a re: Le yena mmolayeng! A hlabiwa a le koloing ya gagwe morotogeng wa Guri kgaufsi le Jibileama, a tšhabela Megido a hwela ntšhe. 28Bahlanka ba gagwe ba mo iša Jerusalema, ba mmoloka gona lebitleng la gagwe, go bo tatagwe motseng wa Dafida.
29Ahasia o be a thomile go buša ka ngwaga wa lesome le motšo o tee wa pušo ya Jorama morwa wa Ahaba.
30Jehu yena a tla motseng wa Jeseriele. Ya re ge Isebele a ekwa fao, a tlola mahlo ka pilu, a beanya hlogo ya gagwe, a nyarela ka lešoba la leboto. 31Ge Jehu a tsena ka kgorong, Isebele a mo rera a re: Afa Simiri yola a bolailego mong wa gagwe o kile a thaba naa?
32Jehu a lelala a mmona a le lešobeng, a re: Ke mang a emago le nna? A bona baloti ba ngwako ba babedi goba ba bararo ba mo okametše; 33a ba laela a re: Mo kgorometšeng a wele mono fase. Ba mo kgorometša, madi a gagwe a gaša leboto le dipitsi, tšona tša mo gatakela. 34Jehu a tsena, a ja, a nwa; a tsebo re: Le ke le bone mosadi ela wa mofefa, le mmolokeng, gobane ke ngwana wa kgoši. 35Ya re ge ba ya go mmoloka, ba hwetša go se selo ge e se legata le maoto le diatla. 36Ba boa ba botša Jehu; yena a re: Ke sona se Morena a se boletšego ka Eliya wa Thisibe mohlanka wa gagwe, a re: Nama ya Isebele e tlo lewa ke dimpša mo tšhemong ya Jeseriele. 37A re: Setoto sa Isebele se tlo ka morole nageng mo tšhemong ya Jeseriele, motho a se sa tlo re: Isebele šo!
