2 PETRO 3

₁Barategi, lengwalo le e šetše e le la bobedi le ke le ngwalelago lona. Ka mangwalo a mabedi a ke rata go tsoša kgopolotshekegi ka go le eletša, ₂gore le gopole mantšu a a boletšwego ke baporofeta ba bakgethwa, le taelo ya Morena Mophološi, ye e le tletšego ka rena baapostola ba lena. ₃Sa pele se le swanetšego go se tseba ke se: Mehleng ya bofelo go tlo tsoga bakweri ka dikwero, ba go ya ka tsela ya dikganyogo tša bona. ₄E tlo ba ba ba rego: Di kae tša ge go thwe Morena o tlo boa, gobane e sa le mola botate ba ithobalela, le lehono dilo ka moka di sa dutše di swana le tša mathomong a tlholo! ₅Batho bao ba dira ka boomo ge ba sa hlathe gore go tloga kgaleng go dutše go na le magodimo, le lefase la go tšwelela le etšwa meetseng ka maatla a meetse, ka lentšu la Modimo. ₆Meetse ao a buša a apeša lefase la mehla yela, mme la loba. ₇Magodimo a mehla yeno le lefase la mehla yeno di thekgilwe ke lona lentšu leo, di sa lotolwa gwa tlo ba gwa tla mollo wa letšatši la kahlolo la go tlo loba ga batho ba banyatši.

₈Fela, barategi, taba ye nngwe ye e se kego ya le gaka še: Go Morena nywaga e sekete eke ke letšatši le tee. ₉Morena ga a diegiše tše a di boletšego a re di tlo tla, boka ba bangwe ge ba re ke go diegiša; sa gagwe ke go se le felele pelo, gobane ga a rate ge go na le ba ba lahlegago; o rata ge bohle ba ka fihlela tshokologo.

₁₀Gomme tšatši leo la Morena le tlo tla boka lehodu letlabošego; gomme ka lona magodimo a tlo široga ka lešata la modumo o mogolo; gomme tše lefase le bopilwego ka tšona di tlo fedišwa ke mollo, gwa tlo swa gwa felela lefase le mediro ka moka e lego mo go lona. ₁₁Bjalo ge dilo tše e le tša go tlo gašanywa, go swanetše ruriruri ge le le ba go swara ka tsela e kgethwa ya borapedi, ₁₂le le ba go letela le go phafogela go tla ga letšatši leo la Modimo, la ge magodimo a tlo fedišwa a tšhumilwe, le tše lefase le bopilwego ka tšona tša tlo swa tša tologa. ₁₃Se re se letetšego ka go kwa dikholofedišo tša gagwe ke magodimo a mafsa le lefase le lefsa, moo go agilego toko.

₁₄Ke gona barategi, ge le letetše tšeo, phegelelang go tlo hwetšwa ke yena le se na bosodi le senyalo, le le ba molao. ₁₅Le tsebe gore se se le phološago ke go se fele pelo ga Morena; boka le Paulo ngwanešo e a rategago a le ngwaletšego ka bohlale bjo a bo filwego. ₁₆Mangwalong ka moka o realo ge a bolela ditaba tše. Mo go mangwalo a gagwe go na le tše thata go kwega, tše ba go se rutege le ba ba sešogo ba tia, ba di retollago ka mokgwa wo ba retollago le a mangwe mangwalo ka gona, ba ikiša tahlegong ka noši.

₁₇Gomme lena barategi, ka ge le le ba go tseba, le itote gore batimedi bao ba go se tsebe molao ba se ke ba le goga la tloga moo go lego motheo wa lena wo o tiilego. ₁₈Sa lena a e be go tšwelela pele le le ba go gaugelwa le ba go tseba Mong wa rena Mophološi Jesu Kriste. Go retwa a e be ga gagwe mehleng ya bjale, go be go fihle letšatši leo le le sa fetego. Amene.