DITIRO TŠA BAAPOSTOLA 10

₁Motseng wa Kesarea go be go na le monna e mongwe. Leina la gagwe ke Koronelio; e be e le tona ya bahlabani ba sekgao se ba rego ke sa Italia. ₂E be e le motho wa borapedi e a boifago Modimo, yena le ba lapeng la gabo ka moka. O be a fela a hlallela badiidi dineo tša kgaugelo, a rapela Modimo ka mehla. ₃Ka tšatši le lengwe e le nako ya senyane, a bona pono. A bona gabotse go etla Morongwa go yena, a re: Koronelio!

₄Koronelio a mo lebelela a swerwe ke go boifa, a re: Ke eng, Morena?

Morongwa a re: Merapelo ya gago le ditlhallelo tša gago tša kgaugelo di fihlile tša tsebja ke Modimo. ₅Bjale roma banna ba ye Jope, ba bitše Simone e a reilwego la Petro. ₆Ke moeng wa Simone mošogi wa mathebo, yo ngwako wa gagwe e lego hleng le lewatle. Ke yena a tlogo go botša se o swanetšego go se dira. ₇Morongwa eo a itšego bjalo ge a tlogile, Koronelio a bitša ba babedi ba bahlanka ba gagwe, le mohlabani e mongwe e a boifago Modimo, motseta wa gagwe; ₈A ba laodišetša tšohle, a ba roma ba ya Jope.

₉Ka moswana ge banna ba ba sa le tseleng, ba šetše ba le kgauswi le motse, Petro a rotogela bookamong bja ngwako a yo rapela ka nako ya go selela. ₁₀A swarwa ke tlala, a rata go ja. Ya re ge ba sa mo apeela, a tloga moyeng. ₁₁A bona legodimo le bulegile, gwa fologa sephuta, sa tla se le bjalo ka lešela le legolo le le swerwego ka dintlha tše nne; sa theošetšwa lefaseng. ₁₂Go be go phuthetšwe diphoofolo le dibatana le digagabi le dinonyana tša legodimo. ₁₃Gwa kwala lentšu le rego: Petro, tsoga o hlabe o je!

₁₄Petro a re: Aowaa Morena! Ga ke ešo ka ba ka ja seila le sa ditšhila.

₁₅Lentšu leo la re: Tše Modimo a di hlatswitšego o se ke wa re di na le ditšhila. ₁₆Tša realo tša dirwa gararo; sephutha seo sa tsebo bušetšwa legodimong.

₁₇Ya re Petro a sa eleletšwa se pono yeo a e bonego e ka bago sona, ke ge banna bala ba go rongwa ke Koronelio ba eme mathuding ba botšiša ngwako wa Simone. ₁₈Ba bolela ba botšiša ge go na le Simone wa moeng, e a reilwego la Petro.

₁₉Petro a sa akanya tša pono yela, moya wa re: Sebao banna ba bararo, ba a go nyaka; ₂₀Nanoga gee o fologe, o sepele le bona. O se belaele, gobane ba romilwe ke nna. ₂₁Petro a fologela go banna bao ba go tla ba romilwe ke Koronelio, a re: Ke nna e le mo nyakago; ke taba efe ye le e tletšego?

₂₂Banna bao ba re: Koronelio tona ya bahlabani, monna wa go loka le go boifa Modimo, wa tumo e botse setšhabeng sa Bajuda, o laetšwe ke Morongwa e mokgethwa, a thwe a go bitše o tle ngwakong wa gagwe, a kwe ditaba go wena. ₂₃Petro a ba iša ka ngwakong, ya ba baeng ba gagwe.

