Mpherefere wa Seba
1Go be go na le monna e mongwe wa sehwirihwiri; leina la gagwe e be e le Seba morwa wa Bikiri wa moloko wa Benyamini. Yena e a letša kwadi ya marumo a re: Na ga re na se re se nyakago go Dafida; naga ya rena ga se ya morwa wa Isai. Moisiraele mang le mang a a boele ga gabo!
2Banna ka moka ba Isiraele ba hlanogela Dafida, ba latela Seba morwa wa Bikiri. Banna ba Juda bona ba ema le kgoši ya bona go tloga nokeng ya Jorodane go fihla motseng wa Jerusalema.
3Kgoši Dafida ge a boetše motseng wa Jerusalema o hlaotše basadi bala ba lesome ba direthe, ba e bego a ba tlogetše Jerusalema ba leta ngwako, a ba bea ngwakong wa ka thoko, a ba babalela; fela, ga a ka a hlwa a tsena go bona; ba phela ba le thoko bjalo ka bahlologadi go fihla lehung.
4Gomme kgoši ya laela Amasa ya re: Rapa banna ba ka ba Juda; ge go fetile matšatši a mararo le wena o be fa.
5Amasa a ya a epa Bajuda; fela, a fetwa ke lebaka le a bego a beetšwe lona.
6Dafida a bolela le Abisai a re: Seba morwa wa Bikiri o tlo ba a re direla bošula bjo bo fetago bja Abesalomo. Bjale wena tšwaa le bahlanka ba mong wa gago, o mo hlomarele, e se re mohlomongwe a tsena metseng ya dibo a timelela mahlo a rena.
7Abisai a tsoga a na le banna ba Joaba, le madira a mošate, le bagale ka moka. A tloga motseng wa Jerusalema a tšwela go hlomarela Seba morwa wa Bikiri. 8Ge be etla leswikeng le legolo la kua Gibeoni, ba bona Amasa a etla. Gomme Joaba yena o be a itlhamile, a kgokeletše tšhoša lethekeng, e le ka segatleng se a se tlemeletšego moketwaneng wa gagwe. Ya re ge Joaba a re ke a tšwelela, tšhoša ya tšwa segatleng. 9Joaba a dumediša Amasa a re: A o sa phela, ngwanešo? A tla a mo swara maledu ka sa le letona gore a mo atle. 10Amasa a se ke a lemoga tšhoša e swerwego ke Joaba. Joaba a mo hlaba mpa ka yona, mala a gorometšegela fase, a se ke a hlwa a mmoeletša; gomme Amasa a hwa.
Joaba le Abisai monnagwe ba feta ba yo hlomarela Seba morwa wa Bikiri. 11Mo go Amasa gwa šala monna e mongwe wa masogana a Joaba; a ema a fela a re: E a ratago Joaba, e lego wa Dafida, a a latele Joaba! 12Amasa yena o be a rapaletše a ripitla mading mo mmileng. Monna eo a bona ge batho ka moka ba ba tlago ka moo ba ema. A efoša Amasa mmileng a mo iša hlageng, a mo apeša ka kobo, ka gobane a bona ka mo bohle ba ba fetago ka moo ba felago ba ema. 13Bjale ge Amasa a ntšhitšwe mmileng, bohle ba latela Joaba, ba hlomarela Seba morwa wa Bikiri.
14Gomme Joaba a putla la dilete ka moka tša Isiraele, a ba a fihla Abele-Bethe-Maaka a na le dioka tša gagwe ka moka, ba tla moo ba hwarihla monna yola. 15Ba tla ba mo rakella gona moo Abele-Bethe-Maaka. Ba napa ba bota leboto la go batamela motse ka morakong wa ka ntle. Batho ka moka ba Joaba ba epa gore ba kgwehliše morako woo gore o we. 16Ke ge mosadi e mongwe ya bohlale a goelela a le motseng, a re: Kwang! Kwang! Hle botšang Joaba le re a batamele ke tle ke bolele nae. 17Ya re ge Joaba a etla moo, mosadi a re: A ke wene Joaba?
Joaba a re: Ke nna e!
Mosadi a re: O ko theetše polelo ya nna molata wa gago.
Joaba a re: Ke theeditše.
18Mosadi a bolela a re: Bogologolo ba be ba re: Ditaba di tlo loka le di iša kua Abela. 19Motse wo ke wa leago, mmotiwa wa Isiraele. Gomme wena o itokišitše go bolaya motse wo, e lego wona mmago Isiraele! O reng o senya naga ya Morena?
20Joaba a re: Tšeo di kgole le nna; ga ke senye; ga ke šwalalanye. 21Taba ye ga e bjalo. Go na le monna wa kua dithabeng tša Efuraimi; leina la gagwe ke Seba morwa wa Bikiri. Yena eo o tsogetše Dafida maatla. Mo ntšheng, yena a nnoši, ke gomele motse wo ke tloge.
Mosadi a re: O tlo tloga o akgelelwa hlogo ya gagwe gona mo morakong. 22Mosadi a ya a bolela le beng ba motse, a kgona ka bohlale bja gagwe; gomme ba kgaola Seba morwa wa Bikiri hlogo, ba e akgelela Joaba. Ya ba gona a letšago phalafala, batho ba phatlalala ba tlogela motse, ba boela ga gabo. Joaba a boela Jerusalema go kgoši.
23Joaba e be e le yena molaodi wa madira a Isiraele ka moka. Benaya morwa wa Joyada e be e le molaodi wa madira a mošate. 24Adorama e be e le molaki wa makgetho. Josafate morwa wa Alihudi e be e le yena letona le legolo. 25Seya e be e le mongwadi. Tsadoko le Abyathara e be e le baperisita. 26Le Ira wa Jairi e be e le moperisita wa Dafida.
