Paulo o sekišwa ke Fesito le kgoši Agaripa
1Fesito ge a fihlile nageng yeo, a dula Kesarea matšatši a mararo, a tsebo rotoga a ya Jerusalema. 2Baperisita ba bagolo le baetapele ba Bajuda ba tla pele ga gagwe, ba bega Paulo, ba kgopela Fesito, 3ba re a ba setše a bitše Paulo a tle fa Jerusalema. Ba realo ba lakane go tlo mmolaya tseleng. 4Fesito a fetola a re: Paulo o kgolegong kua Kesarea; mme le nna ke tlo tloga ke boela gona. 5A re: Ba ba nago le tokelo ya go mo sekiša, a ba ye le nna, ba tle ba bege monna eo, ge a na le molato.
6A dula mo go bona a fetša matšatši a kago feta lesome, a tsebo boela Kesarea. Ka la ka moswana a dula sedulong sa kahlolo, a laela a re Paulo a tlišwe. 7Paulo ge a tlišitšwe, Bajuda ba go tšwa Jerusalema ba mmea melato e mentši e megolo, ye ba šitilwego go tliša bohlatse bja yona. 8Paulo a ipolelela a re: Ga ka senya Molao wa Bajuda, le ge e le wa Ntlokgethwa, le ge e le wa Kesara.
9Bjale Fesito, ka go rata go kgahla Bajuda, a botšiša Paulo a re: A o rata go rotogela Jerusalema, ka go sekiša gona ka taba tše?
10Paulo a re: Nna fa ke eme kgorong ya Kesara; ke mo ke swanetšego go ahlolelwa gona. Bajuda ga ka ba senyetša selo; ke tše le wena o di bonago gabotse. 11Ge e ka ba ke dirile bokgopo, goba ke dirile se se swanetšego polao, ga ke gane go hwa. Fela, ge mo go melato yeo ba mpegago ka yona, le o tee o se gona, nka se kgone go gafelwa bona. Nna ke wa go ahlolelwa ke Kesara.
12Fesito a bolela le banna ba lekgotla, a fetša ka go re: Ka ge o itše: O wa go ahlolelwa ke Kesara, gona o tla ya go Kesara.
13Ge go fetile matšatši a mangwe, gwa fihla kgoši Agaripa le Berenike; ba tla Kesarea go dumediša Fesito. 14Ge ba šetše ba feditše matšatši a mantši ba le moo, Fesito a anegela kgoši ditaba tša Paulo, a re: Go na le monna e mongwe yo Felikisi a mo tlogetšego fa. 15Mola ke ile Jerusalema, baperisita ba bagolo le bagolo ba Bajuda ba tlile go nna ka baka la monna eo, ba nkgopela ba re, ke mo ahlolele polao. 16Nna ka re: Ga se mokgwa wa Baroma go fo lahla motho ka tshekanoši, ge e se go mo lebantšha le babegi, le go mo fa sebaka sa go ipolelela tabeng yeo ba mmegago ka yona. 17Ke gona, ge ba phuthegetše mono, ga nka ka diega; ka dula sedulong sa kahlolo ka la ka moswana, ka re monna eo a tlišwe. 18Babegi ge ba ema, ba se ke ba ntšha molato le o tee wo nna ke bego ke re o ka ba gona. 19Se se lego gona ke kgang ye ba e tšeago le yena ka tša thuto ya Modimo wa bona, le ka tša motho e mongwe e a hwilego, yo ba rego ke Jesu, yo Paulo a rego o a phela. 20Nna, ka ge dikgang tšeo ke sa di hlathe, ka mmotšiša ge a ka rata go ya Jerusalema gore a ahlolelwe gona. 21Paulo a ema ka la go re: Nna ke sekišwa ke bamošate. Ke mo nna ke itšego, a lotwe a letele go tlo išwa go Kesara.
22Agaripa a kgopela Fesito a re: Le nna ke rata go kwa monna eo.
Fesito a re: Ka moswana o tlo mo kwa.
23Ka la ka moswana Agaripa le Berenike ba tla ba itlhamile ka botšhepi bjo bogolo, ba tsena ntlong ya kahlolo, ba na le matona le beng ba motse. Fesito a re Paulo a tlišwe. 24Fesito a boela a re: Kgoši Agaripa, le lena banna ba le lego fa le rena! Le bona monna yo lešaba ka moka la Bajuda kua Jerusalema le mono ba ntlaleditšego lešata ba re a se ke a phela. 25Nna ka hwetša a se na molato o swanetšwego ke polao. Gomme le yena ka noši o itše: Nna ke sekišwa ke bamošate. Nna ka re ke tlo mo romela gona. 26Bjale, ka ge ke sa ka ka hwetša tabataba ye nkago e ngwalela morena, ke mo tlišitše fa go lena, gagolo go wena kgoši Agaripa, gore ka tsheko ye ke hwetše tše nkago di ngwala. 27Gobane nna ke re e ka ba bošilo ge nka roma mogolegwa ke sa šupetše molato wa gagwe.
