DITIRO TŠA BAAPOSTOLA 21

₁Ge re kgaogana le bona ra namela leselawatle. Ra tloga ka lona ra leba Kosi; ka la ka moswana ra leba Rodo, ra yo tsena Patara. ₂Moo ra hwetša leselawatle la go ya Fenikia, ra namela lona ra tloga. ₃Ge re tla Tsipero, ra tiela sehlakahlake seo go la ntšogošo ra leba Siria, ra tla ra tsena Tiro, gobane e be e le moo leselawatle le bego le iša dithoto. ₄Rena ra yo bona barutiwa, ra dula matšatši a šupago. Barutiwa ba botša Paulo ka Moya ba re a se ke a rotogela Jerusalema. ₅Ge re feditše matšatši ao ra tšwa ra sepela re felegetšwa ke bona ka moka, le ka basadi le bana; ba re fihliša ka ntle ga motse. Moo lebotong la lewatle ra khunama ka matolo ra rapela. ₆Ra laelana; rena ra namela leselawatle; bona ba boela ga gabo bona.

₇Ge re tlogile Tiro, ya ba go fetša leeto la rena ka leselawatle. Ra goroga Petolomai, ra dumediša badumedi, ra dula letšatši le tee re na le bona. ₈Ka la ka moswana ra tsoga re na le Paulo ra wela tsela ra ya Kesarea, ra tsena ngwakong wa Filipi moruti yola wa Ebangedi, e bego e le e mongwe wa ba ba šupilego bala; ra dula ga gagwe. ₉Filipi o be a na le barwedi ba bane ba dikgarebe ba ba bego ba porofeta. ₁₀Ya re ge re šetše re feditše matšatši a mantši re dutše gona, gwa fihla moporofeta yola a tšwago nageng ya Juda; leina la gagwe ke Agabo. ₁₁A tla go rena, a tšea moketwana wa Paulo, a itlema matsogo le maoto; a re: Moyamokgethwa o re: Monna yo e lego mong wa moketwana wo Bajuda ba Jerusalema ba tlo mmofa ka wona mokgwa wo, ba mo gafela diatleng tša bantle.

₁₂Ge re mo kwa a realo, ra rapela Paulo re na le ba motse woo, ra re a se ke a rotogela Jerusalema. ₁₃Paulo a fetola a re: Le lla le reng le nkgaola pelo? Ge e le nna ga ka itokišetša go fo tlengwa; ke itokišeditše le go bolaelwa ina la Morena Jesu gona kua Jerusalema.

₁₄Ra ba ra homola a sa fenyege, ra re: A go direge thato ya Morena.

₁₅Ge go fetile matšatši ao, ra itokiša, ra rotogela Jerusalema. ₁₆Ra ya re na le ba bangwe ba barutiwa ba Kesarea; ba re iša go Menasone wa Tsipero, e bego e le morutiwa wa kgale; ra dula ga gagwe.

₁₇Ge re gorogile Jerusalema, badumedi ba re amogela ka lethabo. ₁₈Ka la ka moswana Paulo a ya go Jakobo a na le rena. Le bagolo bohle ba be ba tlile gona moo. ₁₉Paulo a ba dumediša, a ba anegela a hlomaganya tšohle tše Modimo a di dirilego ka yena mohlanka wa gagwe mo go bantle. ₂₀Ba di kwa ba reta Morena. Ba tsebo bolela le Paulo ba re: Ngwanešo! Bajuda ba ba kgodilwego ke ba dikete tše ntši; Gomme ka moka ga bona ke bagale mo go tša Molao. ₂₁Bjale o boletšwe mo go bona ka go re: Bajuda bohle ba ba falaletšego ditšhabeng o ba ruta go hlanogela Moshe; o re: Ba lese go bolotša bana le go ya ka Molao. ₂₂Bjale re ka reng? Makoko a tlo kgobokana; go tlo kwala gore o tlile fa. ₂₃Napo dire se re go botšago sona. Re na le banna ba bane ba ba itlemilego ka keno. ₂₄Yaa go bona, o hlatswiwe le bona. O ba ntšhetše tša go lefa tlhatso ge ba kotwa dihlogo. Ke mo bohle ba tlogo lemoga gore tše ba go sebago ka tšona ga dio; ba tlo bona ge o le motho wa go ya ka Molao. ₂₅Ge e le bantle ba ba dumetšego bona re kile ra ba ngwalela, ra ba laya ra re: Sa bona ga se go lotola Molao, ke go ila didimo tša medimo, le madi, le tše di tlimilwego, le bootswa.

₂₆Ke moka, ka la ka moswana Paulo a tloga le banna bao, a yo hlatswiwa le bona, a tsebo ya Ntlongkgethwa, a ipolela gore o phethile matšatši a go hlatswiwa, gore a ntšhe dineo tša dileboga tša banna bao.

₂₇Matšatši a šupago ao ge a šetše a tlo felela, Paulo a bonwa ke Bajuda ba ba tšwago Asiana. Bona ba tsoša lešaba ka moka, ba mo iša matsogo. ₂₈Ba hlaba mokgoši ba re: Banna ba Isiraele! Swarišang! So motho yola a rutago batho bohle ba mafase ka moka, a ba lohlanya le setšhaba le Molao le felo mo. Le gona o tlišitše Bagerika fa Ntlong ya Modimo, a goboša felo mo gokgethwa mo. ₂₉Ba realo ka ge ba mmone motseng a na le Terofimo wa Efeso; ba gononwa ba re Paulo o tsene nae Ntlongkgethwa.

₃₀Motse ka moka wa huduega, setšhaba sa bokana; ba swara Paulo ba mo goga, ba mo ntšha Ntlongkgethwa; mejako ya tswalelwa. ₃₁Ba sa re ba a mmolaya, mokgoši wa kwala go molaodi wa dira, gwa thwe ke moferefere wa motse ka moka wa Jerusalema. ₃₂Molaodi a hlaganela a tšwa le ditona, a kganyelela go bona. Ge ba ba swerego Paulo ba bona molaodi wa dira a fihlile, ba lesetša go itia Paulo. ₃₃Molaodi a tla a mo tšea, a laela a re ba mo tleme ka diketane tše pedi. A botšiša a re: Motho yo ke mang? O dirileng? ₃₄A kwa legoa la lešaba ge ba bangwe ba goa tša bona, ba bangwe ba goa tša bona, a šitwa go kweša se e lego taba ka lešata; a laela a re a išwe sebong. ₃₅Ge ba fihla manamelong, bahlabani ba kuka Paulo, e le go mo efoša bogale bja setšhaba. ₃₆Gobane bontši bja lešaba bo be bo latela bo goa bo re: Mmolayeng!

₃₇Ge Paulo a šetše a tlo tsentšhwa sebong, a botšiša molaodi a re: A nka se bolele le wena?

Molaodi a re: A o tseba Segerika? ₃₈A ga se wena Moegipita yola wa go tsoša mpherefere maloba, wa go tšwela lešokeng, a na le banna ba dikete tše nne ba babolai?

₃₉Paulo a re: Nna ke monna wa Mojuda, ke tšwa Tareso. Ke motho wa motse woo o tsebjago wa Tsilitsia. Ke a go kgopela, ntumelele go bolela le setšhaba se.

₄₀A mo dumelela. Paulo a ema manamelong, a emiša seatla, lešaba la homola; a bolela le bona ka mmolelo wa Sehebere, a re: