DITIRO TŠA BAAPOSTOLA 22

₁Banna ba gešo le botate! Kwang ge ke iphetolela ke bolela le lena. ₂Ge ba ekwa a bolela nabo ka Sehebere, ba homolela ruri.

₃Paulo a re: Nna ke monna wa Mojuda. Ke tswaletšwe motseng wa Tareso wa Tsilitsia; ka tla ka golela felo fa ke le morutiwa wa Gamaliele; ka rutwa Molao wa botatawešo ka go o tiišetša ruri; ka ba mogale wa Modimo ke etša bolena lehono. ₄Ka swara tsela yeo wa go re ke hwela mo go yona; ka tlema banna le basadi, ka ba gafela kgolegong. ₅Dihlatse tša ka ke moperisita e mogolo, le lekgotla ka moka la ba bagolo, bao ke tšerego mangwalo go bona a a bego a ngwaletšwe ba gešo, ka ya Damaseko ke re ke yo tlema le ba gona kua, ke ba tliše fa Jerusalema gore ba hlokofatšwe.

₆Ka re ke sa ya, ke batametše motse wa Damaseko, e le mosegare o mogolo, ka tšhoga ke phadimelwa thoko tšohle ke seetša se segolo se etšwa legodimong. ₇Ka wela fase, ka kwa lentšu le re: Saulo! Saulo, o ntlhomaretšeng? ₈Nna ka fetola ka re: Ke wena mang, Morena? Yena a re: Ke nna Jesu wa Natsaretha yo o mo hlomerego. ₉Ba ke bego ke na nabo, seetša seo ba se bone, ba swarwa ke poifo; lentšu lona la eo a boletšego le nna, ga ba ka ba le kwa. ₁₀Nna ka re: Morena! O rata ge nka dirang? Morena a fetola a re: Tsoga o ye Damaseko; gona fao o tlo botšwa se o laetšwego go se dira. ₁₁Gomme ka ge ke šitwa go bona, ke foufaditšwe ke letago la seetša seo, ka hlahliwa ka seatla ke bao ke bego ke na nabo, ka fihla Damaseko.

₁₂Motseng woo go be go na le monna e mongwe wa borapedi ka Molao, ke Anania, e a bego a na le bohlatse bjo botse go Bajuda ka moka ba ba agilego fao. ₁₃Ke yena a tlilego go nna, a ema pele gaka, a re: Saulo, Ngwanešwana! Boela o bone. Ka foufologa e sa le semeetseng, ka mo gadia. ₁₄Yena a re: Modimo wa botatawešo o go swere ka seatla gore o tsebe thato ya gagwe, o bone yena Moloki, o kwe lentšu la molomo wa gagwe, ₁₅O kgone go ba hlatse ya gagwe go batho bohle, hlatse ya tše o di bonego le tše o di kwelego. ₁₆Bjale o sa diegelang? Ema o kolobetšwe, o hlatswiwe dibe tša gago ka go rapela leina la Morena.

₁₇Ya re mohla ke boetše Jerusalema, ke rapela Ntlongkgethwa, ka ya le Moya. ₁₈Ka mmona, ka mo kwa ge a re: Akgofa o tloge mo Jerusalema ka pela, gobane bohlatse bjo o mpolelago ka bjona ba ka se ke ba bo amogela. ₁₉Nna ka re: Morena, bona beng ba a tseba, ge e le nna ke bego ke swara ba ba dumelago, ka ba iša kgolegong, ka ba otla diphuthegong thoko tšohle. ₂₀Gomme mohla wola ge go tšhollwa madi a Stefano hlatse ya gago, le nna ke be ke eme gona, ke thabela lehu la gagwe, ke leta dikobo tša ba bego ba mmolaya. ₂₁Morena a re: Sepela! Gobane ke nna ke tlogo go romela kgole go bantle.

₂₂Ba mo theetša go fihla ge a bolela lentšu leo; ya ba gona ba hlatlošago mantšu, ba re: Motho yo bjalo a a tlošwe lefaseng; ga a swanela go phela. ₂₃Ba tsoša lešata, ba lahla dikobo ba thuntšhetša lerole godimo. ₂₄Molaodi a laela a re Paulo a tsentšhwe sebong, a re a otliwe a bole molato wa ge ba mo tlaletša lešata le lekaakaa. ₂₅Bjalo ge ba mo nganga ka dithala, Paulo a botšiša tona ye e bego e eme moo, a re: A le dumeletšwe go otla motho wa Moroma le sešo la mo sekiša?

₂₆Tona ya re go kwa ge a realo, ya yo bolela le molaodi wa dira ya re: O tlo reng? Motho yo ke Moroma.

₂₇Molaodi a tla, a botšiša Paulo a re: Mpotše; a o Moroma?

Paulo a re: E!

₂₈Molaodi a fetola a re: Nna bogoši bjoo ke itheketše ka tšhelete e ntši.

Paulo a re: Gomme nna ke bo tswaletšwe.

₂₉Ke mo bao ba bego ba tlo mo sekiša ba napilego ba mo tloga; molaodi a boifa ge a kwele leo la gore Paulo ke Moroma, gomme o be a mo tlemile.

₃₀Ka la ka moswana yena molaodi, ka gobane a rata go tseba se e lego taba, ge Bajuda ba mmea molato, a mo hunolla ditlemo, a laela a re: Baperisita ba bagolo ba tle le lekgotla la bona ka moka; a iša Paulo a mmea gare ga bona.