Ka moswana Petro a tsoga a sepela le bona. Le ba bangwe ba bana babo ba tumelo ba motse wa Jope ba ya nae. ₂₄Ka la ka moswana ba tsena Kesarea, ba hwetša Koronelio a ba letetše, a šetše a phuthile metswalo ya gagwe le ba e lego bagwera ba gagwe ba bohloko. ₂₅Petro ge a tsena, Koronelio a mo gahlanetša, a mo lotšha a khunametše fase. ₂₆Petro a mo tsoša a re: O ko eme, le nna ke fo ba motho fela. ₂₇Ba tsena ba tšama ba boledišana. Petro a hwetša go phuthegile ba bantši, ₂₈A bolela le bona a re: Le a tseba; monna wa Mojuda ga go a mo swanela ge a ka kopana le motho wa mohuta o šele, le go tla ga gagwe. Ge e le nna, Modimo o ntšhupeditše gore ke se ke ka re: go ya go motho e mongwe go a ila, ke se ke ka re ke wa ditšhila. ₂₉Ke gona ke tlilego; ka se ke ka gana ge ke bitšwa. Bjale ke a botšiša; ke efe taba ye le mpiletšago yona?

₃₀Koronelio a fetola a re: Maloba ke be ke ikonne dijo matšatši a mane. Nako ya senyane ge e fihla, ke ge ke rapela fa ngwakong wa ka. Ka bona monna wa diaparo tše di phadimago a eme pele gaka; ₃₁A bolela a re: Koronelio, thapelo ya gago e kwelwe, ditlhallelo di tsebilwe pele ga Modimo. ₃₂Bjale roma motho a ye Jope, a bitše Simone a e reilwego la Petro, e lego moeng ngwakong wa Simone wa mošogi, o lego hleng ga lewatle. Yena eo, ge a tlile, o tlo go botša. ₃₃Nna ka roma batho e sa le semeetseng, ba tla go wena. Gomme o dirile gabotse ge o tlile. Bjale re phuthegetše fa pele ga Modimo, gore re kwe tšohle tše Modimo a go laetšego tšona.

₃₄Petro a ahlama a bolela a re: Ka kgonthe, ke lemoga gore Modimo ga a bebe motho. ₃₅Anthe ditšhabeng ka moka o kgahlwa ke ba ba mmoifago, ge ba dira tše di lokilego. ₃₆Lentšu le Modimo a le rometšego Baisiraele le a le tseba, ge a ba tsebiša Ebangedi ya molao o tlago ka Jesu Kriste, yena mong a bohle. ₃₇Le tseba taba e tlilego ya ba gona nageng ka moka ya Juda, e thomegile Galilea ka kolobetšo ye e begilwego ke Johane. ₃₈Ke taba ya Jesu wa Natsaretha, yo Modimo a mo tloditšego ka Moyamokgethwa le ka maatla, a tšama a šetša batho, a fodiša bohle ba go katakelwa ke Diabolo gobane Modimo o be a na le yena. ₃₉Rena re dihlatse tša tšohle tše a di dirilego nageng ya Bajuda le motseng wa Jerusalema, yena eo ba mmolailego ba mo fegile phateng. ₄₀Ke yena yo Modimo a mo tsošitšego ka letšatši la boraro, a mo dira wa go bonagala. ₄₁E se be go bonwa ke setšhaba ka moka; a bonwa ke dihlatse tše di bego di hlaotšwe ke Modimo, ke rena ba re llego le yena, ra nwa le yena a sa tšo tsoga bahung. ₄₂Gomme rena o re laetše go goelela batho le go mmeela bohlatse bja go re: Ke yena yo Modimo a mmeilego Moahlodi wa ba ba phelago le ba ba hwilego. ₄₃Ke yena yo baporofeta ka moka ba mo šupago ba re: Mang le mang e a mo dumelago o tlo rolwa sebe ka leina la gagwe.

₄₄Ya re Petro a sa bolela ditaba tše, Moyamokgethwa wa tla godimo ga bohle ba ba bego ba theetša lentšu leo. ₄₅Badumedi ba e bego e le ba lebollo, ba go tla le Petro, ba tlabega ge neo ya Moyamokgethwa e tšhelwa le bantle. ₄₆Gobane ba be ba ekwa ge ba bolela ka maleme a šele, ba godiša Modimo. Ke mo Petro a boletšego a re: ₄₇Ke mang a kago diba meetse a go kolobetša batho ba, ge ba filwe Moyamokgethwa boka rena? ₄₈A laela a re ba kolobetšwe leineng la Morena. Mme batho bao ba mo kgopela ba re a dule matšatšinyana le bona.